فوتو: وقۋ-اعارتۋ مينيسترلىگىنىڭ ءباسپاسوز قىزمەتى
باعدارلاما اياسىندا «قامقور», «شابىت», «سمارت بالا», «ەڭبەگى ادال – جاس ورەن», «ۇشقىر وي الاڭى», «بالالار كىتاپحاناسى» اتتى 6 ءىرى جوبا ىسكە اسىرىلىپ, 4 ميلليونعا جۋىق وقۋشىنى قامتىپ, قۇندى تاربيە بەرۋگە باعىتتالعان 77 قادامدىق ءىس-شارالار كەشەنى ارقىلى جۇزەگە اسىپ جاتىر.
«قامقور» جوباسى بويىنشا 3 ميلليوننان استام ءبىلىم الۋشى «تازا قازاقستان» اكتسياسىنا سەڭبىلىكتەرگە بەلسەنە قاتىستى, 2,1 ميلليونعا جۋىق كوشەت وتىرعىزدى.
«شابىت» جوباسى: 2 ميلليوننان استام بالا دومبىرا تارتۋعا قاتىستى. سونداي-اق, «انشۋاق» فەستيۆالى جاس ورىنداۋشىلار اراسىندا ۇلكەن تانىمالدىققا يە بولدى. سونىمەن قوسا, «دانالىق ۇستازدان», «ماقتانىشىم – رەسپۋبليكام!», «جەتىستىگىم – ەلىمە!», «العىس ايتۋ كۇنى», «انانىڭ ايالى الاقانى» سەكىلدى بايقاۋلارعا 3 ميلليونعا جۋىق وقۋشى قاتىسقان.
«ناۋرىز مەيرامى قارساڭىندا ەلىمىزدىڭ بارلىق مەكتەپتەرىندە ءبىر مەزگىلدە كۇي ورىندالادى. 20 ناۋرىز كۇنى ساعات 11:00-دە رەسپۋبليكالىق دومبىراشىلار چەللەندجى وتەدى. وعان 1 ملن-عا دەيىن وقۋشى مەن پەداگوگتەر قاتىسادى دەپ كۇتىلىپ وتىر», دەپ مالىمدەدى تاربيە جانە قوسىمشا ءبىلىم بەرۋ دەپارتامەنتىنىڭ ديرەكتورى ەرلان قالماقوۆ.
مەملەكەت باسشىسىنىڭ تاپسىرماسىمەن «بالالار كىتاپحاناسى» جوباسى ىسكە قوسىلدى, ونىڭ اياسىندا 2580 كىتاپتىڭ ءتىزىمى جاسالدى. سونىمەن قاتار, 2024 جىلى بالالار كىتاپحاناسىنىڭ ونلاين-پورتالى ىسكە قوسىلعان.
مەكتەپتەردە وقۋ اپتاسى قر-نىڭ مەملەكەتتىك ءانۇرانىن ورىنداۋمەن باستالادى. ءۇزىلىس كەزىندە وقۋشىلار «اسىق اتۋ», «توعىزقۇمالاق», «بەس تاس» سەكىلدى ۇلتتىق ويىندارعا بەلسەنە قاتىسادى.
كوكتەمگى كانيكۋلدا ۇيىرمەلەر مەن سەكتسيالار جۇمىس ىستەيدى. بالالار ءار ايدىڭ ءۇشىنشى جەكسەنبىسىندە جانە كانيكۋل ۋاقىتىندا مۋزەيلەرگە تەگىن بارا الادى. وعان قوسا, تەاترلاردا بالالارعا ارنالعان قويىلىمدار ۇيىمداستىرىلادى. سونداي-اق «قازاقفيلمنىڭ» التىن قورىنداعى فيلمدەر مەن انيماتسيالىق فيلمدەردى مادەنيەت جانە ءبىلىم بەرۋ ۇيىمدارىندا تەگىن ۇجىمداسىپ تاماشالاۋ مۇمكىندىگى جاسالىپ جاتىر.
