«مەككە, ءمادينام مەنىڭ!»

قازاقستاننىڭ ەڭبەك سىڭىرگەن قاي­رات­كەرى, پرەزيدەنت سىيلىعىنىڭ لاۋرەا­تى, جۋرناليست-جازۋشى قايسار قاجى ءالىمنىڭ وسىلاي اتالعان كىتابىندا («فو­ليانت» باسپاسى, استانا, 2015 ج.) مەككە, ماديناعا جاساعان قاجىلىق ساپارى (07-29.10.2013 جىل) تۋرالى باياندالادى. اۆتوردىڭ جالپى يماندىلىق قۇن­­دىلىقتارىنا نەگىزدەلگەن وي-پايىمى, ماقسات-اڭسارى, كورگەن-بىلگەنى, تۇيسىك-تۇيگەنى, سەزىم-سىرى كىتاپتىڭ التىن ارقاۋىنا اينالعان. بۇل كىتاپتىڭ جازىلۋ سىرىن اۆتور العى ءسوز رەتىندە بەرىلگەن «جۇرەك ءسوزى» نەمەسە جولاي جوعالعان جۇگىمنىڭ اللانىڭ قۇدىرەتىمەن قولىما تۇتاس­­تاي تابىستالعانى تۋرالى» دەگەن اڭدات­پاسىندا ايقىنداپ ءتۇسىندىرىپ وتەدى. استانا اۋەجايىندا جۇگىنىڭ ءبىر بولىگى عانا قولىنا تيەدى... ەكىنشى بۋماسى جوق بوپ شىعادى. سول جۇگىندە – قۇراننىڭ سۋۆەنيرلىك كىتاپتارى, قاعبا بەينەلەنگەن كىلەمشەلەر, جاينامازدار, تاسبيحتار سەكىلدى سىي-سياپاتتارى بار بولاتىن. سونداي-اق, جانىن وكسىتكەنى – ىقتياتتاپ جۇرگىزگەن كۇندەلىك-قولجازباسى دا سول قاپشىقتىڭ ىشىندە قالعان ەدى... «سول كۇندەلىك-قولجازبام قايت­پاعاندا, بۇل كىتابىم – قاجىلىق پايىمىم قالاي جازىلار ەدى دەپ, كۇڭىرەنىپ, ىلە تاۋبەمە كەلەمىن! جازىلار-اۋ, بىراق ءىزىن سۋىتپاي داپتەرىمە تۇرتكەن, دەرەكتەردىڭ دالمە-دالدىگى, تۋلاعان سەزىم ۇشقىنى, يماندىلىق ءيىرىمى, تازارعان جۇرەك ءسوزى, ءبارى-ءبارى اينا قاتەسىز سول كۇيىندە ءتىل ۇشىنا ورالار ما ەدى, ورالماس پا ەدى...» – دەگەن قالامگەردىڭ ساباعا تۇسىرگەن ءسوزى وقىرماندى دا اۋىر ويلاردان ارىلتىپ العانداي اسەر ەتەرى ءسوزسىز. سونىمەن, جاقسى كىتاپ ومىرگە كەلىپتى. «مەككە», «ءمادينا» بولىمدەرىنەن تۇراتىن قاجىلىق ساپاردىڭ ءار كۇنى جۇرەكجاردى يماندىلىق يىرىمدەرىنە تولى ەكەن. مازمۇنى سۋرەتتەرمەن بايىتىلا تۇسكەن. نۇربەك ءسابيتوۆ.