جالپى العاندا بيىل 659,9 مىڭ گەكتار القاپقا اۋىل شارۋاشىلىعى داقىلدارىن ورنالاستىرۋ جوسپارلانعان. بۇل كورسەتكىش وتكەن جىلمەن سالىستىرعاندا 33,2 مىڭ گەكتارعا ارتقان. سونداي-اق كوكتەمگى دالا جۇمىستارىن قارجىلاندىرۋ ءۇشىن «اگرونەسيەلىك كورپوراتسيا» ارقىلى شارۋالارعا 8 ملرد تەڭگە كولەمىندە 5 پايىزبەن نەسيە بەرىلمەك.
«وسى جىلى 400-دەن استام اۋىل شارۋاشىلىعى تەحنيكاسىن ساتىپ الىپ, جاڭارۋ جوسپارىن 6,5 پايىزعا جەتكىزۋ كوزدەلىپ وتىر. 2025 جىلى اۋىل شارۋاشىلىعى سالاسىن قولداۋعا 39,6 ملرد تەڭگە ءبولىندى. بۇل قارجى ەسەبىنەن 16 مىڭنان اسا اۋىل شارۋاشىلىعى تاۋار وندىرۋشىسىنە قولداۋ كورسەتىلەدى. ناتيجەسىندە وسىمدىك شارۋاشىلىعىندا 325,1 ملرد. تەڭگەنىڭ ءونىمى وندىرىلەدى دەپ كۇتىلۋدە», دەيدى وبلىستىق اۋىل شارۋاشىلىعى باسقارماسى باسشىسىنىڭ مىندەتىن اتقارۋشى ءابدىراسىل جەلەۋباەۆ.
ءوڭىر شارۋالارىنىڭ الاڭسىز جۇمىس ىستەۋى ءۇشىن بارلىق جاعداي قاراستىرىلىپ جاتىر. ۇكىمەت تاراپىنان 20 مىڭ توننا ديزەل وتىنى بولىنگەن. سونداي-اق وسى جىلى ءبىرشاما القاپقا 83,1 مىڭ توننا مينەرالدى تىڭايتقىش ەنگىزۋ جوسپارلانعان. ال شارۋالارعا ارزانداتىلعان باعامەن ۇسىنىلاتىن جانار-جاعارمايدىڭ كەدەرگىسىز بەرىلۋىن ءوڭىر باسشىسى ەربول قاراشوكەەۆ جەكە باقىلاۋىنا الدى.
