«قوستاناياگروونىم» سەرىكتەستىگىنە قاراستى مال سويۋ بەكەتىندە وتكەن تاجىريبەلىك ءبولىم بارىسىندا عاو ماماندارى جەرگىلىكتى ۆەتەرينارلاردىڭ ءتىرى مالدان, سونداي-اق سويىلعان مال مەن قۇستان قالاي سىناما الاتىنىن تاجىريبە تۇرىندە كورىپ, تەكسەردى. مال دارىگەرلەرى سىناما الۋ كەزىندە پايدالانىلاتىن ارنايى كوستيۋم, قولعاپ, كوزىلدىرىك, ماسكا سەكىلدى قورعانىش كيىمدەرىن دۇرىس كيىپ, دۇرىس شەشۋگە جاتتىقتى.
ء«ىس-شارانىڭ باستى ماقساتى – زەرتحانالىق دياگنوستيكا ۇلگىلەرىن جيناۋ, وراۋ, تاسىمالداۋ جانە وڭدەۋ تاجىريبەسىن جەتىلدىرۋ ارقىلى ءسىبىر جاراسى, برۋتسەللەز, قۇس تۇماۋى جانە پاستەرەللەز سياقتى قاۋىپتى اۋرۋلاردى ەپيدەميولوگيالىق باقىلاۋدىڭ ساپاسىن جاقسارتۋ. اسا قاۋىپتى ىندەتتىڭ الدىن الۋ, كەسەلدى تاپ باسىپ انىقتاۋ – ەڭ الدىمەن, دۇرىس الىنعان سىناماعا بايلانىستى. سىناما دۇرىس الىنباسا ينفەكتسيالىق اۋرۋ ۋشىعىپ كەتەدى. قانداي اۋرۋدا قانداي سىناما الۋ كەرەك, ونى مالدىڭ قاي جەرىنەن, قاي ورگاندارىنان الۋ كەرەك, ونى قانداي كونتەينەرگە جيناۋ كەرەك, ونى زەرتحاناعا قالاي جەتكىزۋ كەرەك, سىناما العاندا قانداي قۇجاتتار تولتىرۋ كەرەك دەگەن سۇراقتارعا جاۋاپ بەردىك. سونىمەن بىرگە سىناما الاتىن مامان قالاي كيىنۋ كەرەك دەگەن ماسەلە دە ايتىلدى. مال دارىگەرى جەكە قورعانىش كيىمىن دۇرىس كيىپ, دۇرىس شەشە ءبىلۋ كەرەك. ايتپەسە ماماننىڭ ءوزى كەسەل جۇقتىرىپ الۋى مۇمكىن», دەيدى عاو-نىڭ ۇلتتىق كەڭەسشىسى ەربول قامساەۆ.
وبلىستىق ۆەتەريناريا باسقارماسىنىڭ باسشىسى تولەگەن يمانباەۆتىڭ ايتۋىنشا, وڭىردە مال دارىگەرلەرىنىڭ ءبارى سىناما الۋدى جاقسى بىلەدى. الايدا جىل سايىن ولاردىڭ بىلىكتىلىگىن ارتتىرىپ, كاسىبي داعدىسىن شىڭداپ وتىرعان دۇرىس.
«وڭىردە مال باسى جىل وزعان سايىن كوبەيىپ جاتىر. شەتەلدەن دە مال اكەلىنىپ جاتىر. ولاردىڭ ءوز اۋرۋلارى بار. ونى دا دەرەۋ انىقتاۋىمىز قاجەت. قارا مالدىڭ وزىندە برۋتسەللەز, ءسىبىر جاراسى, اۋسىل ءتارىزدى اۋرۋ كوپ تارالادى. وتكەن جىلى وبلىستا مال اۋرۋىنىڭ وتىز شاقتى وشاعى تابىلسا, بيىل ءبىزدىڭ دارىگەرلەردىڭ شيراق قيمىلىنىڭ ارقاسىندا ونى بەسەۋگە دەيىن تومەندەتتىك. ماماندار ساپالى جۇمىس ىستەسە, كەز كەلگەن اۋرۋدىڭ الدىن الۋعا بولادى. مۇنداي ترەنينگتەر سول ءۇشىن وتە قاجەت», دەيدى تولەگەن يمانباەۆ.
ارقا اۋىلىنداعى ۆەتەرينارلىق پۋنكتتىڭ مەڭگەرۋشىسى ساعىنىش دەمەسىنوۆا مۇنداي ترەنينگتەن ءبىزدىڭ دە الارىمىز كوپ, كەيىنگى جاستار دا ءبىلىمىن جەتىلدىرە تۇسەدى دەيدى.
«وسىنداي شارالار ارقىلى ءوز كاسىبىمىزدى مەيلىنشە جەتىلدىرە تۇسسەك, ودان ەشكىم ۇتىلمايدى. راس, كەز كەلگەن مال اۋرۋىنىڭ الدىن السا, مال ونىمدەرىنىڭ ساپاسىنا دا كەپىلدىك بەرۋگە بولادى», دەيدى مامان.
قوستاناي وبلىسى
