فوتو: depositphotos.com
قالا اكىمى جەڭىس قاسىمبەك قۇرىلىس كومپانيالارىنىڭ ءبارى بىردەي تۇرعىن ۇيلەردى ساپالى ءارى زاڭدى تۇردە سالا بەرمەيتىنىن اتاپ ءوتتى.
«التى كومپانيا قۇرىلىس ليتسەنزياسىنان ايىرىلدى, سول سياقتى زاڭ مەن قۇرىلىس نورمالارىن بۇزعانى ءۇشىن 180-نەن استام تالاپ-ارىز سوتقا جولداندى. جەرگە قاتىستى ءتيىستى قۇجات الماي قۇرىلىسى باستالعان ءتورت نىسان سوت شەشىمىمەن بۇزىلدى. اتالعان جۇمىستىڭ بارلىعى بيىل دا جالعاسىپ جاتىر», دەدى جەڭىس قاسىمبەك.
ەستەرىڭىزگە سالا كەتەيىك, قۇرىلىس-مونتاجداۋ جۇمىسى تەك قۇرىلىس نورمالارى مەن ستاندارتتارىنا سايكەس جۇرگىزىلۋى قاجەت. سونداي-اق, قۇرىلىس جۇرگىزۋ جانە مونتاجداۋ بارىسىندا ورىندالاتىن جۇمىستاردىڭ ارنايى بەكىتىلگەن جوبالىق قۇجاتتاما مەن ستاندارتتارعا سايكەستىگىن ۇنەمى تەكسەرىپ وتىرۋ قاجەت. جاۋاپتى تۇلعالار ورىندالاتىن وپەراتسيالاردىڭ قاۋىپسىزدىك تالاپتارىنا تولىقتاي سايكەستىگىن قاداعالاي وتىرىپ, ماتەريالداردىڭ ساپاسى مەن تەحنولوگيالارعا سايكەستىگىن باقىلاۋى كەرەك.
