فلويد مەيۆەزەر وسى جىلدىڭ قىركۇيەگىندە رينگپەن قوشتاسادى

استانا. 3 مامىر. بۇگىن «عاسىر جەكپە-جەگىندە» مەنني پاكياودان باسىم تۇسكەن فلويد مەيۆەزەر وسى جىلدىڭ قىركۇيەگىندە سوڭعى رەت جۇدىرىقتاساتىنىن ايتتى. بۇل تۋرالى تاسس حابارلادى. «كەلەسى جەكپە-جەگىم وسى جىلدىڭ قىركۇيەك ايىندا وتەدى. بۇل كەزدەسۋ سپورتتىق عۇمىرىمداعى ەڭ سوڭعىسى بولماق. 49 جەكپە-جەك وتكىزىپ, بىردە ءبىر رەت جەڭىلمەي رينگتەن كەتەمىن», – دەدى بوكسشى كەزدەسۋدەن كەيىنگى ءباسپاسوز ءماسليحاتىندا. پاكياو تۋرالى ول: «مەننيدىڭ كەز كەلگەن قارسىلاسىن باس كوتەرتپەيتىندەي قاۋقارى بار. ونىڭ نە ءۇشىن بوكس بيىگىندە جۇرگەنىن ەندى ءتۇسىندىم. پاكياودان باسىم تۇسكەنىم ءۇشىن ءوزىمدى اقىلدى بوكسشى سانايمىن. ول – وتە مىقتى قارسىلاس. سوندىقتان ماعان وڭتايلى ءساتتى كۇتىپ, وتە ساق قيمىداۋعا تۋرا كەلدى», – دەدى. ءوز كەزەگىندە مەنني پاكياو تورەشىلەردىڭ شەشىمىمەن كەلىسپەيتىنىن ايتتى. «مەيۆەزەرگە قاراعاندا مەنىڭ سوققىلارىم كوپ بولدى دەپ ويلادىم. جەڭىلەتىندەي سونشالىقتى تاياق جەگەم جوق. سوندىقتان تورەشىلەردىڭ شەشىمىنە ءالى تاڭ قالىپ تۇرمىن», – دەدى فيليپپيندىك بوكسشى. ايتا كەتەيىك, جارتىلاي ورتا سالماقتاعى قوس مىقتى اراسىنداعى جەكپە-جەك بۇگىن اقش-تىڭ لاس-ۆەگاس قالاسىنداعى MGM Grand ارەناسىندا ءوتتى. 12 راۋندقا سوزىلعان ايقاستا مەيۆەزەر تورەشىلەردىڭ شەشىمىمەن جەڭىسكە جەتتى. ەلامان قوڭىر. دەرەك: تاسس سۋرەت: lenta.ru.