ءىس-شارا اۋعان جەرىنەن كەڭەس اسكەرلەرىنىڭ شىققان كۇنىنە وراي ۇيىمداستىرىلدى. اۋعان سوعىسى ارداگەرلەرىنە قۇرمەت كورسەتۋ, جات جەردە كوز جۇمعان ازاماتتارىمىزدى ەسكە الۋ مەن جاستارعا پاتريوتتىق تاربيە بەرۋدى ماقسات ەتكەن كەزدەسۋگە جالىنداعان جاستىق شاعىن وق پەن وت اراسىندا وتكىزىپ, ەلگە امان-ساۋ ورالىپ, تۋعان جەرىمەن قاۋىشقان ينتەرناتسيوناليست-جاۋىنگەرلەر قاتىستى. ولاردىڭ قاتارىندا «ابىروي» اۋعان سوعىسى ارداگەرلەرى وداعىنىڭ توراعاسى ءالي داۋىلبەك پەن وزگە دە جاۋىنگەر-ارداگەرلەر ارنايى كەلدى. ءدىنتانۋ جانە مادەنيەتتانۋ كافەدراسىنىڭ پروفەسسورى قارلىعاش بورباسوۆا جيىندا ستۋدەنتتەر ءۇشىن اۋعان سوعىسى ارداگەرلەرىنىڭ ەستەلىك اڭگىمەلەرىن تىڭداۋدىڭ ماڭىزىن اتاپ ءوتتى.
اۋعان سوعىسىنىڭ ارداگەر جاۋىنگەرلەرى ستۋدەنتتەرگە تۋعان ەلىن ءسۇيۋ, قۇرمەتتەۋگە قاتىستى تاعلىمدى اڭگىمەلەر ايتىپ, سوعىس دالاسىندا وتكەن جىلداردى ەسكە الىپ, ەستەلىكتەرىمەن ءبولىستى.
ء«بىز بارلىعىمىز ءوز وتانىمىزدىڭ پاتريوتى بولۋىمىز كەرەك. وكىنىشكە وراي, سوڭعى جىلدارى وتان الدىنداعى اسكەري مىندەتىن اتقارۋدان قاشقاقتاۋ سەبەپتەرى جيىلەپ كەتتى. اتا-بابالارىمىز نايزانىڭ ۇشىمەن قورعاپ, امانات ەتىپ قالدىرعان ۇلانعايىر جەردىڭ بولاشاق يەسى – جاستار. وتان الدىنداعى بورىشتى وتەۋ ءاربىر ازاماتتى باتىرلىققا, وجەتتىككە باۋلىپ قانا قويماي, اسكەر مىندەتتىڭ, بولاشاقتا اسكەري عىلىمدى دامىتۋ ىسىنە قاتىسۋعا ىقپال ەتەدى. بۇگىندە تەحنولوگيا قارىشتاپ دامىعان كەزەڭدە ەلىمىزدىڭ قوعانىس سالاسىندا زاماناۋي تەحنيكا, تەحنولوگيالاردى يگەرگەن جاستاردىڭ كوبەيگەنى ابزال» دەپ اتاپ ءوتتى ءالي داۋىلبەك.
كەزدەسۋ بارىسىندا ستۋدەنتتەر اۋعان سوعىسىنان امان قايتقان, قايتپاس تا قايسار جاۋىنگەر-ارداگەرلەرگە قۇرمەت كورسەتىپ, پىكىر الماستى.
