فوتو: ontustiktv.kz
تۇزەتۋدە زاڭسىز سۋ الۋ, سۋ وبەكتىلەرىندە, سۋ قورعاۋ ايماقتارى مەن بەلدەۋلەرىندە قۇرىلىس سالۋ, سۋدى پايدالانۋ شارتتارى مەن رەجيمىن بۇزۋ, سۋ وبەكتىلەرىنىڭ ارنالارى مەن شەكارالارىن وزگەرتۋ جانە باسقا دا زاڭ بۇزۋشىلىقتار ءۇشىن جاۋاپكەرشىلىكتى كۇشەيتۋ كوزدەلگەن.
زاڭعا گيدروتەحنيكالىق قۇرىلىسجايلاردىڭ قاتتى توزۋىنان بولۋى ىقتيمال اۆاريالاردى ۋاقتىلى انىقتاۋ جانە جويۋعا باعىتتالعان تۇزەتۋلەر دە ەنگىزىلدى. ياعني, وسىنداي قۇرىلىسجايلارعا تەحنيكالىق زەرتتەپ-قاراۋ جۇرگىزبەگەنى نەمەسە دۇرىس جۇرگىزبەگەنى ءۇشىن, سونداي-اق ولاردى قاۋىپسىزدىك دەكلاراتسياسىنسىز پايدالانعانى ءۇشىن جاۋاپكەرشىلىك قاراستىرىلادى.
ەكى كودەكستە جەر استى سۋلارى رەسۋرستارىن رەتتەۋ جانە پايدالانۋ تۋرالى بىركەلكى تەرمينولوگيا قولدانۋعا قاتىستى دا تۇزەتۋلەر ۇسىنىلدى. مىسالى, كاسپي تەڭىزىنىڭ قازاقستاندىق سەكتورىندا كومىرسۋتەكتەردى بارلاۋ جانە ءوندىرۋ جونىندەگى وپەراتسيالاردى جۇرگىزۋگە سالىنعان تىيىمدى الىپ تاستاۋ; ارال ءوڭىرىنىڭ ەرەكشە ەكولوگيالىق مارتەبەسىن ەسكەرە وتىرىپ, ارال تەڭىزى شەگىندە جەر قويناۋىن پايدالانۋ جونىندەگى وپەراتسيالاردى جۇرگىزۋگە تىيىم سالىنادى.
دەپۋتاتتار تۇزەتۋلەردى قاراۋ بارىسىندا جەراستى سۋلارىن باسقارۋعا قاتىستى مەملەكەتتىك ورگاندار اراسىنداعى وكىلەتتىكتەردىڭ ارا-جىگىن اجىراتۋ بويىنشا ۇكىمەت ەنگىزگەن قوسىمشا تۇزەتۋلەردى قولدادى. اتاپ ايتقاندا, مەملەكەت باسشىسىنىڭ ۇلتتىق گيدروگەولوگيالىق قىزمەتتى قايتا قۇرۋ تۋرالى تاپسىرمالارىن ىسكە اسىرۋ ءۇشىن قاراۋسىز قالعان, وزدىگىنەن توگىلەتىن اۆاريالىق گيدروگەولوگيالىق ۇڭعىمالاردى جويۋ مەن كونسەرۆاتسيالاۋ جانە جەراستى سۋلارىن ىزدەۋ جۇمىستارىن جۇرگىزۋ جونىندەگى فۋنكتسيالار سۋ رەسۋرستارى جانە يرريگاتسيا مينيسترلىگىنىڭ قاراماعىنا بەرىلدى.
