اليمەنت ءوندىرۋدىڭ ازابى

وتاۋ قۇرعان جاستاردىڭ جولى نەلىك­تەن ەكىگە ايىرىلىپ جاتاتىنى – جەكە باس ماسەلەسى. ايتكەنمەن, اجىراسۋ دەرەگى تىركەلگەننەن كەيىن اليمەنت تولەۋگە كەلگەندە ات-تونىن الا قاشاتىندار از ەمەس. بالا الدىن­داعى بورىشىن وتەۋدەن جالتارعى­سى كە­لە­تىن­دەرگە قانداي شارا قولدانى­لا­دى؟

وبلىستىق ادىلەت دەپارتامەنتىنىڭ باسشىسى نۇرعالي انداسوۆتىڭ ايتۋىنشا, وڭىردە اليمەنت ءوندىرىپ الۋ جونىندەگى قۇجات سانى 16 مىڭنان اسىپ كەتكەن.

«اليمەنت ءوندىرۋ ءبىر رەتتىك اتقارۋ­شى­لىق ءىس ساناتىنا جاتپايدى. بالا كامەلەت جاسىنا تولعانعا دەيىن بىرنەشە جىلعا سوزىلادى. وسىنى ەسكەرگەن ءجون شىعار. وكى­نىشكە قاراي, كەيبىر بورىشكەرلەر ناقتى ماتەريالدىق مۇمكىندىككە يە بولا تۇرا, ءوز بالاسىن اسىراۋدان سانالى تۇردە جالتارادى. كىرىسى مەن مۇلكىن جاسىراتىن ەر ازاماتتار دا بارشىلىق», دەيدى دەپارتامەنت باسشىسى.

جەكە تابىسىن جاسىراتىندار تۋرالى اڭگىمەنى بۇرىن دا ەستيتىنبىز. ەندى رەسمي دەرەكتى بىلگەننەن كەيىن ەر ازاماتتار تاراپىنان ورىن العان دۇنيەقوڭىزدىق ءبىزدى دە تاڭعالدىرىپ وتىر. وزىنەن اياماعاندى تۋعان بالاسىنان اياعانى نەسى ەكەن؟

ن.انداسوۆ كەلتىرگەن دەرەككە جۇگىن­سەك, سوت ورىنداۋشىلار قولعا العان 16 314 ا­ليمەنت ءوندىرۋ قۇجا­تى­نىڭ 6 177-ءسى مەر­زىمگە ساي ورىندالۋى ءۇشىن قادا­عا­لاۋعا الىنعان بولسا, 9 447 ازامات الي­مەنتتى ءوز ەركى­مەن تولەپ جاتىر ەكەن. ال اليمەنت تولەۋدەن بەرەشەگى ءۇش ايدان اسقان 439 اتقارۋشىلىق قۇجات بار. 201 پروبلەمالىق اليمەنت بويىنشا جالپى بەرەشەك 224 658 123 تەڭگەنى قۇراعان. بەرەشەك سومانىڭ 224 ملن-نان اسىپ كەتكەنىنە قاراپ, ءاربىر ازاماتتىڭ موينىندا ورتا ەسەپپەن ملن-نان اسا قارىز بار دەپ بولجاۋعا بولاتىن سەكىلدى.

بىرنەشە جىل بۇرىن اكەنىڭ نەم­قۇ­رايدىعى ءۇشىن اليمەنتتى اتا-اجە­گە تولەتۋ تۋرالى اڭگىمە قوزعالعان ەدى. بىلەتىندەر مۇنى يتاليا ەلىنىڭ تاجىريبەسى دەپ ايت­قانى جادىمىزدا. سول يتاليا تاجىري­بەسى اقىرى جامبىل وبلىسىنا دا جەتكەن سەكىلدى. بالاسىنىڭ بەرەشەگىن اتا-اجە وتەيتىن كەز دە الىس ەمەس. سونداي-اق بورىشكەر ايەلدەردەن اليمەنت ءوندىرۋ ءىسى دە جۇيەلى جۇرگىزىلىپ جاتىر.

«وڭىردە جەكە سوت ورىنداۋشىلار 366 ايەل ازاماتتان اليمەنت ءوندىرۋ تۋرالى اتقارۋ ءوندىرىسىن قولعا العان. سونداي-اق اپاسىنان اليمەنت ءوندىرۋ تۋرالى ءبىر اتقارۋ ءوندىرىسى ورىنداۋدا بار ەكەنىن ايتا كەتكەن ءجون. قازىرگى تاڭدا سوت اتا-اپاسىنان بەرەشەكتى الۋ تالاپ-ارىزىن قاراپ جاتىر», دەيدى ن.اندوسوۆ.

اليمەنت تولەۋدەن سانالى تۇردە جالتاراتىندارمەن قاتار, جۇمىس­سىز­دىق سالدارىنان بورىشىن وتەي الماي جۇرگەن ازاماتتار دا جەتكىلىكتى. وسى ولقى­لىقتىڭ ورنىن تولتىرۋعا وڭىردە ايتارلىقتاي جۇمىس قولعا الىنىپتى. ادىلەت دەپارتامەنتىنىڭ باسشىسى كەلتىرگەن مالىمەتكە سۇيەن­سەك, وتكەن جىلى وڭىردە اليمەنت تو­لەۋ­دەن قارىزى بار بورىشكەرلەردى جۇمىسقا ورنالاستىرۋ ماقساتىندا 26 جارمەڭكە ۇيىمداستىرىلىپ, ناتيجەسىندە 228 ازامات جۇمىسقا ورنالاسىپتى. سونىمەن قاتار جەكە سوت ورىنداۋشىلارىنىڭ جول­داماسىمەن 153 ادام ءتۇرلى سەرىك­تەستىك پەن شارۋا قوجالىعىنا جۇمىسقا تۇرعان. جالپى العاندا, 381 ازامات جۇمىسپەن قامتىلعان. بۇل دا ءبىر يگى ءىس ەكەنى انىق.

دەپارتامەنت باسشىسى كەلتىرگەن دەرەكتەر كىمدى دە بولسىن ويلاندىرماي قويمايدى. ارينە, وتباسىلىق ومىردەگى ماسەلەلەردى شاعىن مەملەكەت مۇشەلەرى وزدەرى شەشەدى. الايدا جۇبى جاراسپاي ەكىگە ايىرىلعان وتباسىلاردىڭ اليمەنت تولەۋگە كەلگەندە جالتارىپ كەتۋگە ۇمتىلاتىنى جانعا باتادى.