اكادەميانىڭ قىزمەتى ءبىلىم بەرۋ سالاسىنداعى يننوۆاتسيالىق زەرتتەۋلەر مەن يدەيالار الماسۋدى ىلگەرىلەتۋگە باعىتتالادى. سونداي-اق قازاقستان مەن جالپى ورتالىق ازياداعى ءبىلىم بەرۋ جۇيەلەرىن جاقسارتۋ ءۇشىن جاڭا مۇمكىندىكتەر اشادى. جيىنعا ارنايى كەلگەن گونكونگ ءبىلىم بەرۋ ۋنيۆەرسيتەتىنىڭ (EdUHK) پرەزيدەنتى, پروفەسسور - دجون لي چي-كيندى اباي ۋنيۆەرسيتەتىنىڭ باسقارما توراعاسى بولات تىلەپ قارسى الدى.
شاراعا قاتىسقان عىلىم جانە جوعارى ءبىلىم ءمينيسترى ساياسات نۇربەككە شەتەلدىك مەيماندار العىسىن ءبىلدىردى.
«بۇگىن ءبىز ءبىلىم بەرۋدى دامىتۋدىڭ جاڭا كەزەڭىنە جول اشىپ, ينكليۋزيۆتى ءبىلىم بەرۋ مەن جاساندى ينتەللەكتتى وتاندىق ءبىلىم بەرۋ جۇيەسىنە ەنگىزۋگە ماڭىزدى قادام جاساپ وتىرمىز. گونكونگ ءبىلىم بەرۋ ۋنيۆەرسيتەتىنىڭ (EdUHK) قولداۋىمەن قازاقستاندىق ءبىلىم بەرۋ اكادەمياسىنىڭ قۇرىلۋىنىڭ ەلىمىز ءۇشىن ماڭىزى زور», دەدى جيىندا ءسوز العان ۋنيۆەرسيتەت رەكتورى بولات اناپيا ۇلى.
وتاندىق ءبىلىم بەرۋ اكادەمياسىنىڭ اشىلۋى حالىقارالىق ءبىلىم مەن تاجىريبە الماسۋعا, وزىق تەحنولوگيالاردى وقۋ ۇدەرىسىنە ەنگىزۋگە مۇمكىندىك بەرەتىنى ءسوزسىز.
«گونكونگ ءبىلىم اكادەمياسىنىڭ قازاقستانداعى جەتەكشى ۋنيۆەرسيتەتتەردىڭ الدىڭعى قاتارىنداعى اباي اتىنداعى قازاق ۇلتتىق پەداگوگيكالىق ۋنيۆەرسيتەتى جانە قازاق ۇلتتىق قىزدار پەداگوگيكالىق ۋنيۆەرسيتەتى جانىنان «EdUHK - قازاقستان ءبىلىم بەرۋ اكادەمياسىن» اشۋ باستاماسى جوعارى وقۋ ورىندارى اراسىنداعى اكادەميالىق بايلانىستى نىعايتۋعا ىقپال ەتەتىن جاھاندىق جوبا», دەدى پروفەسسور دجون لي چي-كين.
جينالعاندار شارادان سوڭ گونكونگ ءبىلىم بەرۋ ۋنيۆەرسيتەتىنەن جانە ەلىمىزدىڭ وزگە وڭىرلەرىندەگى جوعارى وقۋ ورىندارىنان كەلگەن قوناقتار اباي ۋنيۆەرسيتەتى جانىنان اشىلعان «ينكليۋزيۆتى ءبىلىم بەرۋ جانە ءبىلىم بەرۋدەگى جاساندى ينتەللەكت» ورتالىعىنىڭ جۇمىسىمەن تانىستى. بۇل ورتالىق الداعى ۋاقىتتا ءبىلىم بەرۋ پروتسەسىنە جاساندى ينتەللەكت تەحنولوگيالارىن ەنگىزۋگە جانە وقىتۋ ساپاسىن جاقسارتۋعا ىقپالىن تيگىزەتىن بولادى. جاڭا ءبىلىم بەرۋ نىسانى پەداگوگيكا جانە ءبىلىم بەرۋ سالاسىندا وزىق زەرتتەۋلەر جۇرگىزەتىن ورىنعا اينالادى دەگەن جوسپار بار. زاماناۋي تەحنولوگيالار مەن تاسىلدەردى ۇيرەتۋ ارقىلى پەداگوگتاردى دايارلاۋ باعىتىندا دا جۇمىس جاسايدى.
