قوستانايدا ءبىر اي بۇرىن جوعالعان قىزدىڭ دەنەسى توبىل وزەنىنەن تابىلدى

قوستاناي. 4 مامىر. وسىدان ءبىر اي بۇرىن جوعالىپ كەتكەن 17 جاستاعى نۇرگۇل اعىباەۆانىڭ دەنەسىن ارنايى قۇرىلعان تەرگەۋ-ىزدەستىرۋ توبى توبىل وزەنىنەن تاپتى. بۇل تۋرالى egemen.kz ءتىلشىسى حابارلادى. سوت-مەديتسينالىق ساراپتاماسىنىڭ ناتيجەسى كورسەتكەندەي, قىزدىڭ دەنەسىندە ەشقانداي زورلىق-زومبىلىقتىڭ ءىزى  جوق. ول وكپەسى سۋعا تولىپ, تۇنشىعىپ ولگەن. تەرگەۋ جۇمىستارى ونىڭ سۋيتسيدتەن بولعانىن دا جوققا شىعارماي وتىر. ەسكە سالا كەتسەك, نۇرگۇل قوستاناي قالاسىندا كوللەدجدە وقىعان. قوستاناي قالاسىندا ول تۇرعان تۋىستارىنىڭ ءۇيى قىزدىڭ دەنەسى تابىلعان توبىلدىڭ يىنىنەن الىس ەمەس. ونىڭ اعاسىنىڭ  ايتۋىنا قاراعاندا, 3 ءساۋىر كۇنى ساباققا جينالعان, بىراق كوللەدجگە بارماعان, سۋمكاسى, زاتتارى ۇيدە قالعان. تەلەفونى جاۋاپ بەرمەگەن. قىزدىڭ اناسىنىڭ ايتۋىنشا, ونىڭ تەلەفونىنا تۇنگى 22.30 دەيىن قوڭىراۋ بارىپ تۇرعان, ودان كەيىن سوندىرىلگەن. پوليتسيا قىزدىڭ اتا-اناسىنا سوڭعى قوڭىراۋدى قالا تۇبىندەگى امانگەلدى  سەلوسىنداعى شامامەن ەنەرگەتيك كوشەسىنىڭ 1 ۇيىنەن جاسالعاندىعىن, سودان كەيىن بايلانىستىڭ ءۇزىلىپ كەتكەنىن جەتكىزگەن. قوستانايدا جاسوسپىرىمدەردىڭ جوعالۋى ازايماي تۇر. ءساۋىر ايىندا جوعالعان ۇل مەن قىز ءالى ىزدەستىرىلۋدە. ءنازيرا جارىمبەتوۆا. دەرەك, سۋرەت: alau.kz