فوتو: مەملەكەتتىك قىزمەت ىستەرى اگەنتتىگى
اگەنتتىك توراعاسى دارحان جازىقباي مەملەكەت باسشىسى قاسىم-جومارت كەمەل ۇلى توقاەۆتىڭ مەملەكەتتىك قىزمەتتى جاڭعىرتۋ بويىنشا العا قويعان مىندەتتەرى سەرۆيستىك جانە ادامعا باعدارلانعان قاعيداتتارى نەگىزىندە جۇزەگە اسىرىلىپ جاتقانىن ايتتى.
وتكەن جىلى اگەنتتىكتىڭ باستاماسىمەن مەملەكەتتىك قىزمەتتى جەتىلدىرۋگە بايلانىستى «مەملەكەتتىك قىزمەتى تۋرالى» زاڭعا 7 زاڭمەن وزگەرىستەر ەنگىزىلىپ, 26 نورماتيۆتىك قۇقىقتىق اكتى قابىلداندى.
«مەملەكەتتىك قىزمەتتىڭ گيبريدتى مودەلى نەگىزىندە مەملەكەتتىك اپپاراتتى كاسىبيلەندىرۋ, ءتيىمدى HR-قۇرالدارىن ەنگىزۋ, مەملەكەتتىك ورگانداردىڭ كادرلىق الەۋەتىن نىعايتۋدى كوزدەيتىن مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسى بەكىتىلدى. تۇجىرىمداماعا سايكەس اگەنتتىك «مەملەكەتتىك قىزمەت تۋرالى» جاڭا زاڭ جوباسىن ازىرلەدى. جاڭا زاڭ مەملەكەتتىك قىزمەتتەگى ەڭبەك قاتىناستارىمەن قاتار قوعام مەن مەملەكەتتىك اپپاراتتىڭ ءوزارا ءىس-قيمىلىنىڭ جاڭا پاراديگماسىن رەتتەيدى. سونداي-اق ىرىكتەۋ جۇيەسىن جاڭعىرتۋ, ەرتە كاسىبي باعدارلاۋ مەحانيزمدەرىن ەنگىزۋ, گوريزونتالدى ءوسۋ مۇمكىندىكتەرىن قاراستىرۋ, قىزمەتشىلەرگە الەۋمەتتىك كەپىلدىكتەردى جاقسارتۋ ماسەلەلەرىن قايتا قاراۋ كوزدەلگەن. زاڭ جوباسى اياسىندا 70-كە جۋىق زاڭعا تاۋەلدى نورماتيۆتىك قۇقىقتىق اكتىلەر جاڭا رەداكتسيادا ازىرلەنەدى», دەلىنگەن حابارلامادا.
دارحان جازىقباي مەملەكەتتىك قىزمەتكە كىرۋدەگى ارتىق كەدەرگىلەردى جويۋعا باعىتتالعان جۇمىستاردىڭ ناتيجەلەرىنە توقتالدى. اگەنتتىكتىڭ كەلىسىمى بويىنشا جەكە جانە كۆازيمەملەكەتتىك سەكتوردان 184 مامان باسشى لاۋازىمدارعا تىكەلەي تاعايىندالعان. سوڭعى ەكى جىلدا جوعارى وقۋ ورىندارىن ۇزدىك بىتىرگەن 445 تۇلەك كونكۋرس وتكىزىلمەستەن اۋداندىق جانە اۋىلدىق دەڭگەيدەگى لاۋازىمدارعا جۇمىسقا ورنالاستىرىلعان. ونىڭ ايتۋىنشا, بۇل بىلىكتى مامانداردى مەملەكەتتىك قىزمەتكە تارتۋعا جانە شالعاي وڭىرلەردەگى كادر تاپشىلىعىن شەشۋگە وڭ ىقپالىن تيگىزىپ جاتىر.
«مەملەكەتتىك قىزمەتتەگى ونلاين ىرىكتەۋ جۇيەسى جوعارى تيىمدىلىكتى كورسەتتى. اۆتوماتتاندىرىلعان «eQyzmet» 68 مەملەكەتتىك ورگاندا ءساتتى ىسكە اسىرىلىپ, بيىل قالعان 26 مەملەكەتتىك ورگاندارعا ەنگىزۋ اياقتالادى. ءبىر بوس ورىنعا جاريالانعان كونكۋرسقا ۇمىتكەرلەر ءداستۇرلى ىرىكتەۋمەن سالىستىرعاندا ورتا ەسەپپەن ءبىر جارىم ەسەگە ارتتى. اگەنتتىك مەملەكەت باسشىسىنىڭ بيۋدجەتتەن قارجىلاندىرىلاتىن مەكەمەلەردىڭ كادر قىزمەتىن تولىق اۆتوماتتاندىرۋ بويىنشا تاپسىرماسىن ىسكە اسىرۋ ماقساتىندا بىرىڭعاي كادر جۇيەسىنە 37 مەملەكەتتىك ورگاننىڭ 500 مىڭنان استام ادام قىزمەت اتقاراتىن 2400-گە جۋىق ۆەدومستۆولىق ۇيىمداردى قوسۋ بويىنشا جۇمىستار جۇرگىزۋدە. ءبىرىنشى كەزەڭدە 8 مەملەكەتتىك ورگاننىڭ 19 ۇيىمى قوسىلدى», دەلىنگەن حابارلامادا.
اگەنتتىك توراعاسى مەملەكەتتىك قىزمەتتەگى كادرلىق پروتسەستەردى تسيفرلاندىرۋ اياسىندا «eQyzmet» جۇيەسىندە تسيفرلىق رەيتينگ ءمودۋلى ىسكە قوسىلعانىن اتاپ ءوتتى. مودۋل ەلەكتروندىق جەكە ىستەردىڭ دەرەكتەرى نەگىزىندە ساياسي جانە «ا» كورپۋسى لاۋازىمدارىنا جوعارى تاجىريبەسى مەن بىلىكتىلىگى بار الەۋەتتى ۇمىتكەرلەردىڭ تىزبەسىن جاساۋعا مۇمكىندىك بەرەدى.
سونداي-اق دارحان جازىقباي, 2024 جىلى مەملەكەتتىك كورسەتىلەتىن قىزمەتتەردى باقىلاۋ ءىس-شارالارىنىڭ قورىتىندىسى بويىنشا 150 مىڭنان استام بۇزۋشىلىق انىقتالعانىن, ونىڭ 37% قاشىقتىقتان جۇرگىزىلگەن مونيتورينگ ارقىلى بەلگىلى بولعانىن ايتتى. بۇل تاجىريبە مەملەكەتتىك ورگانداردىڭ جاۋاپكەرشىلىكتەرىن ارتتىرىپ, پرواكتيۆتى جۇمىس ىستەۋگە ءوز سەپتىگىن تيگىزەدى.
مەملەكەتتىك اپپارات قىزمەتىن بيۋروكراتيادان ارىلتۋ بويىنشا جۇرگىزىلگەن تالداۋ جانە مونيتورينگ جۇمىستارى ناتيجەسىندە 2024 جىلى توتەنشە جاعدايلار, ەنەرگەتيكا, سۋ رەسۋرستارى جانە يرريگاتسيا سالالارى بويىنشا ازىرلەنگەن 260 ۇسىنىس ۇكىمەت اپپاراتىنىڭ قاراۋىنا ەنگىزىلدى.
اگەنتتىك باستاماسىمەن مەملەكەتتىك قىزمەت سالاسىنداعى بۇزۋشىلىقتار ءۇشىن جازانىڭ بۇلتارتپاۋشىلىق ءپرينتسيپىن دايەكتى تۇردە جۇزەگە اسىرۋ مەحانيزمدەرى ايقىندالدى. بيىلعى جىلدان باستاپ مەملەكەتتىك قىزمەتشىلەر باسقا مەملەكەتتىك ورگانعا اۋىسۋىنا قاراماستان, بۇرىنعى لاۋازىمدا جاساعان تەرىس قىلىقتارى ءۇشىن جاۋاپتىلىقتان بوساتىلمايدى. دەگەنمەن, باقىلاۋ شارالارى تەك زاڭ بۇزۋشىلىقتىڭ سالدارىن انىقتاۋمەن شەكتەلمەي, ونىڭ الدىن الۋعا باعىتتالۋى قاجەت ەكەندىگى ايتىلدى.
باسەكەگە قابىلەتتى مەملەكەتتىك قىزمەت پەن وعان قاجەتتى قۇزىرەتتىلىكتەرگە يە مەملەكەتتىك قىزمەتشىلەردى دايارلاۋ ماڭىزدىلىعىن ەسكەرە وتىرىپ, بىرىككەن اراب امىرلىگىندە 32 قىزمەتكەر وقىتۋدان, تۇركيا رەسپۋبليكاسىندا 35 مەملەكەتتىك قىزمەتشى تاعىلىمدامادان وتكەن. اگەنتتىك پەن اقش-تىڭ كادرلىق قىزمەت ءوفيسىنىڭ مەموراندۋمى اياسىندا 57 وتاندىق توتەنشە جاعدايلار مەن جەرگىلىكتى تابيعي رەسۋرستاردى قورعاۋ سالاسىنىڭ باسشىلىق قۇرامى ءۇشىن داعدارىستى باسقارۋ بويىنشا ونلاين وقۋ سەمينارى ءوتتى.
اگەنتتىك توراعاسى مەملەكەت باسشىسىنىڭ اۋىل جانە اۋدان اكىمدەرىنىڭ بىلىكتىلىگىن ارتتىرۋ بويىنشا بەرىلگەن تاپسىرماسىنا سايكەس پرەزيدەنت جانىنداعى مەملەكەتتىك باسقارۋ اكادەمياسىندا وزىق تاجىريبەلەردى ەسكەرە وتىرىپ, بۇل مىندەتتى ساپالى ورىنداۋ تاسىلدەرىن پىسىقتاۋ قاجەتتىلىگىنە توقتالدى.
القا وتىرىسىنىڭ قورىتىندىسى بويىنشا دارحان جازىقباي اگەنتتىكتىڭ قۇرىلىمدىق جانە اۋماقتىق بولىمشەلەرى باسشىلارى الدىندا حالىقتىڭ مەملەكەتتىك اپپاراتقا دەگەن سەنىمىن ارتتىرۋعا باعىتتالعان ستراتەگيالىق مىندەتتەردى ساپالى ىسكە اسىرۋ بويىنشا بىرقاتار تاپسىرمالار جۇكتەدى.
