فوتو: اقوردا
مەملەكەت باسشىسىنىڭ ايتۋىنشا, وتكەن جىلى وتاندىق ماماندار 94 فيلم تۇسىرگەن. بۇل – قازاقستاندىق كينونىڭ دامىپ كەلە جاتقانىنىڭ بەلگىسى. دەگەنمەن, تەك سانعا ەمەس, ساپاعا كوڭىل ءبولۋ كەرەكتىگىن ەسكەرتتى.
«كورەرمەننىڭ كوڭىلىن كوتەرىپ, كۇلكى سىيلاۋ – ءبىر بولەك, جاعىمسىز ادەتتەردى ناسيحاتتاۋ – ءبىر باسقا. زورلىق-زومبىلىقتى, قاتىگەزدىك پەن قىلمىستى ناسيحاتتايتىن فيلمدەر دە پايدا بولدى. وسى جەردە ءبىر نارسەنى ەسكەرگەن ءجون. بۇگىندە فيلمدەردىڭ باسىم كوپشىلىگى مەملەكەتتىك تاپسىرىسپەن ەمەس, جەكە قارجىعا تۇسىرىلۋدە. كينو ماڭىزدى يدەولوگيالىق قۇرال ەكەنىن ءبارىمىز جاقسى تۇسىنەمىز. سوندىقتان جەكە قارجىعا تۇسىرىلسە دە, ءفيلمدى كينوتەاترعا شىعارماس بۇرىن الدىن الا سۇزگىدەن وتكىزۋ جولدارىن قاراستىرعان ءجون»», دەدى قاسىم-جومارت توقاەۆ.
سونىمەن قاتار, پرەزيدەنت قازاق تىلىندە تۇسىرىلگەن «شوقان. قاشقاريا ساپارى» دەگەن ءمۋلتفيلمدى جوعارى باعالاپ, مۇنداي تۋىندىلاردى كوبەيتۋ قاجەتتىگىن ايتتى.
«بۇل وسكەلەڭ ۇرپاققا ايگىلى تاريحي تۇلعا شوقان ءۋاليحانوۆ تۋرالى مالىمەت بەرەتىن وتە جاقسى تۋىندى دەپ ايتۋعا بولادى. قازاق تىلىندە ۇلتتىق ناقىشتا تۇسىرىلگەن وسىنداي مۋلتفيلمدەر كوپ بولۋى قاجەت. بۇل – ۇلت بولاشاعىنا تىكەلەي ىقپال ەتەتىن ماسەلە. سوندىقتان انيماتسيانى دامىتۋ ماسەلەسىن قولعا الۋ كەرەك», دەدى مەملەكەت باسشىسى.
