فوتو: سەنات
سەنات سپيكەرى ماۋلەن اشىمباەۆتىڭ كەزدەسۋگە قاتىسۋشىلارعا ارنالعان قۇتتىقتاۋىن ورىنباسارى جاقىپ اسانوۆ جاريا ەتە كەلە, جاساندى ينتەللەكتى دامىتۋ مەن ونىڭ ەتيكالىق ماسەلەسىنىڭ ماڭىزىنا توقتالدى. ول جاساندى ينتەللەكت قازىردىڭ وزىندە ءومىردىڭ اجىراماس بولىگىنە اينالعانىن جانە مەديتسينا, ءبىلىم بەرۋ, مەملەكەتتىك باسقارۋمەن قوسا ءتۇرلى سالالارعا بەلسەندى تۇردە ەنگىزىلىپ جاتقانىن اتاپ ءوتتى.
«جاساندى ينتەللەكت قازىردىڭ وزىندە ءبىزدىڭ ءومىرىمىزدىڭ اجىراماس بولىگىنە اينالدى. ول الەمنىڭ كەلبەتىن وزگەرتتى جانە مەديتسينادان ءبىلىم بەرۋگە دەيىنگى نەگىزگى سالالارعا دەندەي ەندى. سەناتتا دا ونى زاڭ شىعارۋ ۇدەرىسىنە ەنگىزۋ بويىنشا جۇمىس قولعا الىندى. جي قوعامنىڭ قاجەتىن تالداي الادى, زاڭداردىڭ سالدارىن بولجاي الادى, نورماتيۆتىك اكتىلەردى دايىنداۋعا كومەكتەسەدى. ءبىز قازىردىڭ وزىندە الەمدىك تاجىريبەنى زەردەلەۋدەمىز جانە ساراپشىلارمەن ءوزارا ءىس-قيمىلدى باستادىق. پارلامەنت وزگەرىستەرگە اشىق جانە زاماناۋي تەحنولوگيانى ەنگىزۋگە دايىن», دەدى سەنات ۆيتسە-سپيكەرى جاقىپ اسانوۆ.
شاراعا مەملەكەتتىك ورگانداردىڭ وكىلدەرى, عىلىمي-زەرتتەۋ ينستيتۋتتارىنىڭ جەتەكشى ساراپشىلارى, IT-سالا ماماندارى, سەنات دەپۋتاتتارى دارحان قىدىرالى, عالياسقار سارىباەۆ, ناۋرىزباي بايقاداموۆ, اليشەر ساتۆالديەۆ قاتىستى.
سەناتتىڭ ءباسپاسوز قىزمەتىنىڭ مالىمدەۋىنشە قاتىسۋشىلار ۆوركشوپتىڭ توپتىق سەسسيالارى اياسىندا جاساندى ينتەللەكتتىڭ دامۋ كەزەڭدەرى مەن يننوۆاتسيالارىن, تىلدىك ۇلگىلەر مەن تسيفرلىق لينگۆيستيكانى, جاساندى ينتەللەكت ەكوجۇيەسىن دامىتۋ ماسەلەلەرىن تالقىلادى. دەنساۋلىق ساقتاۋدا جي-ءدى قولدانۋعا, اتاپ ايتقاندا, وزىق الگوريتمدەردى قولدانا وتىرىپ, مەديتسينالىق سينتەتيكالىق دەرەكتەردى گەنەراتسيالاۋعا ەرەكشە نازار اۋدارىلدى. سونىمەن قاتار, كەلەشەكتە جاساندى ينتەللەكتى ەتيكالىق رەتتەۋ جانە ونىڭ قوعامعا اسەرى تۋرالى ايتىلدى.
2023 جىلى سەنات توراعاسى ماۋلەن اشىمباەۆتىڭ قاتىسۋىمەن استانادا وتكەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسى اياسىندا مۇسىلمان اقساقالدار كەڭەسى ورتالىق ازيا بيۋروسىنىڭ كەڭسەسى اشىلعان بولاتىن. وكىلدىك سودان بەرى ورتالىق ازيانىڭ بۇكىل ءوڭىرىن قامتي وتىرىپ بەلسەندى جۇمىس ىستەپ كەلەدى.
