وڭىردە باۋكەڭ تۋعان جۋالى اۋدانىندا ارنايى مەموريالدىق مۋزەي بار. بۇدان بولەك, وبلىستىڭ 80 جىلدىعىندا اشىلعان «داڭق» زالىندا دا باۋكەڭنىڭ ءبىراز مۇراسى ساقتالعان.
«داڭق» زالىندا تۇرعان جادىگەر تۇسىنداعى «ماۋزەر پولكوۆنيكا باۋىرجانا مومىشۋلى» دەگەن جازۋ كوزگە وتتاي باسىلادى. دەرەككە سەنسەك, باۋىرجان مومىش ۇلىنان قالعان قۇندى جادىگەر 1965 جىلى وبلىستىق تاريحي-ولكەتانۋ مۋزەيىنە تاپسىرىلعان ەكەن.
«بۇل قارۋ – پانفيلوۆ ديۆيزياسىنىڭ پولكوۆنيگى باۋىرجان مومىش ۇلىنىكى. بىزدە بار دەرەككە جۇگىنسەك, ماۋزەر مەتالل, اعاش جانە قايىستان جاسالعان. سانالى عۇمىرىن اسكەري قىزمەتكە ارنالعان باتىر وسى قارۋدى سوعىس جىلدارىندا پايدالانعان.
ناقتى دەرەكتەرگە سەنسەك, باتىر كوزى تىرىسىندە جادىگەردى وبلىستىق تاريحي-ولكەتانۋ مۋزەيىنە تاپسىرۋدى ءجون دەپ تاپقان ەكەن. بۇل تۋرالى وسيەت حات تا جازىلعان», دەيدى وبلىستىق تاريحي-ولكەتانۋ مۋزەيىنىڭ عىلىمي قىزمەتكەرى امىربەك نۇرزات.
جالپى, 2019 جىلى اشىلعان «داڭق» زالىندا باتىردىڭ بىرقاتار جادىگەرى ساقتالعان. وڭىرگە سىرتتان كەلگەن تۋريستەر باۋكەڭنىڭ مۇراسىمەن تانىسۋ ءۇشىن ارنايى وسىندا ات باسىن بۇرادى. وبلىستىق تاريحي-ولكەتانۋ مۋزەيىنە قاراستى عيماراتتا باۋكەڭنىڭ ءومىرى مەن قىزمەتىن زەرتتەۋمەن اينالىساتىن «باۋىرجانتانۋ» زەرتتەۋ ورتالىعى دا جۇمىس ىستەپ تۇر.
تاراز
