سۋرەت: finance.digitalbusiness.kz
توعىز جولدىڭ تورابىندا ورنالاسقان شۋ اۋدانىندا ءتورت ت ۇلىك وسىرۋگە نيەتتى تۇرعىندارعا 100 باس مال بەرىلدى. «اتاي» شارۋا قوجالىعىنىڭ باسشىسى ساكەن اتاەۆتىڭ باس بولۋىمەن اباي اۋىلىنىڭ تۇرعىنى قاليسۇلتان تىلەپبەرگەنوۆ پەن باقىتجان بوتاەۆتىڭ ارقايسىسى 50 باس قوي الدى. ولار 3 ملن تەڭگە بەرەشەكتى 5 جىل ىشىندە بەلگىلەنگەن ەرەجەگە سايكەس وتەۋى ءتيىس.
«اۋىلداستارىمدى قولداپ, اۋىلدىڭ دامۋىنا ۇلەس قوسۋعا ارقاشان ءازىرمىن. بولاشاقتا اۋىل ازاماتتارىنا اسىل تۇقىمدى ءتورت ت ۇلىك بەرۋ ماسەلەسىن دە ويلاستىرىپ وتىرمىن. ەڭ باستىسى جەرلەستەردىڭ ءىس باستاۋعا نيەت تانىتىپ وتىرعانى كوڭىل قۋانتادى. نيەت بولعان جەردە ناتيجەنىڭ كوپ كۇتتىرمەيتىنى داۋسىز», دەيدى ساكەن اتاەۆ.
وبلىستىق اۋىل شارۋاشىلىعى باسقارماسى باسشىسىنىڭ ورىنباسارى تولەبەك قۇلەكەەۆتىڭ ايتۋىنشا, تاۋارلى نەسيە العان ازاماتتاردىڭ قارىزدى وتەۋى ءۇشىن ايتارلىقتاي جەڭىلدىك قاراستىرىلعان. ماسەلەن, ءبىرىنشى جىلى تولەم ماسەلەسى بويىنشا دەمالىس جاريالانسا, ودان كەيىن جىل سايىن ءتولدىڭ 50 پايىزى نەگىزىندە وتەم تولەۋگە مىندەتتەلەدى. وسىلايشا, بەس جىلدا نەسيە بورىشىن وتەيدى. جوبا بويىنشا ءبىرىنشى كەزەكتە از قامتىلعان وتباسىلار مەن جۇمىسسىز جۇرگەن ازاماتتاردى قولداۋعا باسىمدىق بەرىلەدى.
شۋ اۋدانىنىڭ وزگە دە كاسىپكەرلەرى اۋىل تۇرعىندارىنا تاۋارلى نەسيە بەرۋگە قۇلشىنىس ءبىلدىرىپ وتىر. ولار كەم دەگەندە 30 باس ۋاق مال, 15 ءىرى-قارا جانە 10 جىلقى ۇسىنۋى ءتيىس.
شالعايدا ورنالاسقان مويىنقۇم اۋدانىنداعى «ۇركەر» شارۋا قوجالىعىنىڭ جەتەكشىسى اۋىل تۇرعىندارىنا 20 باس ءىرى قارا مەن 100 باس ۋاق مال بەرۋگە دايىن ەكەنىن جەتكىزدى. ال جەرگىلىكتى اتقارۋشى بيلىك وكىلدەرى تاۋارلى نەسيە الۋعا نيەتتى اۋىل تۇرعىندارىنىڭ ءتىزىمىن جاساقتاپ جاتىر.
اۋىل شارۋاشىلىعى باسقارماسىنىڭ ماماندارى جىل سوڭىنا دەيىن 80-گە جۋىق كەلىسىمگە قول قويىپ, جوبانى جانداندىرا تۇسەمىز دەيدى.
جامبىل وبلىسى
