سىرتقى ساياسي ۆەدومستۆوسىنىڭ باسشىسى كەزدەسۋدى اشا وتىرىپ, وي تولعاۋدى, بىرلىكتى جانە يگى ىستەردى بەينەلەيتىن قاسيەتتى رامازان ايىنىڭ رۋحاني ماڭىزدىلىعىن اتاپ ءوتتى.
«رامازان – ورازا ايى عانا ەمەس, رۋحاني قۇندىلىقتاردى نىعايتۋ, ءوزارا سىيلاستىق پەن ىنتىماقتاستىق ۋاقىتى. قازاقستان ارقاشان بەيبىتشىلىكتى, تاتۋ كورشىلىكتى جانە حالىقارالىق ىنتىماقتاستىقتى جاقتاپ كەلەدى جانە بۇل قاعيداتتار وزگەرمەيدى», دەپ مالىمدەدى مينيستر ءوز سوزىندە.
م.نۇرتىلەۋ جاھاندىق سىن-قاتەرلەرگە قاراماستان ەلىمىز بەيبىتشىلىك پەن تۇراقتىلىقتى قولداۋعا باعىتتالعان سىندارلى سىرتقى ساياساتتى جۇرگىزۋدى جالعاستىرىپ جاتقانىن جەتكىزدى. ول 2024 جىلعى ەلىمىزدىڭ مۇسىلمان ەلدەرمەن ىنتىماقتاستىعىن قورىتىندىلاپ, 2025 جىلعا ارنالعان ءوزارا ءىس-قيمىلدىڭ باسىم باعىتتارىن بەلگىلەدى.
سوڭعى جىلدارى قازاقستان ساۋدا-ەكونوميكالىق سەرىكتەستىكتى, كولىك لوگيستيكاسىن جانە گۋمانيتارلىق ىنتىماقتاستىقتى دامىتا وتىرىپ, مۇسىلمان الەمىمەن بايلانىستاردى ايتارلىقتاي نىعايتقانى اتالىپ ءوتتى. بۇل كۇش-جىگەر بارلىق تاراپتار ءۇشىن جاڭا پەرسپەكتيۆالار اشىپ, ەلەۋلى ناتيجە بەرىپ كەلەدى.
ءسىم باسشىسى ەكىجاقتى جانە كوپجاقتى بايلانىستاردى دامىتۋعا بەلسەندى قاتىسقانى ءۇشىن ديپلوماتيالىق كورپۋسقا العىسىن ءبىلدىرىپ, قازاقستاننىڭ الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى بويىنشا بۇۇ وڭىرلىك ورتالىعىن قۇرۋ جونىندەگى باستاماسىنا قولداۋ بىلدىرگەنىنە ەرەكشە نازار اۋداردى.
شەتەلدىك ديپلوماتتار جىلى قابىلداۋ ءۇشىن العىس ايتىپ, قازاقستانمەن سەرىكتەستىكتى ودان ءارى نىعايتۋعا ىنتالى ەكەندەرىن جەتكىزدى.
