جەرگىلىكتى حالىقپەن توننىڭ ىشكى باۋىنداي ارالاسىپ كەتكەن دۇنگەن جۇرتىنىڭ ىشىندە قازاقتىڭ ءداستۇرىن بەرىك ۇستاناتىندار دا جەتكىلىكتى. ءتىپتى ۇلىستىڭ ۇلى كۇنى ناۋرىز مەرەكەسىن قازاقتارمەن بىرگە تويلاپ جاتقاندارىن دا سان مارتە كورگەنبىز. ولاردىڭ قاتارىندا قازاق ءتىلىن ەركىن مەڭگەرگەن ازاماتتار بارشىلىق. دۇنگەن اۋىلدارىنداعى قازاق مەكتەپتەرىندە مەملەكەتتىك تىلدەن ساباق بەرىپ جۇرگەن ۇستازداردىڭ ايتۋىنشا, جاسوسپىرىمدەردىڭ تالابى مەن ىنتاسى زور. ءتىپتى قازاق ءتىلىن قازاقتاردان ءبىر مىسقال كەم بىلمەيتىندەرى دە جەتكىلىكتى.
ەكى بىردەي جوعارى وقۋ ورنىن بىتىرگەن ۆانگار ۆوينتسە مەملەكەتتىك ءتىلدى ەركىن مەڭگەرگەن. ارا-تۇرا قازاقتىڭ ماقالدارىن قوسىپ ءسوز ساپتاعاندا, ونىڭ تەرەڭدىگىنە ءتانتى بولاسىڭ. بىلگەنىن بالالارعا ۇيرەتۋدەن جالىقپايتىن ول قازىرگى كەزدە سورتوبە اۋىلىنداعى مەكتەپتە قازاق ءتىلى جانە ادەبيەتى ءپانىنىڭ مۇعالىمى بولىپ ەڭبەك ەتىپ ءجۇر.
«اۋەلى شىمكەنت قالاسىنداعى قازاق-اراب ۋنيۆەرسيتەتىندە جوعارى ءبىلىم الدىم. اراب ءتىلى مۇعالىمى جانە ءدىنتانۋشى ماماندىعى بويىنشا جوعارى وقۋدى اياقتاعان سوڭ, تاعى دا وقۋعا ءتۇستىم. بۇرىنعى تاراز مەملەكەتتىك پەداگوگيكالىق ينستيتۋتىندا قازاق ءتىلى مەن ادەبيەتى ءپانىنىڭ مۇعالىمى ماماندىعى بويىنشا ەكىنشى جوعارى وقۋ ورنىن اياقتادىم. مەملەكەتتىك ءتىلدى ءبىر كىسىدەي مەڭگەرگەننەن كەيىن پەداگوگ بولۋعا بەت بۇردىم. اۋىل جاستارىنا قازاق ءتىلىن ۇيرەتۋدى ءوزىمنىڭ باستى بورىشىم دەپ ەسەپتەدىم. ويتكەنى مەملەكەتتىك ءتىلدى ءبىلۋ – ارقايسىسىمىزدىڭ پارىزىمىز», دەيدى ۆ.ۆوينتسە.
اۋىلدان الىستاماعان ازامات قازىر سورتوبە اۋىلىنداعى №16 ميحايل لەرمونتوۆ اتىنداعى ورتا مەكتەپتە ەڭبەك ەتىپ ءجۇر. ۆانگاردىڭ ايتۋىنشا, اۋىلدا ءتورت مەكتەپ بار بولسا, ءبىلىم ورداسىنىڭ ءبىرى – تازا قازاق مەكتەبى. مۇندا دۇنگەن ۇلتىنىڭ بالالارى قازاق تىلىندە ءبىلىم الىپ ءجۇر. ال قالعان ۇشەۋى ارالاس مەكتەپتەر ساناتىنا جاتادى. م.لەرمونتوۆ اتىنداعى ورتا مەكتەپتە 1 134 وقۋشى بار. ولاردىڭ بارلىعى مەملەكەتتىك ءتىلدى مەڭگەرۋگە دەن قويعان.
«سورتوبەلىك بالالاردىڭ قازاق ءتىلىن مەڭگەرۋگە دەگەن ىنتاسى زور. جەرگىلىكتى جاسوسپىرىمدەرمەن جۇمىس ىستەۋ مەنى قاناتتاندىرادى, شابىتتاندىرادى. ولاردىڭ زەيىنىن اشۋ ءۇشىن قولدان كەلگەنشە جاڭاشىلدىقپەن جۇمىس ىستەپ جاتىرمىن. راسىندا, قازاق ءتىلىن ءبىلۋ, مەڭگەرۋ – ەلگە, مەملەكەتكە دەگەن قۇرمەت. ء«بىر ءتىل بىلسەڭ – ءبىر ادامسىڭ, ەكى ءتىل بىلسەڭ – ەكى ادامسىڭ» دەگەن ءسوز – مەنىڭ ومىرلىك ۇستانىمىم», دەيدى كەيىپكەرىمىز.
دۇنگەن ۇلتىنىڭ بالالارىنا قازاق تىلىنەن ساباق بەرىپ جۇرگەن ۆانگار ۆوينتسەنىڭ ءتورت بالاسى دا مەملەكەتتىك ءتىلدى جاتىق مەڭگەرگەن. اكەسىنىڭ ىزدەنىمپادىعىنا ءتانتى بولىپ وسكەن ولار قاي كەزدە دە ءبىلىمىن جەتىلدىرۋدى باستى ماقساتى دەپ سانايدى.
ء«بىز ءۇشىن – العىس ايتۋ كۇنىنىڭ ءمانى زور دەۋگە بولادى. قاي كەزدە دە باۋىرمالدىعىمەن باۋرايتىن جەرگىلىكتى حالىققا دەگەن ريزاشىلىعىمىز شەكسىز. بىرلىگى مىعىم ەلدى جاۋ دا, داۋ دا المايدى. سوندىقتان دا جاراتقان ىنتىماعىمىزدان ايىرماسىن دەگەن تىلەك كوكەيدە اتويلاپ تۇرادى. تاتۋلىقتى تۋ ەتكەن مەملەكەتىمىزدىڭ باعىندىرار بيىگى مەن الار اسۋى الدا ەكەنىنە ەش كۇمان جوق. قاي كەزدە قولدان كەلگەنشە قولداۋ كورسەتەتىن قازاق حالقىنا العىستان باسقا ايتارىمىز جوق», دەيدى ۆ.ۆوينتسە.
جامبىل وبلىسى,
قورداي اۋدانى,
سورتوبە اۋىلى
