قازىر 27 ەلدى مەكەنگە ەلەكتر قۋاتىن بەرۋگە شەكتەۋ قويىلدى. ەنەرگيامەن قامتاماسىز ەتۋگە جاۋاپتى «شەت-ەنەرگو» كومپانياسى «جەزقازعان ەلەكتر تاراتۋ جەلىسى» اق-نىڭ تالابىن ورىنداماعان. جەرگىلىكتى بيلىكتىڭ مالىمەنتىنشە, «شەت-ەنەرگو» ءبىراز جىلدان بەرى جەلىلەردى جاڭعىرتپاعان. سالدارىنان اقاۋ شىعىپ, ۇيلەر مەن الەۋمەتتىك نىساندار ءجيى جارىق پەن جىلۋسىز قالىپ وتىر. ەسكەرتۋگە قاراماستان كومپانيا قىزمەت ساپاسىن جاقسارتۋعا تىرىسپاعان. قازىر توزعان ەلەكتر جەلىلەرىن شۇعىل قالىپقا كەلتىرۋ ءۇشىن اۋدان اۋماعىنداعى كاسىپورىندار جۇمىلدىرىلدى.
شەت اۋدانىنىڭ اكىمى مۇحيت مۇحتاروۆتىڭ ايتۋىنشا قوس كاسىپورىننىڭ اراسىندا كەلىسىمشارتتىڭ بولماۋى جانە ەلەكتر جەلىلەرىنە جاۋاپتى مەكەمەنىڭ اۋقىمدى جوندەۋ جۇمىستارىن جاساماۋى, اۋدان اۋماعىنداعى 3 مىڭعا جۋىق تۇرعىن ءۇي مەن 43 الەۋمەتتىك نىسانداردى جارىقسىز قالدىرىپ قانا قويماي, وزگە دە ورىن الۋى ىقتيمال قاۋىپتەردى تۋدىرىپ وتىر.
«سوندىقتان وبلىس اكىمىنىڭ تاپسىرماسىنا سايكەس, جەرگىلىكتى اتقارۋشى ورگان رەتىندە اپاتتىڭ الدىن الۋ, كەلەڭسىزدىكتەردى جويۋ ماقساتىندا اۋدان اۋماعىندا تج جاريالاندى. بۇل كاسىپورىن الداعى ۋاقىتتا تۇرعىندارعا ساپالى قىزمەت كورسەتە الماۋىنا بايلانىستى زاڭدىلىقتار شەڭبەرىندە رەكۆيزيتسيا جاساۋ ماسەلەسى قاراستىرىلاتىن بولادى», دەيدى اۋدان اكىمى.
