ۇلتتىق قاۋىپسىزدىك كوميتەتىنىڭ توراعاسى تاعايىندالدى

استانا. 4 مامىر. مەملەكەت باسشىسىنىڭ جارلىعىمەن نۇرتاي ابىقاەۆ قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى بولىپ قايتا تاعايىندالدى. بۇل تۋرالى akorda.kz حابارلادى. نۇرتاي ابىقاەۆ 1947 جىلى 15 مامىردا الماتى وبلىسى, جامبىل اۋدانى, جامبىل اۋىلىندا تۋعان. رەسەيدىڭ سۆەردلوۆسك قالاسىنداعى (قازىرگى ەكاتەرينبۋرگ) ۋرالسك پوليتەحنيكالىق ينستيتۋتىن, الماتى جوعارى پارتيا مەكتەبىن, رەسەي فەدەراتسياسى پرەزيدەنتى جانىنداعى رەسەي مەملەكەتتىك قىزمەت اكادەمياسىن بىتىرگەن. ەكونوميكا عىلىمدارىنىڭ دوكتورى, رەسەي جاراتىلىستانۋ عىلىمدارى اكادەمياسىنىڭ اكادەميگى. ديپلوماتيالىق رانگى – توتەنشە جانە وكىلەتتى ەلشى. اسكەري اتاعى – گەنەرال-مايور. قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ قۇرمەتتى قىزمەتكەرى. قازاقستان رەسپۋبليكاسى قاۋىپسىزدىك كەڭەسىنىڭ مۇشەسى. ۇلتتىق قاۋىپسىزدىك كوميتەتىنىڭ توراعاسى قىزمەتىن 2010 جىلدىڭ 23 تامىزىنان بەرى اتقارىپ كەلەدى. ەلامان قوڭىر. دەرەك: akorda.kz. سۋرەت: knb.kz.