فوتو: old.syrboyi.kz
دەپۋتاتتىڭ پىكىرىنشە, ادامزات تاريحىندا سالىق سالاسى ۇنەمى رەفورمالانىپ كەلەدى. بىردە سالىق ارتسا, بىردە تومەندەتىلەدى. بۇل ءبىزدىڭ ەلدەگى «اشىق قوعام» تۇجىرىمداماسىنىڭ ومىرشەڭدىگىنىڭ ناقتى كورىنىسى. سونداي-اق ول كۇندەلىكتى اقپارات بەتتەرىنەن, كەزدەسۋلەردە ءارتۇرلى پىكىرلەرمەن تانىسىپ جاتقاندىعىنا توقتالىپ, اركىمنىڭ ءوز ويىن, ارگۋمەنتىن ايتۋعا قۇقىعى بار ەكەندىگىن ايتتى.
«بۇگىن مەملەكەت باسشىسى وتاندىق بيزنەس وكىلدەرىمەن كەزدەسۋدە ۇكىمەتكە مەزگىل ماسەلەسىنە اينالعان تاقىرىپقا بايلانىستى ءوز پىكىرىن جەتكىزدى. ءوز سوزىندە: «ۇكىمەت تۇپكىلىكتى شەشىمدى بىلىكتى ساراپشىلاردىڭ, قايتالاپ ايتامىن, بىلىكتى ساراپشىلار مەن كاسىپكەرلەردىڭ, البەتتە دەپۋتاتتاردىڭ پىكىرىنە قۇلاق اسا وتىرىپ, ناقتى ەسەپتەۋلەر نەگىزىندە قابىلداعانى دۇرىس», دەدى. ياعني, «حالىق ۇنىنە قۇلاق اساتىن مەملەكەت» تۇجىرىمداماسىنا سۇيەنىپ, مۇددەلى جاقتاردىڭ پىكىرلەرىن ەسكەرە وتىرىپ, شەشىم قابىلداۋ ماڭىزدى», دەدى ناۋرىزباي بايقاداموۆ.
ناۋرىزباي بايقاداموۆ كونستيتۋتسيا بويىنشا الەۋمەتتىك مەملەكەت ەكەنىمىزدى ەسكە سالىپ, سالىق حالىققا اۋىر سالماق بولماۋى ءتيىس ەكەندىگىن اتاپ ءوتتى.
«ارينە ۇكىمەتتىڭ ماقساتى ءبارىمىز ءۇشىن قاجەتتى بيۋدجەت تاپشىلىعىن شەشۋ. بۇنىڭ ەكى جاعى بار. رەفورما كاسىپكەرلىكتىڭ دامۋىنا وڭتايلى جولدى قاراستىرا وتىرىپ, تۇتىنۋشىلاردىڭ ساتىپ الۋ قابىلەتىن تومەندەتپەۋىمىز كەرەك. ققس-تىڭ سارالانعان مولشەرلەمەسى ارقىلى الەۋمەتتىك ماڭىزى بار تاۋارلاردىڭ قولجەتىمدىلىك دەڭگەيى ەسەپكە الىنادى. مىسالى, ازىق-ت ۇلىك, ءدارى-دارمەك, ءبىلىم بەرۋ جانە دەنساۋلىق ساقتاۋ قىزمەتتەرىنە ققس-تىڭ تومەن بولۋى ارقىلى ولاردىڭ از قامتىلعان ازاماتتارعا قولجەتىمدىلىگى باستى نازاردا بولادى دەپ كۇتىلۋدە. سونىمەن قاتار, اۋىل شارۋشىلىعى, مەديتسينا نەمەسە ءبىلىم بەرۋ سياقتى سالالارعا سالىقتى تومەندەتۋ باعالاردى باقىلاۋعا, وسى باعىتتاعى ونىمدەردى وندىرۋگە كاسىپكەرلەرىمىزدى ىنتالاندىرۋعا ىقپال ەتەدى دەپ سانايمىز. وسى ءادىس ارقىلى دەنساۋلىققا نەمەسە قورشاعان ورتاعا زيان تاۋارلارعا سالىق مولشەرىن ارتتىرىپ ونىڭ اينالىمىن ازايتۋ دۇرىس ۇستانىم بولادى», دەدى دەپۋتات.
جالپى العاندا, سالىق ساياساتى ادىلەتتىلىك قاعيداتتارىنان اۋىتقىماۋى وزەكتى. دەپۋتاتتىڭ ايتۋىنشا, سالىق تولەۋ مادەنيەتىنىڭ دەڭگەيى دە تومەندەمەۋى ءتيىس. حالىق پەن بيلىك ەكى كاتەگوريا بولعانىمەن قوعامنىڭ ەكى قۇرامداس بولىگى بولىپ تابىلاتىن ءبىرتۇتاس دۇنيە. سوندىقتان شەشىم ەلىمىز ءۇشىن, ءبارىمىز ءۇشىن ءادىل دە ءتيىمدى بولۋى كەرەك.
