ءدال وسى كۇندەرى ەلوردامىزدا قۇرساقىشىلىك كۇردەلى وپەراتسيالاردى جاساۋ ماقساتىندا تاڭدالعان UMC كلينيكاسىنىڭ «انا مەن بالا ورتالىعىنىڭ» فەتالدى مەديتسينا بولىمشەسى بارلىق زاماناۋي تەحنولوگيالارمەن جابدىقتالىپ, دارىگەرلەردىڭ ءبىلىمى جەتىلدىرىلىپ جاتىر. وعان قوسا Gasenergy اجقس جەلىسىنىڭ قارجىلاي قولداۋىمەن بولىمشەدە زاماناۋي لازەر ورناتىلىپ, فەتوسكوپتار جيىنتىعى بەرىلدى.
«قازاقستاندا فەتالدى حيرۋرگيانى دامىتۋ – بۇل بولاشاق ۇرپاقتىڭ دەنساۋلىعىن قامتاماسىز ەتۋدەگى ماڭىزدى قادام. وزىق تەحنولوگيالارمەن جابدىقتاپ, ماماندارىمىزدىڭ بىلىكتىلىگىن ارتتىرۋدىڭ ارقاسىندا ءبىز بولاشاق انالار مەن ولاردىڭ قۇرساعىنداعى شارانالارعا جوعارى تەحنولوگيالىق مەديتسينالىق كومەك كورسەتە الامىز. ەندى جۇكتى ايەلدەر قۇرساقىشىلىك وتالارعا بىردەن ءوز ەلىندەگى ەكى ورتالىقتا قول جەتكىزەدى, بۇل مەديتسينالىق كومەكتىڭ ساپاسىن ارتتىرىپ قانا قويماي, ەلدىڭ وتاندىق دەنساۋلىق ساقتاۋ جۇيەسىنە دەگەن سەنىمىن نىعايتادى», دەيدى قر دەنساۋلىق ساقتاۋ مينيسترلىگى انا مەن بالا دەنساۋلىعىن قورعاۋ دەپارتامەنتىنىڭ ديرەكتورى ماعريپا ەمبەرگەنوۆا.
قازاقستاندا فەتالدى حيرۋرگيانى دامىتۋعا باعىتتالعان جوبانى UMC-پەن جاسالعان ىنتىماقتاستىق تۋرالى مامىلە اياسىندا AYALA قايىرىمدىلىق قورى جۇزەگە اسىرىپ وتىر.
ء«بىز بۇعان دەيىن دە, 2023 جىلى UMC-تە AYALA قورىمەن بىرگە نەوناتالدى وفتالمولوگيا ءبولىمىن لازەرمەن جابدىقتاعان ەدىك, ول دارىگەرلەرگە 303 نارەستەنى سوقىرلىقتان قۇتقارۋعا كومەكتەستى. جاڭا جوبامىز دا وسىنداي تابىستى بولىپ, تالاي وتباسىندا دەنى ساۋ سابيلەردىڭ تۋىنا سەپتەسەتىنىنەن ۇمىتتەنەمىز», دەيدى Gasenergy اجقس جەلىسىنىڭ وپەراتسيالىق ديرەكتورى ومار مۋستافين.
ەلىمىزدىڭ تۇكپىر-تۇكپىرىنەن كەلگەن دارىگەرلەردى وقىتۋ باعدارلاماسىن جۇرگىزۋگە قارجىلاي دەمەۋ كورسەتىپ كەلە جاتقان «شەۆرون» كومپانياسىنىڭ ەۋرازيالىق بولىمشەسىنىڭ الەۋمەتتىك ينۆەستيتسيالار جونىندەگى كەڭەسشىسى لەيلا ايتمۇحانوۆا: «AYALA قورىمەن كوپ جىلدان بەرى ىنتىماقتاسا وتىرىپ, قول جەتكىزگەن ناتيجەلەردى ماقتان تۇتامىز. ءبىز وزىق مەديتسينالىق تەحنولوگيالار مەن دارىگەرلەرگە ارنالعان كەشەندى وقىتۋ باعدارلامالارىنا ينۆەستيتسيا سالا وتىرىپ, قازاقستانداعى فەتالدى حيرۋرگيانىڭ ساپاسىن ارتتىرۋعا ۇمتىلامىز. بۇل جوبا جەرگىلىكتى دەڭگەيدە اسا كوكەيكەستى, وتباسىلارعا شەتەلدەن شيپا ىزدەمەي, ۇزدىك مەديتسينالىق قىزمەتتەردى ءوز ەلىمىزدەن تابۋدا ماڭىزدى قادام بولدى», دەيدى.
نازارباەۆ ۋنيۆەرسيتەتىنىڭ مەديتسينا جونىندەگى ۆيتسە-پرەزيدەنتى جانە مەديتسينا مەكتەبىنىڭ دەكانى ماسسيمو پينياتەلليدىڭ ايتۋىنشا, UMC كلينيكاسىنىڭ «انا مەن بالا ورتالىعى» بولاشاق انالاردى تەرەڭدەتىلگەن پرەناتالدىق دياگنوستيكالاۋ مەن ودان ءارى جۇرگىزۋدىڭ بارلىق مۇمكىندىكتەرىنە يە.
ء«اربىر بولاشاق انا نەنى ارماندايدى؟ ارينە, دەنى ساۋ بالانىڭ ومىرگە كەلۋىن. وسى ارمانداردىڭ جۇزەگە اسۋى ءۇشىن ءبىز وتاندىق دارىگەرلەردىڭ ۇرىق دامۋىنىڭ ەڭ كۇردەلى كەمىستىكتەرىن ساراپتامالىق دياگنوستيكالاۋداعى بىلىمدەرىن جەتىلدىرۋ ءۇشىن شەتەلدىك جەتەكشى پراكتيك دارىگەرلەردى شاقىرامىز. ۋدز-دارىگەرلەر مەن اكۋشەر-گينەكولوگتار ءبىرىنشى بولىپ سكرينينگتىك تەكسەرۋلەردە ۇرىقتىڭ دامۋىنداعى كەمىستىكتەردى كورەدى. جانە ولار اسقىنعان كوپ ۇرىقتى جۇكتىلىگى بار ايەلدەردەگى پاتولوگيالاردى قۇرساق ىشىندە تۇزەتۋ ءۇشىن جەدەل جىبەرە الادى. مۇنداي جاعدايدا بۇرىن وتباسىلار وپەراتسياعا شەتەلگە شىعۋ ءۇشىن ميلليونداعان قاراجات ىزدەۋگە ءماجبۇر بولاتىن. قازاقستاندا فەتالدى حيرۋرگيانىڭ دامۋىمەن بىلىكتى حيرۋرگيالىق كومەكتى استانا مەن الماتىدا الۋعا بولادى. بۇل دەنساۋلىق ساقتاۋ جۇيەمىز ءۇشىن دە, ءسابيدىڭ ومىرگە كەلۋىن تاعاتسىزدانا كۇتەتىن ءاربىر وتباسى ءۇشىن دە جاقسى جاڭالىق», دەيدى AYALA قايىرىمدىلىق قورىنىڭ نەگىزىن قالاۋشى جانە پرەزيدەنتى ايدان سۇلەيمەنوۆا.
