قازاقستان مەن رەسەيگە بىردەي ءوتىمدى «نوۆىي دەن» جانە «پروستو» ساۋدا بەلگىسىمەن ايگىلى «ميلح» سەرىكتەستىگى ىرىمشىك, سارىماي, قايماق, ايران, كىلەگەيدەن باستاپ بالمۇزداققا دەيىن تاۋلىگىنە 250 توننادان استام ءسۇت ونىمدەرىن شىعارادى. كومپانيانىڭ 4 زاۋىتى بار, ونىڭ بىرەۋى قوستانايدان 90 شاقىرىم جەردەگى مەڭدىقارا اۋدانى بوروۆسكوي اۋىلىندا ورنالاسقان. بۇگىندە ءتورت زاۋىتتا 710 ادام ەڭبەك ەتىپ جاتىر.
سەرىكتەستىك نەمىستىڭ «Deutsches Milchkontor Gmbh» كومپانياسىمەن بىرلەسىپ, وتكەن جىلدىڭ قاراشا ايىندا بوروۆسكوي اۋىلىندا قاتتى ىرىمشىكتىڭ جيىرمادان استام ءتۇرىن شىعاراتىن ءىرى ءوندىرىس ورنىن ىسكە قوسقان.
كاسىپورىننىڭ عانا ەمەس, بۇتىندەي ءبىر ءوڭىردىڭ ءوندىرىس سالاسىنا سەرپىن بەرگەن اۋقىمدى جوباعا 7,2 ملرد تەڭگە ينۆەستيتسيا سالىندى. كاسىپورىن اكتسياسىنىڭ 90 پايىزدان استامى نەمىس كومپانياسىنا تيەسىلى. جاڭا زاۋىتقا «Karl Schnel», «Reih» ءتارىزدى الەمدىك تاماق وندىرىسىندە بەلگىلى نەمىس كومپانيالارىنىڭ وندىرىستىك قۇرىلعىلارى ورناتىلدى. ءوندىرىس جەلىلەرىنىڭ ءبارى تولىقتاي اۆتوماتتى جۇيەدە جۇمىس ىستەيدى. اۋىل ءونىمىن الەمگە تاراتىپ جاتقان كاسىپورىندا 35 ادام ەڭبەك ەتەدى.
«ميلح» ونىمدەرى بۇگىندە ەلىمىزدىڭ بارلىق ايماعىنا, رەسەيدىڭ ماسكەۋ, سانكت-پەتەربۋرگ, چەليابى, ءنوۆوسىبىر, ور, پەتروپاۆل-كامچاتسك, يركۋتسك, ساحا وڭىرلەرىنە ەكسپورتتالادى.
مۇنىڭ سىرتىندا, كومپانيا ءوز ونىمدەرىن باتىس ەۋروپا نارىعىنا شىعارۋدى كوزدەپ وتىر. «ميلح» سەرىكتەستىگىنىڭ گەرمانياداعى ارىپتەسى «Deutsches Milchkontor Gmbh» كومپانياسىنىڭ ەۋروپا ەلدەرىندە 300-دەن اسا سۋپەرماركەتى بار. تاياۋدا عانا قوس تاراپ قوستاناي ىرىمشىكتەرىن وسى ساۋدا نۇكتەلەرىنە شىعارۋدىڭ جاي-جاپسارىن پىسىقتاپ, ورتاق مامىلەگە كەلگەن. كومپانيا ونىمدەرىنىڭ ەۋروپا نارىعىنداعى جىلدىق ساۋدا اينالىمىنىڭ كولەمى شامامەن 500 ملن ەۋرودان اساتىن بولادى.
كەلىسىلگەن جوبا بويىنشا قوستاناي ءسۇت ونىمدەرىنىڭ ەڭ ءىرى ساۋدا نۇكتەسى گامبۋرگتە بولادى. ودان ءارى بۇكىل گەرمانياعا, ودان قالدى لوندون, ۆارشاۆا, امستەردام, بريۋسسەل, پاريج, ۆەنا, مادريد, ميلانعا تارايدى.
«كەزىندە قازاقستاننان سىرتقا قونىس اۋدارعان جۇرتتىڭ ءبىرازى بۇگىندە ەۋروپا ەلدەرىندە تۇرىپ جاتىر. ولار قازاقستان ونىمدەرىنىڭ تابيعي شيكىزاتتان جاسالاتىنىن جاقسى بىلەدى. سوندىقتان ول جاقتاعى تۇتىنۋشىلار ءبىزدىڭ تاۋارلارىمىزدى اتتاي قالاپ الاتىنىنا سەنىمدىمىز», دەيدى كومپانيا باسشىسى سەرگەي بلوك.
ساۋدا جانە ينتەگراتسيا ءمينيسترى ارمان شاققاليەۆ كومپانيا جۇمىسىنا جوعارى باعا بەرىپ, كاسىپورىن باسشىسى سەرگەي بلوكقا وتاندىق ءونىمنىڭ ەۋروپا نارىعىنا شىعارۋعا بارىنشا قولداۋ كورسەتەتىنىن ايتتى.
«ميلح» بۇگىندە قوستانايدىڭ ماڭايىنداعى ەلدى مەكەندەردە سيىر ۇستاپ وتىرعان
12 مىڭ وتباسىنان ءسۇت ساتىپ الادى. وسىنىڭ ناتيجەسىندە 40 مىڭ ادام تۇراقتى تابىس تاۋىپ وتىر. ولاردىڭ قاتارىندا قوستاناي اۋدانىنا قاراستى موسكوۆسكي اۋىلىنداعى «بولاشاق» اۋىلشارۋاشىلىق كووپەراتيۆى دە بار. كووپەراتيۆ باسشىسى ازات ءميشتوريدىڭ ايتۋىنشا, اۋىل تۇرعىندارى بىرىگىپ, ءسۇت ءوندىرىپ ساتۋعا جۇمىلعالى قولداعى ساۋىن سيىردان تۇسەتىن تابىس تا ەسەلەنە تۇسكەن.
دەگەنمەن ءوندىرىسى اۋقىمدى كاسىپورىن, اسىرەسە قىس ماۋسىمىندا شيكىزاتتان قىسىلىپ قالادى. كومپانيا باسشىسى وندىرىسكە قاجەتتى كولەمدە ءسۇت جەتپەي قالاتىن كەزدەر بولىپ تۇراتىنىن, بىراق مۇنىڭ ءبارى الداعى ۋاقىتتا شەشىمى تابىلاتىن ۋاقىتشا قيىندىق ەكەنىن ايتتى. ويتكەنى بۇگىندە وڭىردە مىڭداپ سيىر ۇستايتىن كوپتەگەن ءىرى ءسۇت فەرمالارى سالىنىپ جاتىر. بۇل فەرمالار ىسكە قوسىلىپ, ءونىم بەرە باستاسا, ءوندىرىس تە شيكىزاتتان تارىقپايدى.
ارمان شاققاليەۆ جۇمىس ساپارىنىڭ سوڭىندا ءوڭىر تۇرعىندارىمەن, جەكە كاسىپكەرلەرمەن كەزدەسىپ, كوپتىڭ كوكەيىندە جۇرگەن ءبىرتالاي ساۋالدارعا جاۋاپ بەردى.
قوستاناي وبلىسى
