فوتو: ۇكىمەتتىڭ ءباسپاسوز قىزمەتى
جابدىقتاردى جوندەۋ جانە قالپىنا كەلتىرۋ بويىنشا ايتارلىقتاي جۇمىستار جۇرگىزىلگەن پەتروپاۆل 2-جەو-عا ەرەكشە نازار اۋدارىلدى. «سەۆكازەنەرگو» اق باس ديرەكتورى قازاندىق اگرەگاتتارى مەن تۋربوگەنەراتورلار سياقتى نەگىزگى تەحنيكالىق قۇرالداردىڭ توزۋ دەڭگەيى 57,3%-دى قۇرايتىنىن باياندادى. 2024 جىلى 2-جەو-دا №1, 9 قازاندىقتارى مەن №3, 6 تۋربينالارىنا كۇردەلى جوندەۋ جۇرگىزىلىپ, سونداي-اق ءتورت تۋربينانى جوندەۋ جۇمىستارى اياقتالعان.
سونىمەن قاتار بيىكتىگى 180 مەتر №1 ءتۇتىن مۇرجاسىنىڭ قۇرىلىسى اياقتالدى, ونى پايدالانۋعا بەرۋ جىل سوڭىنا جوسپارلانعان. سونداي-اق №3, 6, 11 ءۇش قازاندىقتا جانە №7 ءبىر تۋربينادا قالپىنا كەلتىرۋ جۇمىستارى جالعاسىپ جاتىر.
كاسىپورىن باسشىلىعىنىڭ اقپاراتىنا سايكەس, 2-جەو كومىر جانە مازۋتپەن تولىق قامتاماسىز ەتىلگەن. قازىرگى ۋاقىتتا قوردا 183 مىڭ توننا كومىر, 1833 توننا مازۋت بار. وتىن جەتكىزۋ كەستەگە سايكەس جۇزەگە اسىرىلادى.
جىلۋ ەلەكتر ورتالىقتارىندا ۋاقتىلى جۇرگىزىلگەن دايىندىق پەن قالپىنا كەلتىرۋ جۇمىستارى قالانىڭ جىلۋمەن قامتۋ جابدىقتارى مەن جۇيەلەرىنىڭ تۇراقتى جۇمىسىن قامتاماسىز ەتۋگە مۇمكىندىك بەردى. بيىلعى جىلىتۋ ماۋسىمى شتاتتىق رەجيمدە ءوتىپ جاتىر. قر ەنەرگەتيكا مينيسترلىگى بيىل نىساندى قاۋىپتىڭ «قىزىل» ايماعىنان «سارى» ايماققا شىعارۋدى جوسپارلاعان.
كاسىپورىندا پرەمەر-مينيسترگە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسىنىڭ ىسكە اسىرىلۋ بارىسى تۋرالى باياندالدى. بۇگىندە سولتۇستىك قازاقستان وبلىسىندا 363 مەديتسينالىق مەكەمەنى, 585 وقۋ ورنىن, 156 مادەنيەت جانە سپورت نىسانىن, سونداي-اق 1435 كوپپاتەرلى تۇرعىن ءۇيدى جىلۋمەن قامتاماسىز ەتەتىن 490 قازاندىق جۇمىس ىستەيدى.
«جىلۋمەن ۇزدىكسىز قامتاماسىز ەتۋ جۇمىسى مەملەكەت باسشىسىنىڭ ەرەكشە باقىلاۋىندا. سوڭعى ءبىر جىلدا ەلىمىزدەگى 55 جىلۋ كوزى جاڭعىرتىلدى. ۇكىمەت وسى باعىتتا ەنەرگەتيكالىق جانە كوممۋنالدىق سەكتورلاردى جاڭعىرتۋ جونىندەگى ۇلتتىق جوبانى ىسكە اسىرىپ جاتىر. جۇرگىزىلگەن جۇمىستاردىڭ ناتيجەسى بويىنشا ينجەنەرلىك جەلىلەردىڭ توزۋ دەڭگەيى 40%-عا دەيىن تومەندەپ, ەلەكتر ەنەرگياسىن ءوندىرۋ قۋاتى 7,3 گۆت-قا ارتادى دەپ بولجانۋدا. سونىمەن قاتار جوبالار 3,5 مىڭ جۇمىس ورنىن اشۋدى كوزدەيدى», دەدى پرەمەر-مينيستر.
