ميحال لابەندا 2004 جىلدىڭ 1 مامىرىندا پولشا ەۋروپالىق وداقتىڭ تولىققاندى مۇشەسى بولعانىن, بۇل وقيعانىڭ ەل ءۇشىن تاريحي كەزەڭ ەكەنىن اتاپ ءوتتى. وسى 20 جىل ىشىندە پولشا حالىقارالىق ارەنادا ءوز پوزيتسيالارىن نىعايتىپ, ازاماتتارىنىڭ ءومىر ءسۇرۋ ساپاسىن جاقسارتىپ, ماڭىزدى ينۆەستيتسيالار تارتتى.
ديپلوماتتىڭ ايتۋىنشا, ەۋروپالىق قورلار ينفراقۇرىلىمدىق جانە الەۋمەتتىك جوبالاردى جۇزەگە اسىرۋعا مۇمكىندىك بەرىپ, بۇل ەلدىڭ جانە ونىڭ استاناسى ۆارشاۆا قالاسىنىڭ كەلبەتىنىڭ تۇبەگەيلى وزگەرۋىنە اكەلدى.
لەكتسيانىڭ مازمۇنى مەن ونىڭ قازاق تىلىندە ءوتۋى تىڭداۋشىلارعا ۇلكەن اسەر قالدىردى. ميحال لابەندا قازاق ءتىلىن ەركىن مەڭگەرگەن. ديپلومات ءتىلدىڭ حالىقتىڭ مادەنيەتى مەن رۋحىن ءتۇسىنۋدىڭ نەگىزى ەكەنىن ايتادى.
ديپلوماتتىڭ قازاق ءتىلى مەن مادەنيەتىنە دەگەن قىزىعۋشىلىعى كەزدەيسوق ەمەس. 1999 جىلى ول ءال-فارابي اتىنداعى قازاق ۇلتتىق ۋنيۆەرسيتەتىن «شىعىستانۋ» ماماندىعى بويىنشا ۇزدىك ءبىتىرىپ, ديپلومدىق جۇمىسىن «اراب تىلىنەن قازاق تىلىنە باعىنىڭقى قۇرمالاس سويلەمدەردىڭ اۋدارما ۇلگىلەرى» تاقىرىبىندا قورعاعان.
قازاق جانە تۋعان تىلىنەن بولەك, ديپلومات ازەربايجان, اعىلشىن, اراب, نەمىس, ورىس, وزبەك جانە فرانتسۋز تىلدەرىن مەڭگەرگەن.
كەزدەسۋ سوڭىندا ميحال لابەندا تىڭداۋشىلاردىڭ سۇراقتارىنا جاۋاپ بەرىپ, ولارعا تابىس تىلەدى. اكادەميانىڭ رەكتورى ەرلان ءابىل ديپلوماتقا قىزىقتى ءدارىسى ءۇشىن العىس ايتىپ, الداعى ۋاقىتتا ىنتىماقتاستىققا ءۇمىت ءبىلدىردى.
