ماڭىزدى باسقوسۋ بارىسىندا بيزنەس وكىلدەرىمەن ىسكەرلىك بايلانىس ورناتۋ, ينۆەستيتسيا تارتۋداعى مۇمكىندىكتەردى جان-جاقتى زەردەلەۋ ماسەلەلەرى ءسوز بولدى. جامبىل وبلىسىنىڭ اكىمى ە. قاراشوكەەۆ مۇنداي كەزدەسۋلەر تۇرىك كومپانيالارى تاراپىنان جامبىل وبلىسىندا ءوندىرىس اۋقىمىن كەڭەيتۋگە دەگەن قىزىعۋشىلىقتى ارتتىراتىنىن اتاپ ءوتتى.
سونداي-اق ە قاراشوكەەۆ جامبىل وبلىسىنىڭ جوعارى ينۆەستيتسيالىق الەۋەتى مەن ارتىقشىلىقتارىنا توقتالىپ, ەل پرەزيدەنتى قاسىم-جومارت توقاەۆتىڭ تاپسىرمالارىن جۇزەگە اسىرۋ اياسىندا ماڭىزدى ينۆەستيتسيالىق جوبالاردى قولداۋ شارالارى تۋرالى باياندادى. سونداي-اق, ءوڭىردىڭ قولايلى كليماتتىق جاعدايىن, لوگيستيكالىق تۇرعىدان ءتيىمدى گەوگرافيالىق ورنالاسۋىن, تابيعي رەسۋرستاردىڭ, ونىڭ ىشىندە مەتاللۋرگيا, حيميا جانە قۇرىلىس سالالارىن دامىتۋ ءۇشىن قور جەتكىلىكتى ەكەنىن جەتكىزدى.
سوڭعى ۋاقىتتا وڭىردە قولايلى ينۆەستيتسيالىق ساياسات جۇزەگە اسۋدا دەسەك, ءۇش جىلعا جوسپارلانعان 7 ملرد دوللاردى قۇرايتىن ءىرى جوبالار وعان دالەل بولا الادى. ەربول قاراشوكەەۆ تۇرىك كومپانيالارىن وبلىسقا ينۆەستيتسيا قۇيۋعا شاقىرىپ, اۋىل شارۋاشىلىعى ونىمدەرىن وڭدەۋ, تۋريزم, قۇرىلىس, تاۋ-كەن ونەركاسىبى, كابەلدىك ونىمدەردىڭ, جەلدەتۋ جانە ەلەكتر جابدىقتارىنىڭ, سورعىلاردىڭ, سونداي-اق وقشاۋلاعىش ماتەريالداردىڭ ءوندىرىسىن قۇرۋ باعىتتارىنداعى وراسان زور الەۋەتكە نازار اۋدارتتى.
– ءبىز مۇددەلى ينۆەستورلاردى قولداۋعا, كەڭ اۋقىمدى پرەفەرەنتسيالار بەرۋگە, دايىن ينفراقۇرىلىمى بار وندىرىستىك ءۇي-جايلارمەن قامتاماسىز ەتۋگە دايىنبىز. اۋماعى 40 مىڭ شارشى مەتردى قۇرايتىن ءۇي-جايلاردىڭ قۇرىلىسى اياقتالۋعا جاقىن. بيىل تاعى 100 مىڭ شارشى مەتر قۇرىلىس جوسپارلانعان. ينۆەستيتسيالىق جوبالاردى سۇيەمەلدەۋمەن اينالىساتىن «Zhambyl Invest» ديرەكتسياسىندا تۇركيامەن جۇمىس ىستەۋ ءۇشىن جەكە ءبولىم قۇرىلعان, — دەدى وبلىس اكىمى.
فورۋم بارىسىندا تاراپتار قوسىمشا سالالاردىڭ دامۋىنا اسەر ەتىپ, ەكونوميكانىڭ باسەكەگە قابىلەتتىلىگىن ارتتىرعان مەرسين پروۆينتسياسى اۋماعىنداعى اتوم ەلەكتر ستانتسياسىن سالۋ جوباسىن تالقىلادى. جامبىلدىق دەلەگاتسيا مۇشەلەرى تۇرىك سەرىكتەستەرىنىڭ وزىق تاجىريبەسىن قاراستىرۋعا قىزىعۋشىلىق ءبىلدىردى.
مەرسين ساۋدا-ونەركاسىپ پالاتاسى توراعاسىنىڭ ورىنباسارى مۇستافا وزدامار پروۆينتسيانىڭ ينۆەستيتسيا تارتۋ بويىنشا كوشباسشى ەكەنىن اتاپ ءوتىپ, قازاقستانمەن, ونىڭ ىشىندە جامبىل وبلىسىمەن ىنتىماقتاستىقتى نىعايتۋدىڭ زور مۇمكىنشىلىگىنە توقتالدى.
مەرسين پروۆينتسياسى گۋبەرناتورىنىڭ ورىنباسارى يرفان دەميروز قازاقستان مەن تۇركيا ۇزاق جىلدار بويى تىعىز ىنتىماقتاستىقتى ساقتاپ كەلە جاتقانىن, ورتاق تاريحي جانە مادەني بايلانىستار ەكىجاقتى قارىم-قاتىناستاردىڭ نەگىزى ەكەنىن جەتكىزدى. ول جامبىل وبلىسىمەن ءوزارا ءىس-قيمىلدى كەڭەيتۋگە نيەت ءبىلدىردى. سونداي-اق تۇركياداعى KAZAKHINVEST وكىلى ەرسۇلتان جاڭاباەۆ ورامدى ويلارىن ورتاعا سالدى.
جامبىل وبلىسىنىڭ دەلەگاتسياسى مەرسين كاسىپكەرلەرىمەن دە B2G فورماتىندا كەزدەسۋلەر وتكىزدى. بۇل تىكەلەي بايلانىس ارنالارىن قۇرۋعا, جامبىل وبلىسى مەن مەرسين پروۆينتسياسى اۋداندارىنىڭ ساۋدا بەلسەندىلىگىن ىنتالاندىرۋعا ىقپال ەتپەك.
مەرسيندىك ىسكەر توپ وكىلدەرى جامبىل وبلىسىمەن بىرلەسىپ تسەمەنت, ديزەل مايى, كۇن باتارەيالارىن ءوندىرۋ, جەمىس-جيدەك, كوكونىستەردى وڭدەۋ جانە باسقا دا باعىتتار بويىنشا جوبالاردى جۇزەگە اسىرۋعا دايىن ەكەندىكتەرىن راستادى. كەزدەسۋلەر بارىسىندا ءاربىر جوبا ەگجەي-تەگجەيلى تالقىلانىپ, ءوڭىر باسشىسى كاسىپكەرلەردىڭ بارلىق سۇراقتارىنا تولىق جاۋاپ بەردى.
جامبىل وبلىسى
