فوتو: وقۋ-اعارتۋ مينيسترلىگى
2023-2025 جىلدارعا ارنالعان بالالاردى زورلىق-زومبىلىقتان قورعاۋ, ءسۋيتسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋ جونىندەگى كەشەندى جوسپاردى جۇزەگە اسىرۋ اياسىندا وقۋ-اعارتۋ مينيسترلىگى بالالاردىڭ تسيفرلىق قاۋىپسىزدىگىن ارتتىرۋ ماقساتىندا ارنايى SIM-كارتا ەنگىزۋ باستاماسىن كوتەرگەن.
بۇل – بالالاردىڭ ءموبيلدى قۇرىلعىلاردى قاۋىپسىز پايدالانۋىن قامتاماسىز ەتۋگە جانە اتا-انالار تاراپىنان باقىلاۋدى كۇشەيتۋگە باعىتتالعان ارنايى تاريفتىك جوسپار. بالالارعا ارنالعان SIM-كارتالاردىڭ باستى ارتىقشىلىقتارى اتا-انا باقىلاۋى, زياندى جانە قالاۋسىز كونتەنتتەن قورعاۋ جانە بالانىڭ ورنالاسقان جەرىن باقىلاۋ.
«حالىقارالىق تاجىريبە كورسەتكەندەي, بالالارعا ارنالعان SIM-كارتالار بايلانىس وپەراتورلارى تاراپىنان قولداۋ تاۋىپ, تسيفرلىق قاۋىپسىزدىك سالاسىنداعى مەملەكەتتىك باستامالارمەن قاتار جۇرەدى. بۇل اتا-انالارعا بالالاردىڭ تەلەفوندى قولدانۋىن ءتيىمدى باقىلاۋعا مۇمكىندىك بەرەدى. قازاقستاندا بايلانىس وپەراتورلارى بالالارعا ارنالعان, ءبىلىم بەرۋ رەسۋرستارىنا شەكتەۋلى قولجەتىمدىلىك بەرەتىن تاريفتەردى ۇسىنعانىمەن, ينتەرنەتتەگى قاۋىپسىز مىنەز-ق ۇلىقتى تولىق باقىلاۋ مۇمكىندىگىن قامتاماسىز ەتپەيدى. مينيسترلىكتىڭ بۇل باستاماسى بالالاردىڭ ينتەرنەتتەگى قاۋىپسىزدىگىن كۇشەيتىپ, اتا-انالارعا ولاردىڭ ونلاين كەڭىستىكتەگى قورعانىسىن قامتاماسىز ەتۋدە جوعارى دەڭگەيدەگى قولداۋ كورسەتەدى», دەپ مالىمدەدى ەدىل وسپان.
ەستەرىڭىزگە سالا كەتەيىك, ەلىمىزدە «بالالاردى ولاردىڭ دەنساۋلىعى مەن دامۋىنا زيان كەلتىرەتىن اقپاراتتان قورعاۋ تۋرالى» زاڭعا وزگەرىستەر مەن تولىقتىرۋلار ەنگىزۋ بويىنشا جۇمىس باستالعان ەدى. بۇل شارالار بالالاردىڭ ينتەرنەتتەگى قاۋىپسىزدىگىن زاڭنامالىق تۇرعىدان كۇشەيتۋگە باعىتتالعان.
