فوتو: gov.kz
سالاعا قاتىستى زاڭ جوباسى ءماجىلىستىڭ ەرتەڭگى جالپى وتىرىسىندا تالقىلانادى. زاڭ جوباسىنداعى باستى جاڭالىق - قۇتقارۋشىلاردى باسپانامەن قامتۋ بولىپ وتىر. ويتكەنى جاۋاپكەرشىلىگى جوعارى سالا ماماندارىن الەۋمەتتىك قولداۋ وسى كۇنگە دەيىن كەمشىن قالىپ كەلگەن.
قر پارلامەنتى ءماجىلىسىنىڭ دەپۋتاتى ەربولات ءساتىبالديننىڭ ايتۋىنشا سوڭعى ءۇش جىلدا ەلدە 4406 ادام جۇمىس ورنىندا جاراقات السا, بىلتىر 131 ادام قازا تاپقان. بۇل وتە قاۋىپتى جۇمىس ورنىندا تەكسەرىستەر جۇزەگە اسىپ تۇرۋى كەرەكتىگىن كورسەتەدى.
«پرەزيدەنتىمىز ەلىمىزگە اسكەريلەنگەن تاۋ-كەن قۇتقارۋشىلارىنىڭ قاجەت ەكەنىن ايتتى. بۇرىنعى ۋاقىتتا بۇل ۇلكەن ءوندىرىس ورىندارىندا مىندەتتى بولعان. كەشەگى قاراعاندىدا كومىر شاحتاسىندا بولعان ۇلكەن اپاتتاردا سول اسكەريلەنگەن قۇتقارۋشىلاردىڭ قاجەتتىلىگى تۋىندادى», دەدى دەپۋتات.
سونداي-اق سەيسميكالىق قاۋىپسىزدىككە بايلانىستى توتەنشە جاعدايلار مينيسترلىگىنە ۇيلەستىرۋشى ورگان مارتەبەسىن بەرۋ ماسەلەسى دە قارالادى. بۇعان قوسا سالانىڭ قىزمەتتىك قۇزىرەتىن ءبىرشاما كەڭەيتۋ قاراستىرىلادى. جۇمىس توبى وكىلدەرىنىڭ مالىمدەۋىنشە, ازاماتتىق قورعانىس زاڭىنا كەيىنگى 10 جىلدا تۇزەتۋ ەنگىزىلمەگەن.
ءماجىلىس وتىرىسىندا سونىمەن قاتار قازاقستان مەن وزبەكستان ۇكىمەتتەرى اراسىنداعى «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ قىزمەتىن رەتتەۋ تۋرالى كەلىسىمدى راتيفيكاتسيالاۋ جوباسى دا كۇن تارتىبىنە ەنگىزىلگەن.
ء«ماجىلىس كوميتەتتەرى بىرقاتار جاڭا زاڭ جوباسىن جۇمىسقا قابىلدايدى. ولار: توپىراقتى قورعاۋ جانە جاساندى ينتەللەكت تۋرالى زاڭ جوبالارى مەن ولارعا ىلەسپە تۇزەتۋلەر, جەر قويناۋى جانە جەر قويناۋىن پايدالانۋ تۋرالى زاڭ جوباسى جانە قازاقستان مەن وزبەكستان ۇكىمەتتەرى اراسىنداعى قازاقستان-وزبەكستان مەملەكەتتىك شەكاراسىنىڭ رەجيمى تۋرالى كەلىسىمدى راتيفيكاتسيالاۋ جوباسى», دەلىنگەن ءماجىلىس حابارلاماسىندا.
