فوتو: ۇكىمەت
ءبىلىم بەرۋ وشاعى 80 ورىنعا لايىقتالىپ بوي تۇزەيدى. مەكتەپ سالىناتىن ايماق قالاداعى «تەمىرجول» ىقشام اۋدانى بولىپ بەكىتىلگەن. سەبەبى بۇگىندە وسى شاعىن اۋدان وقۋشىلارى قالانىڭ باسقا بولىگىندەگى مەكتەپكە قاتىناپ ءجۇر. ولاردى ەكى اۋىسىمدا ارنايى اۆتوبۋس تاسىمالدايدى.
«دەگەنمەن دە وقۋشىلاردىڭ قالاعا كەلىپ, كەتۋى قيىن. سوندىقتان دا حالىقتىڭ سۇراۋى بويىنشا, اتا-انا, بالالاردىڭ ءوتىنشى بويىنشا وسى «تەمىرجول» ىقشام اۋدانىندا جاڭا مەكتەپ سالىنادى. الداعى ۋاقىتتا, جاڭا مەكتەپ سالىنسا, ەسكى مەكتەپ عيماراتىنان بالاباقشا اشۋدى جوسپارلاپ وتىرمىز. بالاباقشا اشىلسا ۇيدە وتىرعان قانشاما جاس اتا-انا جۇمىسپەن قامتىلار ەدى», دەيدى قاراجال قالاسى ءبىلىم بەرۋ ءبولىمىنىڭ باسشىسى تىلەش اشتاەۆ.
ۇكىمەت ارناۋلى مەملەكەتتىك قوردان الەۋمەتتىك نىساندار سالۋ ءىسىن جالعاستىرادى. وسى ماقساتتى جۇزەگە اسىرۋ ءۇشىن جالپى جيىنى 56,6 ملرد تەڭگە بولىنگەن.
