فوتو: ءماجىلىس
دەپۋتات قازاقستانداعى رەفورمالار باياۋ بولسا دا قاداۋ-قاداۋ اتقارىلىپ جاتقانىن ايتتى. ول بۇل قاتاردا پرەزيدەنت باستاماسىمەن 20 جىلدان كەيىن قالپىنا كەلتىرىلگەن بىر مانداتتى موجاريتارلىق سايلاۋ جانە سايلانۋ مۇمكىندىگىن اتاپ ءوتتى.
«بۇدان ءۇش جىل بۇرىن ەلىمىزدى شارپىپ وتكەن قايعىلى قاڭتاردان كەيىن ناقتى جانە باتىل قولعا الىنعان وزگەرىستەر ءداۋىرىنىڭ قاينار كوزى – سايلاۋ جۇيەسىنەن باستالدى. ساياسي بيلىكتىڭ بۇل شەشىمىن كىمدەر اسىرە اسقاقتاتىپ, ال سىندارلى قوعامدا ەندى بىرەۋلەر قانداي قىجىلمەن ايتسا دا, تاۋەلسىز كانديداتتارعا مۇمكىندىك جولىن اشقان وسى – ءبىر مانداتتى سايلاۋ جۇيەسىنە پرەزيدەنت قاسىم-جومارت توقاەۆتىڭ رەفورمالىق باستاماسى مۇرىندىق بولعانى قازاقستاننىڭ جاڭا تاريحىندا جازىلىپ قالاتىن اقيقات بولماق», دەدى ەرمۇرات باپي.
ماجىلىسمەن بيلىك پەن قوعام ورتاق ءتىل تابىسپايىنشا, «جاڭا قازاقستان» يدەياسىن تولىققاندى جۇزەگە اسىرۋ مۇمكىن ەمەس ەكەنىنە توقتالىپ, ەلدەگى وزگەرىستەردىڭ ءۇش جىلدىق كەزەڭىن سارالاعاندا «ادىلەتتى قازاقستاندى» قالىپتاستىرۋ ماقساتىندا جىلىستاتىلعان اكتيۆتەردى ەلگە قايتارۋ باستاماسىن ءبىرىنشى كەزەكتە تىلگە ورالاتىنىنا نازار اۋداردى.
«بۇل ورايدا مەملەكەت باسشىسىنىڭ تاپسىرماسىمەن پارلامەنت جەدەل تۇردە ءتيىستى ورگانداردىڭ ورىنداۋىنا قاجەتتى ءتيىستى زاڭ قابىلداپ بەردى. «ەسكى جۇيەدە» ەسەسى كەتكەن حالىقتىڭ قازىناسىن تولتىرۋدىڭ قامىمەن سوڭعى ەكى جىلدىڭ ىشىندە 2 تريللون تەڭگەگە جۋىق اكتيۆ قايتتى دەگەن اقپارات بار. سول ءتيىستى ورگاندار قايتارىلعان قاراجات حالىققا قاجەتتى الەۋمەتتىك-تۇرمىستىق نىساندار سالۋعا جۇمسالۋدا دەيدى. «دەيدى» دەپ, سىرتتان سىرعىتا سويلەۋىمىزگە ەل پرەزيدەنتى باستاماسىن ۋاكىلەتتى ورگانداردىڭ ورىنداۋ بارىسىنا كوڭىل تولماعاندىق سەبەپ بولىپ وتىر. باسقاسىن قايدام, سول ەكى تريلليوننىڭ تەڭ جارتىسىن ەكى وليگارح قانا قايتارعان ەكەن. ال پرەزيدەنتتىڭ تىلىمەن ايتقاندا, «ەل قازىناسىنىڭ جارتىسىن يەلەنىپ العان وليگارحاتتان قايتارىلۋى ءتيىس اكتيۆتەر قايدا», دەگەن دەپۋتات زاڭنىڭ جۇزەگە اسىرۋ پروتسەسىنەن ونى قابىلداعانداردىڭ حابارسىز قالۋىن سىنادى.
پرەزيدەنتتىڭ تىكەلەي وكىمىمەن قۇرىلعان ۇلتتىق قۇرىلتاي دا ەلدىڭ دامۋ جولىنداعى وڭ سەرپىلىس. قۇرىلتايدىڭ قوعام مەن مەملەكەتتىك بيلىك اراسىنداعى ديالوگتىق الاڭعا اينالعانىن جۋىقتا عانا وتكەن بۋراباي قۇرىلتايى تاعى دا دالەلدەدى.
«جەرگىلىكتى اكىمدەردىڭ سايلانىپ قويۋ جونىندەگى پرەزيدەنتتىڭ تاعى ءبىر رەفورمالىق باستاماسىن تىلگە تيەك ەتكىم كەلەدى. ءيا, بۇل مەملەكەتتىك باسقارۋ ۆەرتيكالىن دەموكراتيالاندىرۋعا باستايتىن باتىل قادام بولعانى داۋسىز. حالىقتىڭ ءوزىن-ءوزى باسقارۋ پرينتسيپتەرىن وركەنيەتتى الەمنىڭ ساياسي ءداستۇرى نەگىزىندە قالىپتاستىرۋ قاعيداسى قوعامدا قىزۋ قولداۋمەن قابىلدانعانى راس. بىراق وسى سايلاۋدىڭ ناتيجەسىندە سايلانعان اكىمدەردىڭ دەربەستىگى مەن جەرگىلىكتى اكىمدىكتەردىڭ بيۋدجەت-قاراجات جۇيەسىن جەتىلدىرۋ باعىتىندا ءالى دە كوپ جۇمىستار جۇرگىزىلۋى ءتيىس. بيۋدجەتسىز اكىم – ەسكەكسىز قايىقتاي», دەپ اتاپ ءوتتى ەرمۇرات باپي.
