«ايگىلى تاريحشىنىڭ مەرەيتويىنا ورايلاستىرىلعان بۇل فورۋمنىڭ ماقساتى – ەلىمىزدىڭ مەكتەپتەرىندە تاريح ءپانىن وقىتۋدىڭ وزەكتى ماسەلەلەرىن تالقىلاۋ, تاريح ءپانى مۇعالىمدەرىنىڭ بىرىڭعاي قاۋىمداستىعىن قۇرۋ ەدى» دەيدى وسى ءىس-شارانى ۇيىمداستىرۋشىلاردىڭ ءبىرى, باتىس قازاقستان وبلىستىق ءبىلىم باسقارماسى ادىستەمەلىك ورتالىعى تاريح ءپانىنىڭ ادىسكەرى دينارا جەكسەنعاليقىزى. جيىن سوڭىنان ايتىلىپ جاتقان لەبىز-پىكىرلەرگە قاراعاندا, بۇل ماقسات ورىندالعان سياقتى.
– مەن استانا قالاسىنان كەلدىم. كەڭەس كەزىندە العاشقى عىلىمي جۇمىسىمدى ەرمۇحان بەكماحان ۇلىنىڭ ءومىرى مەن شىعارماشىلىعىنا ارناعانىم ءۇشىن كەدەرگى, قىساستىق كورگەنىم ەسىمدە. كورنەكتى تاريحشىنىڭ ورال پەداگوگيكالىق ۋنيۆەرسيتەتىندە ءدارىس وقىعانىن ەستىپ جاتىرمىن. جالپى, وسى فورۋمدا باتىس قازاقستاننىڭ باي تاريحىنا كۋا بولدىق, كوپ دەرەكتى ەستىپ-ءبىلىپ, تاجىريبە الدىق, – دەيدى استانا قالاسى ادىستەمەلىك ورتالىعىنىڭ تاريح ءپانىنىڭ ادىسكەرى جانار تولەۋعاسىمقىزى.
فورۋمعا استانادان بولەك, اقتوبە, اتىراۋ, قىزىلوردا, ماڭعىستاۋ وبلىستارىنان, باتىس قازاقستان وبلىستارىنىڭ بارلىق اۋدانىنان تاريح ءپانى مۇعالىمدەرى مەن ادىسكەرلەر قاتىستى. التى بولىمنەن تۇرعان فورۋمنىڭ العاشقى بولىگىندە ورالدىق عالىمدار, تاريح عىلىمدارىنىڭ كانديداتى باقتىلى بورانباەۆا مەن ارحەولوگ يانا لۇقپانوۆا ءدارىس وقىپ, وتاندىق تاريحتىڭ تىڭ دەرەكتەرى مەن عىلىمي جاڭالىقتارىمەن ءبولىستى. «Bootcamp» اتتى بولىمدە تاجىريبەلى مۇعالىمدەر وزدەرىنىڭ يننوۆاتسيالىق ادىستەرى مەن وقىتۋ تاجىريبەلەرىن ورتاعا سالدى. پەداگوگتەر جاڭارتىلعان ءبىلىم بەرۋ مازمۇنى اياسىندا تاريح ءپانىن وقىتۋدىڭ زاماناۋي ادىستەرىن تالقىلادى. ال «Creative Gallery» ادىستەمەلىك كورمەسىنە ورال قالاسى, ءبورلى, قاراتوبە, شىڭعىرلاۋ اۋداندارىنان كەلگەن تاريح ءپانى مۇعالىمدەرى وزدەرىنىڭ اۆتورلىق لايفحاكتارىن, ءتيىمدى ادىستەمەلىك قۇرالدارىن قويىپ, فورۋم قاتىسۋشىلارىنا تانىستىردى. تسيفرلىق ينتەللەكت كارتالار ارقىلى ولكە تاريحىن ۆيزۋالدى زەرتتەۋ, تاريحي فوتوسۋرەتتەر مەن كورنەكىلىكتەردى پايدالانۋ, كارتوگرافيالىق ونىمدەردى تاريح ساباعىندا قولدانۋ سەكىلدى ناقتى كەڭەستەر ءار مۇعالىمگە پايدالى بولعانى انىق. «Workshop&Pitching» اتتى ادىستەمەلىك الاڭدا ۇستازداردىڭ شەبەرلىك ساعاتى ۇيىمداستىرىلىپ, وقىتۋداعى قۇندىلىقتار, فۋنكتسيونالدىق ساۋاتتىلىقتى دامىتۋ جولدارى جانە جاساندى ينتەللەكتىنىڭ تاريح ساباعىندا قولدانىلۋ مۇمكىندىگى تالقىلاندى. مۇعالىمدەر وزدەرىنىڭ ۇزدىك تاجىريبەلەرىن ۇسىنىپ, پىكىر الماستى. مۇندا تاريح ءپانىن وقىتۋداعى ۇلتتىق قۇندىلىقتىڭ ماڭىزىنا باسا ءمان بەرىلدى.
جيىننىڭ ەكىنشى كۇنى فورۋم قوناقتارى وڭىردەگى ولكەتانۋ جانە زەرتتەۋ باعىتتارىمەن تانىستى. «Tarikh Talks» الاڭىندا باتىسقازاقستاندىق ولكەتانۋشىلار ايبولات قۇرىمباەۆ پەن احمەديار باتىرحانوۆ ءسوز الىپ, ينتەرنەت سايتتارىن تاريحي-ولكەتانۋ جۇمىستارىندا پايدالانۋ مۇمكىندىكتەرى تۋرالى, ەكىنشى دۇنيەجۇزىلىك سوعىستاعى سوعىس تۇتقىندارىنىڭ دەرەگىن رەسەي قورعانىس مينيسترلىگىنىڭ ينتەرنەت رەسۋرستارىنان ىزدەۋ جونىندە تاجىريبەلەرىمەن ءبولىستى. فورۋم كوماندالىق تاريحي «Quiz» ويىنىمەن قورىتىندىلاندى. بۇل سايىس مۇعالىمدەردىڭ تانىمدىق قابىلەتىن شىڭداپ, تاريحتى وقىتۋدا ويىن ادىستەرىن قولدانۋدىڭ تيىمدىلىگىن كورسەتتى.
تاريحي كۋيزدىڭ قورىتىندىسى بويىنشا قىزىلوردا, اتىراۋ جانە باتىس قازاقستان وبلىستارىنىڭ پەداگوگتەرىنەن قۇرالعان توپ جەڭىمپاز اتاندى. بۇكىل قاتىسۋشىلارعا سەرتيفيكات پەن العىسحات تابىس ەتىلدى.
باتىس قازاقستان وبلىسى
