بۇگىندە وبلىستىق اسسامبلەيا اياسىندا جۇمىس ىستەپ جاتقان كورەي ەتنومادەني بىرلەستىگى وسىدان 35 جىل بۇرىن قۇرىلعان. سودان بەرى اتالعان بىرلەستىك وكىلدەرى وڭىردە كوپكە ۇلگى بولارلىق تالاي يگى ىسكە مۇرىندىق بولىپ, دوستىق پەن ىنتىماقتى, بىرلىك پەن ادال ەڭبەكتى تۋ ەتىپ ۇستاپ كەلەدى.
«قازاق جەرىنە, قازاق حالقىنا العىسىمىز شەكسىز. بۇگىندە ءبىز ءوز ءتىلىمىزدى ۇيرەنۋگە تىرىسىپ, ۇلتتىق باستاۋلارىمىزعا, تاريحىمىز بەن مادەنيەتىمىزگە, سالت-داستۇرىمىزگە قايتا ءۇڭىلىپ جاتىرمىز. ەتنومادەني ورتالىقتىڭ جانىنان كورەي ءتىلىن وقىتاتىن جەكسەنبىلىك مەكتەپ جۇمىس ىستەپ جاتىر. قازىرگى جاستار كورەي ءتىلى مەن مادەنيەتىنە ىنتىق. سوندىقتان جەكسەنبىلىك مەكتەپكە كەلۋشىلەر كوپ, ونىڭ ۇستىنە مۇندا تەگىن وقىتادى. مۇنىڭ سىرتىندا, قازاقستان كورەيلەرى قاۋىمداستىعى ازىرلەگەن قازاق ءتىلىننىڭ وقۋ باعدارلاماسى بار. «Lingua قكق» دەپ اتالاتىن بۇل باعدارلاما قازاق ءتىلىن تەرەڭدەتىپ وقىتۋعا ارنالماعانىمەن, تۇرمىستىق دەڭگەيدە سويلەۋگە ۇيرەتەدى. قازاق ءتىلىن ءبىز مەكتەپتە, ۋنيۆەرسيتەتتە وقيمىز, سوزدىك قورىمىز مول, بىراق ءسوزدىڭ قوسىمشاسىن دۇرىس ايتپاي قالام با دەپ قىسىلىپ, سويلەۋگە قورقامىز. جاعداياتتىق قازاق تىلىنە وقىتاتىن ءبىزدىڭ باعدارلاما وسى قورقىنىشتى جەڭىپ, ادامدى ءارى قاراي سويلەپ كەتۋگە ۇيرەتەدى», دەيدى وبلىستىق كورەي ەتنومادەني بىرلەستىگىنىڭ جەتەكشىسى ۋليانا كيم.
بىرلەستىك وكىلدەرى ءوڭىر دامۋىنىڭ قاي سالاسىندا بولماسىن بەلسەندى. مىسالى, قوستانايدىڭ ساۋلەتىن كىرگىزىپ, اجارىن اشقان كوپقاباتتى زاماناۋي ءزاۋلىم ۇيلەردىڭ كوبىن اعايىندى كيمدەر باسقارىپ وتىرعان قۇرىلىس كومپانياسى تۇرعىزعان.
قاشاندا تياناقتى ىسىمەن, اۋىزبىرشىلىكتىڭ كۇشىمەن ەرەكشەلەنەتىن كورەي ۇلتتىق ورتالىعى تىندىرعان يگى ءىستىڭ ءبارىن تىزبەلەپ شىعۋ مۇمكىن ەمەس. الايدا بىلتىر جۇرتتى الاشاپقىن ەتكەن الاپات سۋ تاسقىنى كەزىندە قاۋىپتى جەرلەردەن ەۆاكۋاتسيالانعان تۇرعىندارعا ماتەريالدىق كومەك كورسەتىپ, ەل باسىنا تۇسكەن اۋىرتپالىقتى كوپپەن بىرگە كوتەرىسكەن ۇلتتىق بىرلەستىكتەردىڭ ىشىندەگى ەڭ بەلسەندىسى بولعانىن ايتا كەتكەن ءجون.
«بىلتىر ناۋرىزدىڭ 25–26-لارىندا وبلىستىڭ وڭتۇستىك اۋداندارىندا سۋ تاسقىنى باستالدى دەگەن سۋىت حابار جەتىسىمەن, ۇلكەن جۇك كولىگىنە شۇعىل ازىق-ت ۇلىك تيەپ جىبەردىك. ودان كەيىن جانگەلدين اۋدانىنا 6 ەلەكتر گەنەراتورىن, ەكى موتوپومپا, سابيلەرگە ارنالعان پامپەرس سياقتى سول ۋاقىتتا ناعىز كەرەك دۇنيەلەردى جونەلتتىك. كەيىن توبىل وزەنى تاسي باستادى. ءبىزدىڭ ۆولونتەرلەرىمىز قيىن ساتتە قوستانايعا كىرەتىن ۇلكەن كوپىردى امان الىپ قالۋ ءۇشىن كۇرەسىپ جاتقان 500 ادامعا پالاۋ ساتىپ الىپ, ىستىق تاماق تاسىدى. كورەي ورتالىعىنىڭ قۇرىلتايشىلارى, «بك ستروي» قۇرىلىس كومپانياسىن باسقارىپ وتىرعان اعايىندى كيمدەر توتەنشە جاعدايدان كەيىن قۇرىلعان وڭىرلىك قورعا 10 ملن تەڭگە اۋداردى», دەيدى ۋ.كيم.
كورەي ورتالىعى قازاقستان مەن وڭتۇستىك كورەيا ەلىنىڭ اراسىنداعى ەكى جاقتى دوستىق, ارىپتەستىك قارىم-قاتىناستىڭ نىعايۋىنا دا كوپ سەپتىگىن تيگىزىپ كەلەدى. بۇگىندە وسى باعىتتا جاسالعان مەموراندۋمدار اياسىندا كوپتەگەن يگى جوبا جۇزەگە اسىرىلىپ جاتىر.
ۋليانانىڭ ايتۋىنشا, وڭتۇستىك كورەيادا مەملەكەتتىك ءبىلىم گرانتىن الۋ وتە قيىن, ءتىپتى, مۇنداي يگىلىككە جەرگىلىكتى كورەيلەردىڭ وزدەرى دە وڭايلىقپەن قول جەتكىزە المايتىن كورىنەدى. الايدا سەۋل, پۋسان ۋنيۆەرسيتەتتەرى جىل سايىن قازاقستاندا تۇرىپ جاتقان كورەي جاستارىنا تەگىن مەملەكەتتىك ءبىلىم گرانتتارىن ءبولىپ وتىرادى. مۇنىڭ سىرتىندا, ەكى ەل اراسىنداعى حالىقارالىق كەلىسىمشارت اياسىندا ءبىزدىڭ حيرۋرگ دارىگەر, حيرۋرگ مەدبيكەلەر جىل سايىن ىرىكتەۋدەن ءوتىپ, سەۋل كلينيكالارىندا تەگىن تاجىريبەدەن ءوتىپ كەلەدى. جەرگىلىكتى كورەيلەر وڭتۇستىك كوريادان ءارتۇرلى سالاداعى جاڭا تەحنولوگيالاردى اكەلىپ وسى جەردە كاسىپەن شۇعىلدانىپ جاتىر. ونىڭ ىشىندە «اقىلدى» قۇرىلعىلارى بار جىلىجاي اكەلىپ, جەمىس-جيدەك, كوكونىس ءوسىرىپ جاتقاندار كوپ.
«بۇرىن اعايىندارىمىز, كوبىنە, جاستار, تاريحي وتانىمىزعا قايتا باستاعاندا, قازاقستان كورەيلەرىنىڭ كەلەشەگىنە الاڭداۋشى ەدىك. قازىر بۇل ۇدەرىس سايابىرسىدى. ول جاقتا جاڭا تەحنولوگيانى, جاڭا ادىستەردى مەڭگەرگەن جاستاردىڭ ءبىرازى وڭىرگە قايتىپ ورالىپ, وسى جەردە كاسىپ اشىپ, ەڭبەك ەتىپ جاتىر. تاعدىردىڭ تالكەگىمەن قونىس اۋدارعان ءتۇرلى ەتنوس وكىلدەرىن قازاق حالقى باۋىرىنا باسىپ, قامقورلىق تانىتتى. العىس ايتۋ كۇنى – وسى توپىراقتى مەكەندەگەن سان ۇلتتىڭ باسىنان وتكەن قاسىرەت پەن اۋىرتپالىقتان ساباق الاتىن كۇن, ىقىلاس پەن مەيىرىمگە تاعزىم ەتەتىن كۇن», دەيدى بىرلەستىك جەتەكشىسى.
قوستاناي وبلىسى
