بيىل پاۆلودارداعى ۋسولكا شاعىن اۋدانىندا ەكوپاركتىڭ قۇرىلىسى باستالادى. ۋسولكا وزەنىنىڭ جاعاسىندا ورنالاسقان توعاي اراسىن كۇن جىلى مەزگىلدە تەرىس ءومىر سالتىن ۇستاناتىندار, قاڭعىباستار جايلاپ, ۇنەمى كۇل-قوقىس شاشىلىپ جاتاتىن. ەكولوگتەردىڭ دابىل قاعۋىمەن پارك جوباسى قابىلدانىپ, ەندى جۇرتشىلىق ونىڭ تەز ارادا جۇزەگە اسۋىن اسىعا كۇتىپ وتىر.
– بيىل وبلىس اكىمىنىڭ تاپسىرماسى بويىنشا اۋقىمدى جوبا – ۋسولكا شاعىن اۋدانىندا ەكوپارك سالۋ جۇمىستارىن باستاعالى وتىرمىز. قالانى ارالاۋ بارىسىندا ەكوپارك سالىناتىن اۋماقتى تەكسەرىپ شىقتىم. الدا قولعا الىناتىن جۇمىستار تۋرالى باياندامالارىن تىڭدادىم. مەردىگەرگە قويىلاتىن نەگىزگى تالاپ – تابيعاتقا بارىنشا از اسەر ەتۋ, ەكولوگيالىق ماتەريالداردى پايدالانۋ. جالپى العاندا, شامامەن الپىس گەكتاردى قۇرايتىن اۋماقتا قۇرىلىس-مونتاج جۇمىستارىن باستاماس بۇرىن, سۋ باسۋدىڭ الدىن الۋ ماقساتىندا ۇزىندىعى 2,2 كم بولاتىن دامبانى نىعايتۋ قاجەت. بۇل جۇمىستارعا اقپان ايىنىڭ سوڭعى ونكۇندىگىندە كىرىسىپ, ەرتىس وزەنىنىڭ سۋى تاسىعانعا دەيىن اياقتاۋدى تاپسىردىم, –دەدى پاۆلودار قالاسىنىڭ اكىمى حاسار حابىلبەكوۆ.
پاركتە شامامەن 30 گەكتارداي كوگال جابىنى, 10 سۋلاندىرۋ جۇيەسى بولادى. جايلى ورىندىقتار, جاياۋ جۇرگىنشىلەر جولى, بالالارعا ارنالعان ويىن الاڭدارى, انا مەن بالا بولمەسى, دارەتحانا قاراستىرىلعان.
بۇعان قوسا جەرگىلىكتى بيلىك بيىلعى كوكتەمدە قانسورعىش جاندىكتەرگە قارسى كۇرەستى كۇشەيتە تۇسپەك نيەتتە. وبلىستا شىبىن-شىركەيگە قارسى 172 مىڭ گەكتار القاپ وڭدەلەدى. اۋەدەن وڭدەۋ شارالارىنىڭ اياسى بيىل بىردەن 45 مىڭ گەكتارعا ۇلعايىپ وتىر. وسىعان وراي قوسىمشا ۇشاقتار مەن تەحنيكالار تارتۋ كوزدەلگەن. دەزينسەكتسيا جونىندەگى جۇمىستار 2024 جىلى جاسالعان ءۇش جىلدىق كەلىسىمشارتتىڭ اياسىندا جالعاسادى. پاۆلودار قالاسىنىڭ 32 مىڭ گەكتار جايىلما اۋماعىن, اقسۋ قالاسىندا, پاۆلودار اۋدانىندا 30 مىڭ گەكتار, تەرەڭكول, اقتوعاي اۋداندارىندا 20 مىڭ گەكتار, ەرتىس اۋدانىندا 40 مىڭ گەكتار جايىلما القابىن قامتۋ جوسپارلانعان. ايتا كەتەلىك, بىلتىر پاۆلوداردا شىبىن-شىركەيگە قارسى ۋلاۋ جۇمىستارى شىلدەنىڭ ورتاسىنا دەيىن جالعاسقان ەدى.
«وبلىس اكىمى اسايىن بايحانوۆ اۋەدەن وڭدەلەتىن القاپتىڭ كولەمىن ۇلعايتۋدى ەسكەرە وتىرىپ, قوسىمشا تەحنيكانى تارتۋ قاجەتتىگىن اتاپ ءوتتى. ان-2 ماركالى 8 ۇشاققا ۆەريفيكاتسيادان كەيىن تاعى ەكى بورت كەلۋى كەرەك. سونداي-اق توسقاۋىلمەن وڭدەۋ كەزىندە قولدانىلاتىن ەكى اەروزولدى رەتتەلەتىن ديسپەرسيا گەنەراتورىنا تاعى ەكەۋى قوسىلادى. ولاردىڭ ارقايسىسىنىڭ قامتۋ قاشىقتىعى – 500 مەترگە, سىيىمدىلىعى – 1500 ليترگە دەيىن. قولدانىلاتىن پرەپاراتتىڭ كولەمى پروپورتسيونالدى تۇردە 14,5 مىڭ ليترگە دەيىن ارتادى. بايەر پرەپاراتتارىنان باسقا, پولياك ءوندىرىسىنىڭ جاڭا جەتىلدىرىلگەن قۇرالدارىن قولدانۋ جوسپارلانىپ وتىر. ولار ناۋرىزدىڭ ەكىنشى ونكۇندىگىندە جەتكىزىلەدى», دەپ حابارلادى وبلىس اكىمىنىڭ ءباسپاسوز قىزمەتىنەن.
قازگيدرومەتتىڭ بولجامى بويىنشا, بيىل پاۆلودارعا كوكتەم ەرتە كەلەدى. اۋانىڭ تەمپەراتۋراسى نورمادان 2 گرادۋسقا جوعارى بولادى. بۇگىندە بۇقتىرما سۋ قويماسىندا 38 تەكشە كيلومەتر سۋ بار. بۇل وتكەن جىلدىڭ وسى كەزەڭىمەن سالىستىرعاندا 8,6 تەكشە كيلومەترگە ارتىق. بۇقتىرما, ءشۇلبى سۋ قويمالارىنا كەلەتىن سۋ كولەمىنىڭ بولجامدى اعىنى ورتاشا كوپجىلدىق ماندەردەن 15-تەن 40%-عا دەيىن جوعارى.
پاۆلودار وبلىسى
