بەلگىلى جازۋشى دۋلات يسابەكوۆ ومىردەن ءوتتى

قالىڭ قازاقتىڭ قابىرعاسىن قايىستىرعان قارالى حاباردى  قازاقستان جازۋشىلار وداعى توراعاسىنىڭ ورىنباسارى قاسىمحان بەگمانوۆ الەۋمەتتىك جەلىدەگى پاراقشاسى ارقىلى ەستىرتتى.

«قايران, دۋلات اعام - اي, مىناۋ جارىق دۇنيەدەن ءسىزدىڭ دە كەتكەنىڭىز بە؟ وسى قازىر عانا, ون - ون بەس مينۋت بۇرىن ەستيار دۋلات ۇلى ىنىشەگىم ماعان وسىناۋ الاپات قايعىلى حاباردى جىلاپ تۇرىپ جەتكىزدى. قازاقستان جازۋشىلار وداعىنىڭ توراعاسى مەرەكە ابدەش ۇلىنا, قالاباسىنىڭ توڭىرەگىندەگى جىگىتتەرگە, باسقا دا ەل اعالارىنا قارالى حاباردى جەتكىزدىم. قازىر ءوزىم اعامنىڭ ۇيىنە قاراي كەتىپ بارا جاتىرمىن...ءيا, قازاقستاننىڭ ەڭبەك ەرى, قازاق ادەبيەتىنىڭ كلاسسيگى, جازۋشى-دراماتۋرگ دۋلات يسابەكوۆ ومىردەن ءوتتى.قازاق حالقىنا قاتتى قايعىرىپ كوڭىل ايتامىن, - دەپ جازدى قاسىمحان بەگمانوۆ.

دۋلات يسابەكوۆ 1942 جىلى وڭتۇستىك قازاقستان وبلىسى, ارىس اۋدانى, «لەنين جولى» اۋىلىندا تۋعان. 1963 جىلى ءال-فارابي اتىنداعى قازاق مەملەكەتتىك ۋنيۆەرسيتەتىن بىتىرگەن.

جازۋشى ءار جىلدارى قازاق كسر تەلەۆيزيا جانە راديوحابار جونىندەگى مەملەكەتتىك كوميتەتىندە اعا رەداكتور (1967-1968), قازاق سوۆەت ەنتسيكلوپەدياسى باس رەداكتسياسىندا اعا عىلىمي رەداكتور (1968-1970), «جۇلدىز» جۋرنالىندا ءبولىم مەڭگەرۋشىسى (1971-1976), «جالىن» باسپاسىندا رەداكتسيا مەڭگەرۋشىسى (1976-1980) بولعان.

قازاق كسر مادەنيەت مينيسترلىگى رەپەرتۋارلىق-رەداكتسيالىق كوللەگيانىڭ باس رەداكتورى (1980-1988), قازاق تەلەديدارىنىڭ باس رەداكتورى (1988-1992), «جازۋشى» باسپاسىنىڭ ديرەكتورى (1992-1995), قازاقستان جازۋشىلار وداعىنىڭ حاتشىسى, قر مادەنيەتتانۋ عىلىمي زەرتتەۋ ينستيتۋتىنىڭ ديرەكتورى بولىپ ەڭبەك ەتكەن.