بۇل تۋرالى وبلىستىق پوليتسيا دەپارتامەنتى رەسمي مالىمدەمە تاراتتى.
«اتالعان فاكتى بويىنشا قر قىلمىستىق كودەكسىنىڭ 277-بابىنىڭ 3-بولىگى «تاۋ-كەن جۇمىستارىن نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ» بويىنشا ءىس قوزعالدى», دەلىنگەن حابارلامادا.
وقيعا ورنىندا دەپارتامەنتتىڭ جەدەل-تەرگەۋ توپتارى جۇمىس ىستەپ, بارلىق قاجەتتى تەرگەۋ ارەكەتتەرى جۇرگىزىلىپ جاتىر.
ەسكە سالايىق, دۇيسەنبى كۇنى «قازاقمىس» كورپوراتسياسىنا قاراستى «جومارت» كەنىشىندەگى شاحتادا تاۋ جىنىسى وپىرىلعان. وقيعا سالدارىنان 7 شاحتا جۇمىسشىسى ءۇيىندى استىندا قالىپ قويعان.
قر پرەمەر-ءمينيسترى ولجاس بەكتەنوۆتىڭ تاپسىرماسىمەن شاحتانىڭ وپىرىلۋىنىڭ سەبەپتەرىن انىقتاپ, زارداپ شەككەندەرگە كومەك كورسەتۋ ءۇشىن ارنايى كوميسسيا قۇرىلدى. كوميسسيانى پرەمەر-ءمينيستردىڭ ورىنباسارى قانات بوزىمباەۆ باسقاردى.
توتەنشە جاعدايلار مينيسترلىگى بۇعان دەيىن توتەنشە جاعدايلار قىزمەتى التى جۇمىسشىنىڭ ءمايىتىن تاپقانىن, جەتىنشى جۇمىسشىعا ىزدەۋ جۇمىستارى ءجۇرىپ جاتقانىن حابارلاعان. كەيىنىرەك اگەنتتىك قۇتقارۋشىلار سوڭعى قۇرباننىڭ ءمايىتىن تاپقانىن حابارلادى. بارلىق جەتى جۇمىسشىنىڭ ءمايىتى شىعارىلىپ, سوت-مەديتسينالىق ساراپتاماعا پوليتسياعا تاپسىرىلعانى حابارلاندى.
«قازاقمىستىڭ» ءباسپاسوز قىزمەتى تۇسىندىرگەندەي, «جومارت» كەنىشىندە توتەنشە جاعدايعا الدىن الا مالىمەتتەر بويىنشا تابيعي گازدىڭ جارىلۋى سەبەپ بولدى.
كورپوراتسيا جومارت كەنىشىندە قازا تاپقانداردىڭ تۋىستارىنا ۇجىمدىق شارتتا كوزدەلگەن قاجەتتى كومەك كورسەتىلەتىنىن ايتتى. الەۋمەتتىك جانە ماتەريالدىق قولداۋ كورسەتۋ, ونىڭ ىشىندە مورالدىق زياندى وتەۋ ءۇشىن وتباسىلارعا جۇمىسشىنىڭ ورتاشا جىلدىق جالاقىسىنىڭ 10 ەسەلەنگەن مولشەرىندە, سونداي-اق جەرلەۋدى ۇيىمداستىرۋعا 2 ميلليون تەڭگەدەن استام قاراجات تولەنەدى. سونىمەن قاتار, وتباسى مۇشەلەرىنىڭ ءوتىنىشى بويىنشا اسىراۋشىسىنان ايىرىلۋىنا, بالالارىنىڭ وقۋىنا, قايتىس بولعان قىزمەتكەرلەردىڭ نەسيەلەرىن وتەۋگە, سونداي-اق باسقا دا كومەك تۇرلەرىنە اي سايىنعى تولەمدەر قاراستىرىلعان.
ۇلىتاۋ وبلىسىنىڭ اكىمدىگى دە قازا بولعان جۇمىسشىلاردىڭ وتباسىلارى مەن جاقىندارىنا بارلىق قاجەتتى پسيحولوگيالىق جانە الەۋمەتتىك قولداۋ كورسەتەتىنىن حابارلادى.
