فوتو: baq.kz
بۇل كارتا شەتەلدە تۇراتىن قانداستارىمىزدىڭ ەلىمىزگە كىرىپ-شىعۋ ماسەلەسىن جەڭىلدەتەدى. وسى ۋاقىت ارالىعىندا وزگە ەلدىڭ ازاماتتىعى بار ەتنيكالىق قازاقتارعا 65 كارتا بەرىلگەن. اتالعان كارتا 10 جىلعا جارامدى.
بىلتىر اقمولا وبلىسى بويىنشا 853 وتباسىنا قانداس مارتەبەسى بەرىلدى. سونىڭ 554-ءى قىتايدان قونىس اۋدارعان. ال وڭىرلىك كۆوتاعا كەلسەك, وتكەن جىلى 535 قانداس قابىلداندى. قانداستارعا مەملەكەت تاراپىنان جاسالىپ جاتقان قولداۋ دا زور.
«وتكەن جىلى 510 قانداسقا نەمەسە 176 وتباسىنا 133 ميلليون تەڭگە كولەمىندە قاراجات تولەندى. تۇرعىن ءۇي جالداۋ جانە كوممۋنالدىق قىزمەتتەرگە اقى تولەۋ بويىنشا شىعىستاردى وتەۋ ءۇشىن 20 وتباسىنا 8 ميلليون تەڭگە ءبولىندى. ەكونوميكالىق ۇتقىرلىق سەرتيفيكاتىنا 390 ميلليون تەڭگە قاراستىرىلدى. بيىل جوسپار بويىنشا 285 ادامعا قانداستاردى قابىلداۋدىڭ وڭىرلىك كۆوتاسى ءبولىنىپ وتىر. ولاردىڭ كوشىپ-قونۋىنا 32 ميلليون تەڭگە سۋبسيديا قاراستىرىلعان. باستاپقىدا 30 وتباسىنا تۇرعىن ءۇي جالداۋ جانە كوممۋنالدىق قىزمەتتەرگە اقى تولەۋ بويىنشا شىعىستاردى وتەۋگە 15,7 ميلليون تەڭگە ءبولۋ كوزدەلىپ وتىر. 76 ادامعا ەكونوميكالىق ۇتقىرلىق سەرتيفيكاتى بەرىلمەك. وعان 360 ميلليون تەڭگە قاراستىرىلعان», دەيدى وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ باسشىسى شولپان راحماتۋللينا.
وتكەن جىلى قىتاي حالىق رەسپۋبليكاسىنان قوسشى قالاسىنا كەلگەن قاحان ماميلا قوناق ءۇي سالۋ ماقساتىندا كاسىپكەر رەتىندە «اتا جولى» كارتاسىن العان. ال تاريحي وتانىنا 2023 جىلى قازاننىڭ 10-دا كەلگەن قويشى كومونوس مەملەكەت تاراپىنان كورسەتىلگەن كومەككە ريزا ەكەنىن ايتادى.
«كۆوتا الدىق, باسىمىزعا باسپانا بەردى. ءبىر ۇيدە بەس جان تۇرامىز. نەمەرەم ءالى كىشكەنتاي. ەكى بالام جۇمىستا. ءوزىمىز زەينەتكەرمىز», دەيدى ول.
ەرەجەگە سايكەس كارتا ءۇش ساناتتاعى شەتەلدە تۇراتىن ەتنيكالىق قازاقتار ءۇشىن بەرىلەدى. ۇمىتكەر قازاقستاندا تالاپ ەتىلەتىن كاسىپتەرگە ساي ماماندىققا يە بولۋى قاجەت. «اتا جولى» كارتاسىن ۇسىنۋعا ءوتىنىشتى «قۇتتى مەكەن» ءموبيلدى قوسىمشاسى نەمەسە migration.enbek.kz كوشى-قون رەسۋرستارى پورتالى ارقىلى بەرۋگە بولادى.
