نەسيەنىڭ تولەم مەرزىمىن كەيىنگە شەگەرۋ دەگەنىمىز نە؟
بۇل نەسيە الۋشىنى تولەم جاساۋدان ۋاقىتشا بوساتۋ. بىراق ول قارىزدى كەشىرۋ ەمەس, تەك تولەمدەردى كەيىنگە قالدىرۋ ەكەنىن ەسكەرۋ قاجەت. كەيىن بانك نەسيەنىڭ مەرزىمىن ۇزارتۋى نەمەسە تولەمدەردى كوبەيتۋى مۇمكىن.
ەگەر مەرزىمىن كەيىنگە شەگەرۋ ءراسىمى رەسمي تۇردە كەلىسىلىپ, شارتتىڭ تالاپتارى ورىندالسا, بۇل نەسيە تاريحىنا تەرىس اسەر ەتپەيدى.
تولەم مەرزىمىن كەيىنگە شەگەرۋدى كىم راسىمدەي الادى؟
بانك وتىنىشتەردى جەكە تارتىپپەن قارايدى. كوبىنەسە, وڭ شەشىم كەلەسى جاعدايلاردا قابىلدانادى:
- ۋاقىتشا ەڭبەككە جارامسىزدىق (سىرقاتتانۋ سالدارىنان);
- جۇمىستان قىسقارۋ نەمەسە جالاقىنىڭ تومەندەۋى;
- وتباسى مۇشەلەرىنىڭ سانىنىڭ ارتۋى (مىسالى, بالا تۋ);
- فورس-ماجورلىق جاعدايلار ء(ورت, سۋ تاسقىنى جانە ت.ب.).
2024 جىلدان باستاپ مەرزىمدى اسكەري قىزمەتشىلەرگە نەسيە بويىنشا مەرزىمىن كەيىنگە شەگەرۋ اۆتوماتتى تۇردە بەرىلەدى – ءوتىنىش بەرۋدىڭ قاجەتى جوق. بۇل تەك قىزمەت ەتۋ كەزەڭىن عانا ەمەس, ودان كەيىنگى 60 كۇندى دە قامتيدى. سونداي-اق, وسى ۋاقىت ىشىندە پايىزدار مەن ايىپپۇلدار ەسەپتەلمەيدى.
مەرزىمىن كەيىنگە شەگەرۋدى قالاي راسىمدەۋگە بولادى؟
نەسيە بەرگەن ۇيىمعا جۇگىنۋ
ءوتىنىشتى بانككە نەمەسە ميكروقارجى ۇيىمىنا (مقۇ) كەڭسەدە, ءموبيلدى قوسىمشادا نەمەسە ەلەكتروندىق پوشتا ارقىلى جىبەرۋگە بولادى. نەعۇرلىم ەرتە حابارلاسساڭىز, شەشىم قابىلداۋ ىقتيمالدىعى سوعۇرلىم جوعارى.
قۇجاتتاردى دايىنداۋ
قارجىلىق قيىندىقتاردى راستايتىن قۇجاتتاردى ۇسىنۋ قاجەت:
- جۇمىستان بوساتۋ تۋرالى بۇيرىق نەمەسە قىسقارتۋ تۋرالى انىقتاما;
- مەديتسينالىق انىقتامالار;
- جالاقىنىڭ تومەندەگەنىن راستايتىن قۇجاتتار;
- بالا تۋ تۋرالى كۋالىك (ەگەر وتباسى مۇشەلەرىنىڭ سانى ارتسا).
شەشىمدى كۇتۋ
بانك نەمەسە مقۇ ءوتىنىشتى 15 جۇمىس كۇنى ىشىندە قارايدى. مۇمكىن نۇسقالار:
- مەرزىمىن كەيىنگە شەگەرۋدى ماقۇلداۋ;
- باس تارتۋ (سەبەبى كورسەتىلەدى);
- باسقا نۇسقانى ۇسىنۋ (قايتا قۇرىلىمداۋ, پايىزدىق مولشەرلەمەنى تومەندەتۋ جانە ت.ب.).
ەگەر نەگىزسىز باس تارتسا, بانك ومبۋدسمانىنا (بانكتەر ءۇشىن) نەمەسە ميكروقارجى ومبۋدسمانىنا (مقۇ ءۇشىن) جۇگىنۋگە بولادى. ەگەر ولار دا كومەكتەسە الماسا, قارجى نارىعىن رەتتەۋ جانە دامىتۋ اگەنتتىگىنە شاعىمدانۋعا بولادى.
ماڭىزدى ەسكەرتۋ:
- مەرزىمىن كەيىنگە شەگەرۋ ەڭ كوپ دەگەندە 6 ايعا بەرىلەدى;
- مەرزىمىن كەيىنگە شەگەرۋ ۋاقىتى ارتقان سايىن, ارتىق تولەم سوماسى دا كوبەيەدى;
- قارىز مەرزىمىن كەيىنگە قالدىرۋ تۋرالى ءوتىنىشتى قارىز مەرزىمى ءوتىپ كەتپەي تۇرىپ بەرۋ كەرەك.
