تەمىرلانداعى ء«شامشى» اللەياسىندا وتكەن شاراعا قوس ءوڭىردىڭ ارداگەرلەرى مەن باتاگوي اقساقالدارى, زيالى قاۋىم وكىلدەرى مەن ونەرپازدارى قاتىستى. كورىسۋ راسىمىمەن باستالعان جيىن اقىنداردىڭ ارناۋ جىرلارىنا جالعاستى. تۇركىستان وبلىسىنان ايان نيازبەك پەن شىمكەنت قالاسىنان مەيىرجان جاقىپ ناۋرىز مەيرامىنىڭ ءمان-ماڭىزىن, ەكى ايماقتىڭ تاريحى مەن بۇگىنگى جەتىستىكتەرىن جىرعا قوستى.
ەكى ءوڭىردىڭ ارداگەرلەر كەڭەسىنىڭ توراعالارى جەڭىسبەك ماۋلەنقۇلوۆ پەن كەنجەحان تولەباەۆ مەرەكەمەن قۇتتىقتاپ, جىلى لەبىزدەرىن ءبىلدىردى. ناۋرىزدىڭ 10 كۇن بويى يگى ىستەرمەن ورنەكتەلىپ جاتقانىن ايتىپ, « ۇلىس وڭ بولسىن!» دەگەن تىلەكتەرىن جەتكىزدى. سونىمەن بىرگە ورداباسى اۋدانىنىڭ اكىمى ازات ورالباەۆ امال كۇنىنىڭ مانىنە توقتالىپ, كوپشىلىكتى قۇتتىقتادى.
جۇرتشىلىققا كوتەرىڭكى كوڭىل-كۇي سىيلاعان ونەرپازدار حالىق اندەرىن, كۇي, تەرمە, بي, سونداي-اق قازاق ەستراداسىنىڭ تانىمال شىعارمالارىن ورىنداپ, مەرەكەنىڭ كوركىن قىزدىردى. «سۇگىر» اتىنداعى قازاق ۇلتتىق اسپاپتارى وركەسترى مەن «قازىنا» بي ءانسامبلى ءوز ونەرلەرىن پاش ەتتى. تۇركىستان وبلىسى مادەنيەت باسقارماسى ۇيىمداستىرعان شارا سوڭىندا پاتريوتتىق اندەر ورىندالىپ, جيىن ۇلكەن بىرلىك پەن ىنتىماقتىڭ بەلگىسىنە اينالدى.
امال كۇنى – ۇلتتىق ءداستۇرىمىزدىڭ ماڭىزدى كورىنىسى. بۇل مەرەكەدە حالىق ءبىر-بىرىنە ىزگى تىلەك ايتىپ, جاقسىلىق تىلەپ, بىرلىكتى نىعايتادى. تۇركىستان مەن شىمكەنتتىڭ زيالى قاۋىمى وسى ءداستۇردى جانداندىرۋ جولىندا يگى ءىس جاسادى. قوس تاراپ ءبىر-بىرلەرىنە سىي ۇسىنىپ, امال كۇنىمەن قۇتتىقتادى. بۇل يگى ءداستۇر – ۇلتتىق ەرەكشەلىگىمىز عانا ەمەس, عاسىرلارعا جالعاسىپ كەلە جاتقان ۇرپاقتار ساباقتاستىعىنىڭ التىن كوپىرى ەكەنىن ايتىپ, ەلگە اماندىق, بىرلىك, بەرەكە تىلەدى.
