فوتو: parlam.kz
ەسكە سالايىق, مەملەكەت باسشىسىنىڭ تاپسىرماسى نەگىزىندە 2022-2025 جىلدار ارالىعىندا ازاماتتىق قىزمەتكەرلەردىڭ, ونىڭ ىشىندە اتالعان تەحنيكالىق قىزمەتكەرلەردىڭ جالاقىسى كەزەڭ-كەزەڭىمەن (جىل سايىن ورتا ەسەپپەن 20%) ارتىپ كەلەدى.
الايدا, دەپۋتاتتىڭ ايتۋىنشا وسى تۇرعىداعى سۇراقتى تالداۋ بارىسىندا وڭىرلەر, اۋداندار جانە ءتىپتى ءبىر قالا ىشىندەگى مەكتەپتەر اراسىندا جالاقىنىڭ ءارتۇرلى دەڭگەيدە كوتەرىلگەنى بايقالعان.
تەحنيكالىق قىزمەتكەرلەر جالاقىنى ارتتىرۋ ءتاسىلىنىڭ ءارتۇرلى بولۋىنا شاعىم قالدىرىپ وتىرعانىن ايتقان دەپۋتات ج.سۇلەيمەنوۆانىڭ سوزىنشە AMANAT پارتياسى فراكتسياسى بۇل سۇراقتى ءاردايىم ايتىپ كەلەدى, بىلتىر دا حالىقپەن كەزدەسۋدەن كەيىن وسى سۇراقتىڭ شەشىمىن ۇسىناتىن دەپۋتاتتىق ساۋال جولداعان ەكەن.
«ەدەن جۋشى, پلوتنيك, سانتەحنيك, اۋلا سىپىرۋشى جانە ەلەكتريكتەر ساۋىقتىرۋ جاردەماقىسىن تولەۋ جانە ەڭبەكاقى جۇيەسىن جەتىلدىرۋ تۋرالى ءتۇسىندىرۋ اقپاراتىنان بەيحابار. اۋىر ەڭبەكتى ادال اتقارىپ جۇرگەن ناعىز ەڭبەك ادامدارىنا جالاقىنى ارتتىرۋدىڭ بىرىڭعاي مەتوديكاسى ساپالى ءتۇسىندىرىلۋى قاجەت. ولاردىڭ ەڭبەك دەمالىسىنا ساۋىقتىرۋ جاردەماقىسىن تولەۋدى قاراستىرۋ كەزەك كۇتتىرمەيتىن ماسەلە», دەدى جۇلدىز دوسبەرگەنقىزى.
دەپۋتاتتىڭ ايتۋىنشا سونىمەن قاتار, تەحنيكالىق قىزمەتكەرلەر اعىمداعى جوندەۋ جۇمىستارىن جاساپ ءجۇر جانە وعان ەڭبەكاقى تولەنىپ جاتقان جوق.
«اعىمداعى جوندەۋ جۇمىستارىنا بيۋدجەتتەن ارنايى قاراجات قاراستىرىلادى. ولاي بولسا, نەگە ونسىز دا ەڭبەگى اۋىر جالاقىسى تومەن ەڭبەك ادامدارى ونداي جۇمىستارعا تارتىلۋى ءتيىس؟ بۇل ەڭبەك زاڭدىلىعىنا قايشى. وسى ماسەلەگە ناقتى جاۋاپ بەرۋىڭىزدى سۇرايمىن.
كەلەسى ماسەلە, حلور قولداناتىن جۇمىستارى كۇردەلى تەحنيكالىق پەرسونالعا قوسىمشا اقى قاراستىرىلماعاندىعى ايتىلىپ جاتىر. بۇل ماسەلەنىڭ شەشىمى قالاي بولماق؟
وسى رەتتە, بيۋدجەتتىك ۇيىمدارداعى ورتا جانە كىشى بۋىن ماماندارى مەن قىزمەتشىلەردىڭ اتقاراتىن جۇمىسىنىڭ كۇردەلىلىگىنە جانە اۋىرلىعىنا ءارى ەرەكشەلىگىنە قاراي لايىقتى جالاقى تاعايىنداۋدىڭ مەتوديكاسىنا ستاج, جۇكتەمە, جۇمىستىڭ كۇردەلىلىگى دەڭگەيىن ەسكەرەتىن بىرىڭعاي جۇيە قاراستىرىلۋى ءتيىس جانە جالاقىنى ارتتىرۋدا وڭىرلىك جانە ىشكى تەڭگەرىمسىزدىكتى جويۋ شارت», دەپ اياقتادى دەپۋتاتتىق ساۋالىن جۇلدىز سۇلەيمەنوۆا.
