فوتو: ەڭبەكمينى
ەڭبەك جانە حالىقتى الەۋمەتتىك قورعاۋ مينيسترلىگى (بۇدان ءارى – ەڭبەكمينى) ءباسپاسوز قىزمەتىنىڭ مالىمدەۋىنشە, ەڭبەكمينى مەملەكەتتىك ورگاندارمەن جانە اكىمدىكتەرمەن بىرلەسىپ جۇمىسشى ماماندىقتار جىلىن وتكىزۋ جونىندەگى ءىس-شارالاردىڭ كەشەندى جوسپارىن ىسكە اسىرىپ جاتىر. وسى جۇمىس اياسىندا بوس جۇمىس ورىندار جارمەڭكەلەرى وتكىزىلەدى, كاسىپتىك ستاندارتتار جەتىلدىرىلەدى, جۇمىس بەرۋشىلەرمەن ءوزارا ءىس-قيمىل كۇشەيتىلەدى. بۇل شارالار ەڭبەك نارىعىن بىلىكتى كادرلارمەن قامتاماسىز ەتۋگە جانە ازاماتتاردىڭ الەۋمەتتىك-ەكونوميكالىق ءال-اۋقاتىن ارتتىرۋعا مۇمكىندىك بەرەدى.
«الداعى 6 جىلدا كادرلارعا جيىنتىق سۇرانىس سانى 1,6 ملن ادام بولادى دەپ كۇتىلىپ وتىر, ونىڭ ىشىندە 900 مىڭعا جۋىعى كاسىپتىك-تەحنيكالىق ءبىلىمى بار قىزمەتكەرلەرگە, 400 مىڭنان استامى جۇمىسشى ماماندىق يەلەرىنە تيەسىلى بولادى. جۇمىسشى كادرلار قۇرىلىس, اۋىل شارۋاشىلىعى, وڭدەۋ ونەركاسىبى جانە دەنساۋلىق ساقتاۋ سالالارىندا اسا سۇرانىسقا يە», دەدى ەڭبەكمينى حالىقتى جۇمىسپەن قامتۋ دەپارتامەنتىنىڭ ديرەكتورى ازيز يبراگيموۆ.
قۇرىلىس سالاسىنداعى ەڭ ۇلكەن سۇرانىس مىناداي ماماندىقتارعا كۇتىلەدى: سىلاقشىلار – 9 758 ادام, قۇرىلىس بريگادالارىنىڭ پرورابتارى – 9 477 ادام, دانەكەرلەۋشىلەر – 7 229 ادام; اۋىل شارۋاشىلىعى سالاسىندا: فەرمەرلەر – 10 695 ادام, تراكتورشىلار – 7 141 ادام, ءىرى قارا مالدى ءوسىرۋ بويىنشا – 4 940 ادام; وڭدەۋ ونەركاسىبىندە: دانەكەرلەۋشىلەر – 3342 ادام, تىگىنشىلەر مەن كيىمدى قالپىنا كەلتىرۋشىلەرى – 2606 ادام, ونەركاسىپتىك جابدىقتاردىڭ سلەسارلارى – 2367 ادام, سانتەحنيكتەر مەن قۇبىر وتكىزۋشى – 2051 ادام; دەنساۋلىق ساقتاۋ سالاسىندا: ورتا مەديتسينالىق پەرسونال – 24 614 ادام, جەدەل جاردەم جۇرگىزۋشىلەرى – 4 604 ادام, فەلدشەرلەر – 4 536 ادام.
«مانساپ كومپاسى» پلاتفورماسى بازاسىندا 100 مىڭ جوعارى سىنىپ وقۋشىلارىن قامتي وتىرىپ, كاسىپتىك باعدار بەرۋ جۇمىستارى جۇرگىزىلەدى. قازىرگى ۋاقىتتا وسى پلاتفورمادا كاسىبي دياگنوستيكا بويىنشا فۋنكتسيونالدى ەنگىزۋ جۇمىستارى جۇرگىزىلىپ جاتىر, ونىڭ ىسكە قوسىلۋى وسى جىلدىڭ ءساۋىر ايىنا جوسپارلانعان.
«جاستار پراكتيكاسى» جوباسى شەڭبەرىندە جاس مامانداردى دايارلاۋ ءۇشىن كەمىندە 35 مىڭ تالىمگەردى تارتۋ, سونداي-اق تالىمگەرمەن جۇمىس ورنىندا كاسىپتىك وقىتۋ جوسپارلانعان. 2025 جىلعى 1 ناۋرىزداعى جاعداي بويىنشا جاستار پراكتيكاسىنا 3,2 مىڭ ادام جىبەرىلدى. جەرگىلىكتى اتقارۋشى ورگانداردىڭ مالىمەتىنشە, جاستار پراكتيكاسىنا قاتىسۋشىلارعا 2 645 تالىمگەر بەكىتىلدى», دەدى ازيز يبراگيموۆ.
بۇگىندە Skills Enbek پلاتفورماسىندا 9 827 وقۋشى مەن تجكب ستۋدەنتتەرى ونلاين-وقىتۋمەن قامتىلدى.
وسى جىل ىشىندە كەمىندە 500 مىڭ وقۋشى مەن تجكب ستۋدەنتتەرى «ەلەكتروندىق ەڭبەك بيرجاسى» بىرىڭعاي تسيفرلىق پلاتفورماسىن پايدالانا وتىرىپ, جۇمىس ىزدەۋ جانە جۇمىسقا ورنالاستىرۋ داعدىلارىنا وقىتۋمەن قامتىلاتىن بولادى. تجكب-نىڭ ۇزدىك مىڭ تۇلەگىن ەلدىڭ جەتەكشى كومپانيالارىنا جۇمىسقا ورنالاستىرۋ جوسپارلانعان.
سونىمەن بىرگە جۇمىس بەرۋشىدە جۇمىسسىزداردى 6 ايدان اسپايتىن جۇمىس ورنىندا كاسىپتىك وقىتۋ ۇيىمداستىرىلادى.
2025 جىلدىڭ اقپان ايىنان باستاپ ەلىمىزدىڭ بارلىق وڭىرلەرىندە بوس جۇمىس ورىندار جارمەڭكەلەرى جۇمىسشى ماماندىقتارىنا باسا نازار اۋدارا وتىرىپ وتكىزىلەدى. ەلوردادا مۇنداي جارمەڭكە «جۇمىسشى ماماندىقتار قالاسى» فەستيۆالى اياسىندا ءوتىپ, ءبىر اپتاعا سوزىلدى.
بۇگىندە بوس جۇمىس ورىندار جارمەڭكەلەرىنە 1 مىڭنان استام جۇمىس بەرۋشى قاتىسىپ, جۇمىسشى ماماندىقتار بويىنشا 9,6 مىڭ بوس جۇمىس ورنىن ۇسىندى.
«بيىل سۋ شارۋاشىلىعى, ماشينا جاساۋ, حيميا ونەركاسىبى, تاۋ-كەن مەتاللۋرگيا ونەركاسىبى, قۇرىلىس, جەڭىل ونەركاسىپ, اۋىل شارۋاشىلىعى سالاسى, كولىك لوگيستيكاسى, اۆتوموبيل جولدارى جانە ت.ب. سالالاردا 100 كاسىپتىك ستاندارت ازىرلەنىپ, جاڭارتىلاتىن بولادى.
بىلىكتىلىكتى تانۋدى باعالاۋ 4 تاۋەلسىز ورتالىقتىڭ بازاسىندا باستالدى, تاعى 5 ورتالىقتى اشۋ جوسپارلانىپ جاتىر, ونىڭ ىشىندە 2 حالىقارالىق ستاندارتتار بويىنشا بولادى», دەدى ازيز يبراگيموۆ.
