«جەتىگەنشىلەر بايقاۋى بالالار اراسىندا ءجيى بولىپ ءجۇر, بىراق ەرەسەك ورىنداۋشىلار اراسىندا رەسپۋبليكا كولەمىندە ءبىرىنشى بولىپ وتكىزىپ جاتىرمىز. اۋدان اكىمدىگى جۇلدە قورىنا 1 ملن تەڭگە قارجى ءبولدى. بىلۋىمشە, كونە اسپاپ ءحىح عاسىردىڭ ورتاسىنا دەيىن جەتكەن. ودان كەيىن قولدانىستان شىعىپ قالعان. ەلىمىز تاۋەلسىزدىك العان تۇستا ەتنوگرافتاردىڭ ايتۋىمەن جەتىلدىرىلگەن ءتۇرى قايتا جاسالىپ, ۇلكەن ساحنالاردان كورىنە باستادى. ءبىزدىڭ اۋداننىڭ تۇرعىندارى جەتىگەن ءۇنىن العاش رەت 2020 جىلى ەستىدى. اۋدان اكىمىنىڭ قولداۋىمەن جەرگىلىكتى ءۇش ونەرپازىمىز الماتىعا بارىپ, قۇرمانعازى اتىنداعى ۇلتتىق كونسەرۆاتوريادا نۇرگۇل جاقىپبەكتەن ءتالىم الدى», دەيدى فەدوروۆ اۋداندىق مادەنيەت جانە تىلدەردى دامىتۋ ءبولىمىنىڭ باسشىسى دانيار سارسەنبەتوۆ.
بايقاۋ اياسىندا الماتى قالاسىنان قازىلار القاسىنىڭ ءتورايىمى رەتىندە ارنايى شاقىرتىلعان كاسىبي مامان نۇرگۇل جاقىپبەك ءوڭىر ورىنداۋشىلارىنا جەتىگەننىڭ كونە بۇراۋ ادىستەرىنەن شەبەرلىك ساعاتىن وتكىزدى.
«جەتىگەننىڭ سازدى اۋەنى تىڭداۋشىنىڭ جۇرەگىن بىردەن باۋراپ الاتىن سەبەبى – بۇل اسپاپ ۇلتتىق جادىمىزدا قالعىپ جاتقان ەسكى اۋەندەردى وياتادى, حالىقتىڭ باي تاريحىنان سىر شەرتەدى. بايقاۋعا قاتىسقان ۇمىتكەرلەردىڭ ءبارى شەت وڭىردە جەتىگەندى ناسيحاتتاپ, دارىپتەپ جۇرگەن ساناۋلى ونەرپازداردىڭ قاتارىنان», دەيدى نۇرگۇل جاقىپبەك.
سايىس قورىتىندىسىندا ونەرپازدار بايقاۋىنىڭ باس جۇلدەسىن فەدوروۆ اۋداندىق مادەنيەت ءۇيىنىڭ قىزمەتكەرى, بەساسپاپ ونەرپاز فاريزا جولامانوۆا جەڭىپ الدى. ال مەڭدىقارا اۋدانىنان كەلگەن گۇلجان نۇرمۇحامبەتوۆا ءبىرىنشى ورىننان كورىندى. سارىكول اۋدانىنىڭ وكىلى رىسجان بىرجانقىزى مەن التىنسارين اۋدانىنىڭ ونەرپازى التىناي تولەگەن ەكىنشى, ءۇشىنشى ورىنداردى ءوزارا بولىسسە, فەدوروۆ اۋدانىنان قاتىسقان دينارا مىرزاحمەتوۆا وبلىستىق كوركەمونەرپازدار ورتالىعىنىڭ ارنايى سىيلىعىنا يە بولدى.
ۇيىمداستىرۋشىلار كەلەسى جىلى جەتىگەنشىلەردىڭ رەسپۋبليكالىق بايقاۋىن ۇيىمداستىرۋدى كوزدەپ وتىر.
قوستاناي وبلىسى
