ءوڭىردىڭ سەگىز جۇيرىگى مەن ەلىمىزدىڭ ءار قيىرىنان كەلگەن سەگىز اقىن سىنعا تۇسەتىن فورمات بيىل ءبىرشاما وزگەرىپتى. بۇل جولى اقىن اتىنداعى وڭىردەن ءتورت ۇزدىك ايتىسكەر توپقا تۇسسە, باسقا وبلىستاردان ون اقىن جىر الامانىندا باق سىناۋعا مۇمكىندىك الدى. جەتى جۇپقا جىكتەلگەن ايتىس اقىندارىنىڭ ونەرىن ەسىمى ەلىمىزگە بەلگىلى قالامگەرلەر باعالادى. ەلدىك پەن بىرلىكتى, تاتۋلىق پەن كىسىلىكتى جىرلاعان جىر جۇيرىكتەرىنىڭ ءسوز سايىسى ادەتتەگىدەي ادەمى ازىلدەرمەن ادىپتەلگەنى كورەرمەن ءۇشىن ۇلكەن ولجا بولدى.
بالاساعۇن اتىنداعى ورتالىق كونتسەرت زالىندا شىمىلدىعى تۇرىلگەن ايتىستى شىعىستىڭ ەكى اقىنى رۇستەم قايىرتاي مەن سەرىك قۋانعان باستاپ بەردى. شىعىس قازاقستان وبلىسىنان كەلگەن سەرىك اۋليەاتا ءوڭىرىنىڭ تەرەڭ تاريحى مەن بۇگىنىن شىرايلى شۋماقتارىمەن شىنايى جىرلاسا, تالاي ايتىستا توپ جارعان اباي وبلىسىنىڭ اقىنى رۇستەم قايىرتاي دا قارسىلاسىنان ءبىر مىسقال كەم تۇسكەن جوق. جايىقتىڭ جاعاسىنان كەلگەن قازاقتىڭ ەركە قىزى جانسايا مۋسينا مەن جامبىلدىق اسەت دۇيسەباەۆ اراسىنداعى ءسوز سايىسى ادەمى ازىلمەن ادىپتەلىپ, كوپشىلىكتىڭ كوڭىلىن كوتەردى.
جالپى العاندا, جەتى جۇپتا سىنعا تۇسكەن ايتىسكەرلەردىڭ قاي-قايسىسى بولسىن جاقسى دايىندىقپەن كەلگەنى بايقالىپ تۇردى. جىلتىر سوزدەن جىراق بولعان اقىنداردىڭ ءوزارا ءسوز قاعىستىرۋى, جىر الىبى جامبىلدىڭ بەينەسىن, ەڭبەگى مەن ەرلىگىن قارا ولەڭ ولشەمىنە سىيدىرۋعا تىرىسۋى تىڭدارماننىڭ جۇرەگىنە جەتتى دەۋگە بولادى.
جىر دوداسىنىڭ قورىتىندىسىندا ءسوز العان قازىلار القاسىنىڭ توراعاسى ءجۇرسىن ەرمان اۋليەاتا تورىندە ءداستۇرلى تۇردە ۇيىمداستىرىلىپ كەلە جاتقان «جامبىل – مەنىڭ جاي اتىم, حالىق – مەنىڭ شىن اتىم» اتتى رەسپۋبليكالىق ايتىستىڭ جوعارى دەڭگەيدە وتكەنىن اتاپ ءوتتى.
«تاراز تورىندە جوعارى دەڭگەيدە ۇيىمداستىرىلعان جىر دوداسىنا كۋا بولدىق. ايتىسقا قاتىسقان اقىندار جىر الىبى تۋرالى تاماشا شۋماقتارىمەن دارالانعانىن ايتا كەتكەن ءجون. ءبىر سوزبەن ايتقاندا, جۇيرىك اقىندارىمىز تاقىرىپتى بارىنشا اشۋعا تىرىسىپ باقتى. رەسپۋبليكالىق ايتىستى تۇراقتى تۇردە وتكىزىپ كەلە جاتقان جەرگىلىكتى اتقارۋشى بيلىككە العىس ايتامىز. قازاقتىڭ قاسيەتتى ونەرى ماڭگى جاساسىن», دەدى ول ءوز ويىن تۇيىندەپ.
اۋليەاتا تورىندە وتكەن الامان ايتىستىڭ قورىتىندىسىندا باس جۇلدە (1 ملن 700 مىڭ تەڭگە) شىعىس قازاقستان وبلىسىنىڭ اقىنى سەرىك قۋانعانعا بۇيىردى. ال جۇلدەلى ءبىرىنشى ورىنعا سىر ءوڭىرىنىڭ جۇيرىگى, بەلگىلى ايتىسكەر مۇحتار نيازوۆ لايىق دەپ تانىلسا, باتىس قازاقستان وڭىرىنەن كەلگەن جانسايا مۋسينا ەكىنشى, استانالىق مۇحتار قونارباەۆ ءۇشىنشى ورىن يەلەندى. بۇعان قوسا ءتورت ارنايى جۇلدە ءوز يەسىن تاپتى. باۋىرجان مومىش ۇلى اتىنداعى جۇلدە الماتىلىق شۇعايىپ سەزىمحانعا, ۇلبيكە اقىن اتىنداعى جۇلدە جامبىلدىق اسەت دۇيسەباەۆقا, كەنەن ازىرباەۆ اتىنداعى جۇلدە ابايلىق رۇستەم قايىرتايعا, ازىمبەك جانقۇليەۆ اتىنداعى جۇلدە پاۆلودارلىق راۋان قايدارعا بۇيىردى.
رەسپۋبليكالىق ايتىستىڭ قورىتىندىسىندا ءسوز سويلەگەن وبلىس اكىمىنىڭ ءبىرىنشى ورىنباسارى نۇرجان كالەندەروۆ تاراز تورىندە تاماشا ونەر كورسەتكەن ايتىسكەر اقىندارعا, ولاردىڭ ونەرىنە باعا بەرگەن قازىلار القاسىنىڭ مۇشەلەرىنە العىس ايتتى.
«ون جىلدان استام ۋاقىت بويى تۇراقتى تۇردە ۇيىمداستىرىلىپ كەلە جاتقان جىر الامانى كوپشىلىكتىڭ كوڭىلىنەن شىقتى دەگەن ويدامىز. ەلىمىزدىڭ ءار قيىرىنان كەلگەن تانىمال اقىنداردىڭ تاماشا شۋماقتارىنا جەرگىلىكتى كورەرمەن ءدان ريزا بولىپ, قوشەمەت كورسەتكەنىن كوز كوردى. سول ءۇشىن وسى ايتىسقا ارنايى كەلگەن جۇيرىكتەرىمىزگە شىن جۇرەكتەن ريزاشىلىعىمدى بىلدىرەمىن. اتادان بالاعا ميراس بولىپ جالعاسقان قازاقتىڭ قاسيەتتى ونەرى جاساي بەرسىن», دەدى ول.
جامبىل وبلىسى
