الىپتى باعىندىرعان ارۋدىڭ كەنىشكە جۇمىسقا كەلۋى دە كەزدەيسوق. «رۋدنىي سۋ قۇبىرى» سەرىكتەستىگىندە سۋسورعىش قۇرىلعىنىڭ ءماشينيسى بولىپ جۇمىس ىستەپ جۇرگەن كەزىندە ليۋبوۆ قولى بوس كەزدە تاكسي قىزمەتىنە شىعىپ, قوسىمشا تابىس تاۋىپ جۇرەدى. وسىنداي ءساتتىڭ بىرىندە كولىگىنە وتىرعان جولاۋشىنىڭ ءبىرى قاشارداعى اۆتوكولىك سەرىكتەستىگىنىڭ باستىعى ماقسات قالامباەۆ بولىپ شىعادى.
«كولىك جۇرگىزۋ مانەرىم كوڭىلىنەن شىقسا كەرەك, ماقسات نۇرعالي ۇلى كەنىشتە جۇرگىزۋشى جەتپەي جاتقانىن ايتىپ, جۇمىسقا شاقىردى. ءبىر اپتادان كەيىن بارىپ, ءوتىنىش جازىپ, جۇمىسقا كىردىم. ءبىر جىل «نيۆا شەۆرولەت» اۆتوكولىگىمەن ماركشرەيدەر, گيدروتەحنيك مامانداردى كارەرگە تاسىدىم. كەنىش تۇبىندە جۇرگەن الىپ تەحنيكالارعا وسى كەزدەن باستاپ قىزىعا باستادىم. تاۋ كوشىپ كەلە جاتقانداي بولىپ كورىنەتىن الىپ تەحنيكانىڭ قاسىندا مەنىڭ «نيۆام» شىرپىنىڭ قورابىنداي عانا بولىپ قالادى. ەكىنشى جىلى «كاماز-33081» كولىگىنە اۋىستىم. ودان كەيىن رۋدنىي كورپوراتيۆتىك ۋنيۆەرسيتەتىندە «Hitachi EH-3500», «Hitachi EH-4000» اۋىر جۇك تاسىمالداعىشتارىن باسقارۋدى ۇيرەندىم», دەيدى ليۋبوۆ.
تەوريالىق ءبىلىم الىپ, ارنايى ترەناجەردەگى تاجىريبەدەن كەيىن نۇسقاۋشى ماماننىڭ باقىلاۋىمەن ەكى جارىم اي تاعىلىمدامادان وتكەن قايسار كەلىنشەك كوپتەن كوزدەگەن ماقساتىنا جەتىپ, سۋ جاڭا «Hitachi ەن 4000» اۋىر تەحنيكاسىنىڭ تىزگىنىنە وتىرادى.
«كارەر كولىگىن جۇرگىزۋ ءۇشىن, ەڭ باستىسى, تەحنيكانىڭ كولەمىن ەسكەرىپ, بۇرىلىستاردا, تار وتكەلدەردە اباي بولۋ قاجەت. كولىك وتە ۇلكەن. ءاۋ باستا قيىن بولعانىمەن, قازىر ۇيرەنىپ الدىم. جەراستى جىنىسى ءار ءتۇرلى بولادى. رۋدانى قويماعا, جارتاس پەن توپىراقتى ارنايى ۇيىندىگە اپارىپ توگەمىز. اينالانىڭ ءبارىن كابينادا تۇرعان مونيتور ارقىلى انىق كورىپ وتىرامىز. مونيتور قايدا باراتىنىمىزدى, قاي ەكسكاۆاتوردىڭ جانىنا بارىپ توقتايتىنىمىزدى دا كورسەتىپ تۇرادى. كولىكتە ەلەكترديناميكالىق تەجەۋ جۇيەسى, كرۋيزدىك باقىلاۋ قوندىرعىسى بار. قاۋىپسىزدىك ەرەجەلەرىن ساقتاي بىلسەڭ بولعانى. ەر ادامدارمەن بىرگە جۇمىس ىستەسەڭ, وزىڭە ءوزىڭ سەنىمدى بولا تۇسەسىڭ. تاياۋدا قاتارىمىزعا رادميلا ەسىمدى تاعى ءبىر ايەل كەلىپ قوسىلدى», دەيدى كارەر كولىگىنىڭ جۇرگىزۋشىسى.
كارەر جۇرگىزۋشىسى جۇمىستان تىس ۋاقىتىن ءۇي شارۋاسىنا, ەكى بالاسىنا ارنايدى. ۇلى الىشەر دە, قىزى انەل دە – وقۋ وزاتى. ليۋبوۆتىڭ ءوزى دە تاياۋدا كاسىپوداق ۇيىمىنىڭ «ەڭبەك وزاتى» توسبەلگىسىمەن ماراپاتتالدى.
«الىشەر 13 جاستا. ءۇيدىڭ جانىنداعى مەكتەپتە وقيدى. وتكەندە عانا ۇلىمنىڭ ءۇي تاپسىرماسىنا كومەكتەسىپ وتىرىپ, ەكەۋىمىز «وزاتتار وتباسى» دەگەن تاقىرىپتا ەسسە جازدىق. بالالارىم مەنى, مەن بالالارىمدى ماقتان تۇتامىن», دەيدى ليۋبوۆ باباشەۆا.
قوستاناي وبلىسى
