قازاق مادەنيەتىندە شاڭىراقتىڭ قادىر-قاسيەتى ايرىقشا. ول – ءارى اسپان كۇمبەزى, ءارى ءۇي-جاي, ءارى تىرەك, ءارى باي-قۋاتتىلىق پەن قاۋىپسىزدىك ءھام ۇرپاقتار ساباقتاستىعىنىڭ بەلگىسى. اتا-بابا سالتىنداعى وسى ءبىر «شاڭىراق كوتەرۋ» اتتى ەرەكشە ءداستۇردى ناسيحاتتاۋدى ماقسات تۇتقان ايتۋلى شاراعا قازاقتىڭ قىز جىبەگى, قازاقستاننىڭ ەڭبەك سىڭىرگەن ءارتىسى, «قۇرمەت», «پاراسات» وردەندەرىنىڭ يەگەرى مەرۋەرت وتەكەشەۆا, قازاقستاننىڭ ەڭبەك سىڭىرگەن قايراتكەرلەرى قانات پەن سۆەتا ايتباەۆتار, سونىمەن قاتار استانا قالاسى ىرىسكەلدى قاجى مەشىتىنىڭ باس يمامى, بەلگىلى ءدىنتانۋشى-عالىم نۇرلان بايجىگىت ۇلى قاتىستى. تاربيەلىك ءمانى زور تاعىلىمدى شارانى مۋزىكالىق جاس كورەرمەن تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماقسىم ۇلى تىزگىندەدى.
«تەاتر ىشىندە بىلتىردان باستاپ ەرەكشە ناۋرىزناما باستالىپ, قازاقتىڭ ۇلتتىق قۇندىلىقتارىن, رۋحاني كەلبەتىمىزدى كورسەتەتىن ۇلكەن ءىس-شارالار ءوتىپ جاتىر. تەاترىمىز اشىلعالى بەرى ءتورت جارىم جىل ىشىندە ۇجىمىمىزدا 15 جۇپ شاڭىراق كوتەرىپ, وتباسىلى بولدى. بۇگىن, مىنە, تاعى ءبىر وداق – تەاتردا تانىسىپ, تابىسقان 16-جۇپ ۇلكەن ۇلكەن ومىرگە قادام باسقالى وتىر. ەكەۋىنە ونەر مەن ءومىر جولىندا ارمان دا, ماقسات تا ورتاق بولسىن دەپ تىلەيمىز!», دەپ اق تىلەگىن جەتكىزدى اسحات ماەميروۆ.
ءىس-شارا بارىسىندا نەكە قيۋ راسىمىمەن قاتار تەاتر ارتىستەرىنىڭ ورىنداۋىندا اسەم اندەر شىرقالىپ, كۇمبىرلەگەن كۇي تارتىلدى. جاس وتباسىنا باتا بەرىلىپ, اقجارما تىلەكتەر ايتىلدى. وتباسىلىق قۇندىلىقتار دارىپتەلدى. ال شاڭىراق كوتەرىپ جاتقان ايدوس اماندىقتىڭ ايتۋىنشا, ناۋرىز مەرەكەسىنىڭ جاڭا تۇجىرىمداماسى اياسىنداعى «شاڭىراق كۇنى» كەلەشەكتە جالپىۇلتتىق وتباسىلىق قۇندىلىقتار مەن كىرشىكسىز ماحاببات كۇنىنە اينالادى دەۋگە نەگىز بار.
«شاڭىراق كۇنى حالقىمىز جاس ۇرپاقتى تاربيەلەۋ مادەنيەتىن كورسەتە وتىرىپ, ولاردىڭ بويىنا ۇلتجاندىلىق مەن ادامگەرشىلىكتى قالىپتاستىرۋعا ۇندەيدى. بۇگىن مۇسىلمانشا ءھام زاڭدى نەكەمىزدى كيەلى ساحنادا شاڭىراق كۇنىندە قيىپ جاتىرمىز. ءبىز – تەاتردا تابىسقان 16-جۇپپىز. بۇل ءبىز ءۇشىن ەكى ەسە باقىت. الدىمىزدا ۇيلەنگەن اعا-اپكەلەرىمىز قازىر ءۇبىرلى-ءشۇبىرلى, بەرەكەسى مەن بىرلىگى جاراسقان جاراسىمدى وتباسىنا اينالىپ وتىر. الداعى ۋاقىتتا دا وسى يگى ءداستۇر جالعاسادى دەپ ويلايمىز», دەگەن اكتەر سۇيگەنىمەن قالاي تانىسقانىن دا ايتىپ بەردى: «وسى تەاتردا 2023 جىلدان باستاپ جۇمىس ىستەپ كەلە جاتىرمىز. جارىمنىڭ اتى – ايدانا بولات. ۋنيۆەرسيتەتكە قۇجات تاپسىرىپ, تالاپكەر بولىپ كەلىپ تۇرعانىمىزدا تانىسىپ, دوس بولىپ كەتتىك. كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە اسحات ماەميروۆ شەبەرحاناسىندا بىرگە وقىدىق. ەكى جىل دوس بولىپ ارالاسقاننان كەيىن سەزىمىمدى ءبىلدىردىم. قىز بەن جىگىت بولىپ ءسوز بايلاستىق. ەندى, مىنە, شاڭىراق كوتەرگەلى وتىرمىز», دەپ اعىنان جارىلدى اكتەر.
تەاتر ىشىندەگى ايرىقشا وقيعا – قوس اكتەردىڭ نەكە قيۋ راسىمىنە جينالعان قوناقتار جاستارعا جۇرەكجاردى لەبىزىن ءبىلدىرىپ, ءبىر-بىرىنە دەگەن ىڭكار سەزىمدەرىنىڭ ماڭگىلىك بولۋىن, ەل مەن جۇرتتىڭ تەك العىسىنا بولەنىپ, ءومىر مەن ونەر جولىندا باقتارىنىڭ باياندى بولۋىن تىلەدى.
