فوتو: اشىق دەرەككوز
2024 جىلى رەسپۋبليكا كولەمىندە 1026 مال ۇرلىعى تىركەلگەن. بۇل الدىڭعى جىلعى جالپى ۇرلىقتىڭ 3%-ىن قۇرايدى. اتالعان فاكتىلەردىڭ جارتىسىنان كوبى ەركىن جايىلىمدا جاسالعان. پوليتسيا 89 قىلمىستىق توپتى قۇرىقتادى. ولاردىڭ قۇرامىندا 572 مال ۇرىسى بولعان. ۇرلانعان مالدىڭ 4,5 مىڭنان استامى تابىلىپ, زاڭدى يەلەرىنە قايتارىلدى.
«جالپى قابىلدانعان كەشەندى شارالاردىڭ ارقاسىندا سوڭعى بەس جىلدا مال ۇرلىعى 64%-عا ازايدى. قىلمىستىڭ وسى تۇرىمەن كۇرەستى كۇشەيتۋ ماقساتىندا ىشكى ىستەر مينيسترلىگى باسقا مەملەكەتتىك ورگاندارمەن بىرلەسىپ, زاڭنامالىق, ۇيىمداستىرۋشىلىق جانە پراكتيكالىق شارالاردى تۇراقتى تۇردە جۇرگىزەدى», دەدى پوليتسيا دەپارتامەنتى باستىعى شىڭعىس الەكەشەۆ.
سپيكەردىڭ سوزىنشە, وسىنداي قادامداردىڭ ءبىرى رەتىندە اۋىل شارۋاشىلىعى جانۋارلارىن جايۋ ەرەجەلەرىن قابىلداۋدى اتاپ وتۋگە بولادى. سونداي-اق جايىلىم ەرەجەلەرىن بۇزعانى ءۇشىن اكىمشىلىك قۇقىق بۇزۋشىلىق تۋرالى كودەكستىڭ 408-بابىنا سايكەس اكىمشىلىك جاۋاپكەرشىلىك بەلگىلەنگەن. 2024 جىلى 38,5 مىڭنان استام وسىنداي بۇزۋشىلىق انىقتالدى. ودان بولەك, مال ۇرلىعى ءۇشىن قىلمىستىق كودەكسكە جەكە باپ ەنگىزىلگەن. وندا مۇلكى تاركىلەنىپ, 12 جىلعا دەيىن باس بوستاندىعىنان ايىرۋ جازاسى قاراستىرىلعان.
وتكەن جىلى مال ۇرلىعىنا قارسى رەسپۋبليكالىق دەڭگەيدە 2 ءىس-شارا, وڭىرلىك دەڭگەيدە 76 ءىس-شارا وتكىزىلگەن.
ال بيىلعى جىلدىڭ قاڭتار ايىندا ەلىمىزدە 69 مال ۇرلىعى تىركەلدى. 53 كۇدىكتى ۇستالدى. 10 قىلمىستىق توپ اشكەرەلەندى. ۇرلانعان 450 مالدىڭ 134-ءى يەلەرىنە قايتارىلدى.
مالدى قىلمىستىق قول سۇعۋشىلىقتان قورعاۋ ءۇشىن مينيسترلىك قاراپايىم ەرەجەلەردى ساقتاۋدى ۇسىنادى. ماسەلەن, مالدى قاراۋسىز قالدىرماۋ, GPS-ترەكەرلەرىن ورناتۋ, مالعا ەن سالىپ, تاڭبالاۋ جانە چيپتەۋ – كوپتەگەن ۇرلىقتىڭ الدىن الاتىن ءىس-ارەكەتتەر.
