فوتو: akorda.kz
مەيىرجان يۋسۋپوۆ كاسىپورىننىڭ قىسقا جانە ورتا مەرزىمدى جوسپار, ماقساتتارىن دا اتاپ ءوتتى.
پرەزيدەنتكە وتكەن جىلدىڭ قورىتىندىسى بويىنشا ۋران ءوندىرىسىنىڭ كولەمى 23 مىڭ توننادان, كومپانيالار توبى بويىنشا ساتۋ كولەمى 16,6 مىڭ توننادان اسقانى جونىندە باياندالدى. ورتاق تابىس 1,8 تريلليون تەڭگەگە جەتكەن. بۇل – رەكوردتىق مەجە ءارى 2023 جىلمەن سالىستىرعاندا 26 پايىزعا ارتىق كورسەتكىش. رەسپۋبليكالىق بيۋدجەتكە اۋدارىلعان سالىق ءتۇسىمى 720 ميلليارد تەڭگەدەن اسىپ, وتكەن جىلمەن سالىستىرعاندا 58 پايىزعا ۇلعايعان.
مەملەكەت باسشىسىنا الەمدىك نارىقتاعى قازىرگى احۋال, قازاقستاننىڭ تابيعي ۋران كونتسەنتراتىن جەتكىزۋگە ارنالعان جاڭا كەلىسىمشارتتارى مەن ينۆەستيتسيالىق جوبالارىن ىسكە اسىرۋ بويىنشا مالىمەت بەرىلدى. وتكەن جىلدىڭ ەڭ باستى وقيعاسى رەتىندە ء«ۇلبى-جبق» جاۋاپكەرشىلىگى شەكتەۋلى سەرىكتەستىگى زاۋىتىنىڭ 200 توننا تومەن بايىتىلعان ۋران ءوندىرىپ, تولىق قۋاتىندا جۇمىس ىستەي باستاعانىن ايتۋعا بولادى.
قاسىم-جومارت توقاەۆقا «قازاتومونەركاسىپ» ۇلتتىق اتوم كومپانياسى» اكتسيونەرلىك قوعامىن دامىتۋدىڭ 2025-2034 جىلدارعا ارنالعان جاڭا ستراتەگياسى تانىستىرىلدى. ونىڭ اياسىندا كومپانيا ەلدىڭ مينەرالدى-شيكىزات بازاسىن ۇلعايتۋعا جانە ونى ءتيىمدى پايدالانۋعا دەن قويماق. بىلتىر رەسۋرس قورى 170 مىڭ تونناعا باعالانعان پەرسپەكتيۆتى اۋماقتاردا ۋراندى بارلاۋ جۇمىستارىن جۇرگىزۋ ءۇشىن جاڭا ليتسەنزيالار الىندى.
مەيىرجان يۋسۋپوۆ تاجىكستانمەن سيرەك مەتالداردى وڭدەۋ سالاسىندا, فرانتسيامەن اتوم وندىرىسىنە مامان دايارلاۋ باعىتىندا مەموراندۋمدارعا قول قويىلعانىن, سونداي-اق موڭعوليا جانە يوردانيامەن اتالعان مەملەكەتتەردىڭ اۋماقتارىندا ۋراندى بارلاۋ جوبالارىن بىرلەسىپ زەردەلەۋ جونىندەگى ۋاعدالاستىقتارعا قول جەتكىزىلگەنىن ايتتى.
بۇدان بولەك, مەملەكەت باسشىسىنا حولدينگتىڭ وڭىرلەردى دامىتۋعا جانە قولداۋعا باعىتتالعان الەۋمەتتىك ماڭىزى بار جوبالارى تۋرالى اقپارات بەرىلدى. بىلتىر وسىنداي باستامالاردى جۇزەگە اسىرۋعا 3,7 ميلليارد تەڭگەدەن استام قارجى جۇمسالعان.
كەزدەسۋ سوڭىندا پرەزيدەنت «قازاتومونەركاسىپ» اكتسيونەرلىك قوعامىنىڭ جۇمىسىن ودان ءارى جەتىلدىرۋگە جانە كومپانيالار توبىنىڭ الەۋمەتتىك ماڭىزى بار جوبالاردى ورىنداۋعا قاتىستى بىرقاتار مىندەت جۇكتەدى.
