اقپاراتتى اقمولا وبلىسىنىڭ دەنساۋلىق ساقتاۋ باسقارماسى راستادى. ۆەدومستۆونىڭ مالىمەتىنشە, ايەل ادام 2024 جىلدىڭ شىلدەسىندە اۋىرىپ قالعان, بىراق مەديتسينالىق كومەككە جۇگىنبەي, ءوزىن-ءوزى ەمدەۋمەن اينالىسقان.
«2024 جىلدىڭ جەلتوقسان ايىندا ول ستەپنوگورسك قالاسىنداعى «ۆيامەديس» جشس-عا تىركەلىپ, جۇكتىلىگىنە 13 اپتا 5 كۇن بولعاندا ەسەپكە الىندى. ناۋقاس 2025 جىلدىڭ قاڭتار ايىندا ستەپنوگورسك كوپسالالى قالالىق اۋرۋحاناسىنىڭ جۇقپالى اۋرۋلار بولىمشەسىنە وڭ جاقتى تومەنگى بولىك پنەۆمونياسى دياگنوزىمەن شۇعىل تۇردە جاتقىزىلدى. ول كەزدە جۇكتىلىك 15 اپتالىق بولاتىن», - دەپ حابارلادى ۆەدومستۆودان.
كەيىنىرەك ايەل ادامنىڭ وكپە تۋبەركۋلەزى باكتەريالىق ەكسكرەتسيامەن اۋىرعانى انىقتالىپ, وبلىستىق فتيزيوپۋلمونولوگيالىق ورتالىققا جاتقىزۋعا جىبەرىلدى. الايدا, ناۋقاس باستاپقىدا ەمدەۋدەن ءۇزىلدى-كەسىلدى باس تارتتى, بىراق 17 قاڭتارداعى تۇسىندىرۋدەن كەيىن اۋرۋحاناعا جاتقىزىلدى.
20 اقپاندا تۋىستارىنىڭ تالابى بويىنشا ايەل قولحاتپەن ۇيىنە شىعارىلدى. الايدا 21 اقپاندا ونىڭ جاعدايى كۇر ناشارلاپ كەتتى. قاتتى ەنتىگۋ جانە اياعىندا اۋىرسىنۋ پايدا بولدى. 22 اقپاندا كۇيەۋى ونى قايتادان اۋرۋحاناعا اپارىپ, ناۋقاس شۇعىل تۇردە جاتقىزىلدى.
دارىگەرلەردىڭ بارلىق كۇش-جىگەرىنە قاراماستان, ايەل ادامدا جەدەل جۇرەك-قان تامىرلارى جەتكىلىكسىزدىگى پايدا بولىپ, اۋرۋحانا توسەگىندە قايتىس بولدى.
