قىزىلوردادا ءابدىلدا تاجىباەۆتىڭ ەسكەرتكىش-ءبيۋستى اشىلدى

استانا. 18 ماۋسىم. كەشە قىزىلوردا قالاسىندا قازاقستاننىڭ حالىق جازۋشىسى, مەملەكەتتتىك سىيلىقتىڭ لاۋرەاتى, كورنەكتى اقىن-دراماتۋرگ, ادەبيەت زەرتتەۋشىسى ءابدىلدا تاجىباەۆتىڭ ەسكەرتكىش-ءبيۋستى اشىلدى. بۇل تۋرالى «سىر بويى» گازەتى حابارلادى. ەسكەرتكىشتىڭ اشىلۋ سالتاناتىنا وبلىس اكىمى قىرىمبەك كوشەرباەۆ پەن اقىننىڭ تۋعان-تۋىستارى قاتىستى. 1909 جىلى اقمەشىت (قىزىلوردا) قالاسىندا تۋعان اقىن بالالىق شاعىن قاراوزەك جەرىندە وتكىزدى. وتكەن عاسىردىڭ 20-شى جىلدارىنىڭ اياعىنان باستاپ تۋعان ادەبيەتىمىزدى كوركەيتۋگە بەلسەنە ارالاستى. 1998 جىلى ومىردەن وتكەن عالىم-قالامگەر ءوزىنىڭ ۇزاق جىلدارعا سوزىلعان شىعارماشىلىق عۇمىرىندا ارتىندا مول مۇرا قالدىرىپ كەتتى. ايتۋلى اقىنعا قازاقتىڭ قاي جەرىندە ەسكەرتكىش قويسا دا جاراسادى. ال بۇل ءبيۋستتىڭ ورنى بولەك. ويتكەنى, ءوزىنىڭ تۋعان جەرىندە, ءوزىنىڭ ەسىمىمەن اتالاتىن ۇلكەن رۋحاني شاڭىراق – وبلىستىق امبەباپ كىتاپحانانىڭ الدىنا قويىلدى. وبلىس اكىمى قىرىمبەك كوشەرباەۆ اقىندى ۇلىقتاۋعا ارنالعان شارادا قۇتتىقتاۋ ءسوز سويلەپ, ءابدىلدا تاجىباەۆتىڭ ونەرى وسكەلەڭ ۇرپاققا ونەگە بولۋ كەرەك ەكەندىگىن تىلگە تيەك ەتتى. «سىر توپىراعىنان شىققان جارىق جۇلدىزدارىمىزدى ۇلىقتاپ, ولارعا لايىقتى قۇرمەت كورسەتۋ – ءبىزدىڭ پەرزەنتتىك پارىزىمىز. بۇل ەسكەرتكىشتىڭ قىزىلوردانىڭ كوركىنە كورىك قوسىپ, جاستارىمىزدىڭ بويىنا پاتريوتتىق سەزىم بەرەتىن رۋحاني ورىنعا اينالاتىنىنا سەنەمىز. ءابدىلدا تاجىباەۆتىڭ جالىندى جىرلارى جىل وتكەن سايىن ودان ءارى اسقاقتاپ جاستاردى ورلىككە, بيىكتىككە شاقىرىپ, تەڭىز تەرەڭىندەگى مارجانداي جارقىراي بەرەتىنى ءسوزسىز», – دەدى وبلىس اكىمى. اقىننىڭ قىزى زيفا تاجىباەۆا اكەسى جايلى ەستەلىك ايتىپ, جەرلەستەرىنە كورسەتىپ جاتقان قۇرمەتتەرى ءۇشىن العىسىن جەتكىزدى. شارا سوڭى قوناقتاردىڭ «جۇلدىز شاشقان جىرلار» اتتى تاجىباەۆ وقۋلارىمەن, «ۇلتتىق پوەزيا بايتەرەگى» دەگەن كىتاپ كورمەسىمەن جانە اقىن مۋزەيىمەن تانىسۋلارىمەن اياقتالدى. تالعات رايىمبەك. دەرەك, سۋرەت: سىر بويى.