فوتو: instagram.com/akimat_mangystau
پرەزيدەنت بىلتىر قابىلدانعان «ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋعا ارنالعان» ۇلتتىق جوبا اياسىندا جەرگىلىكتى باسشىلار وتاندىق ءونىم شىعارۋدى قولعا الۋدى جالعاستىرۋ كەرەك دەدى.
«ۇكىمەت ينۆەستوردى ىزدەۋگە, قولداۋعا جانە قورعاۋعا قاتىستى جۇمىستىڭ ءبارىن جۇيەلى جۇرگىزەتىن ءبىرتۇتاس ەكوجۇيە قۇرۋى قاجەت. بۇل جۇمىس بارلىق دەڭگەيدە, ياعني ايماقتا, ورتالىقتا جانە شەتەلدە بىردەي اتقارىلۋى كەرەك. وسى ورايدا شەتەلدىك جانە وتاندىق ينۆەستورلارعا قاتىستى ۇستانىم بىردەي بولۋى قاجەت. مەملەكەتتىڭ قولداۋىنا يە بولعان كومپانيالارعا ءتيىستى تالاپ قويىلۋى كەرەك. ولار جۇمىس ورىندارىن ساقتاۋعا, ءوندىرىستى جاڭعىرتۋعا ءتيىس. سونىمەن بىرگە, ەكولوگيا تالاپتارىن مۇلتىكسىز ورىنداۋعا مىندەتتى», دەدى پرەزيدەنت.
2024 جىلى ەلىمىزدىڭ الەۋمەتتىك شىعىستارعا بولگەن نەگىزگى قاراجاتى جالپى شىعىستاردىڭ37 %-ىن قۇرادى. بۇل كورسەتكىشتى 2026 جىلعا قاراي 44,7%-عا دەيىن ۇلعايتۋ جوسپارلانعان. بۇل – ازاماتتارىمىزدىڭ الەۋمەتتىك قامسىزداندىرىلۋى, دەنساۋلىق ساقتاۋ, مەكتەپ, بالاباقشا جانە جوعارى وقۋ ورىندارىندا تەگىن ءبىلىم الۋ, تۋريزم مەن سپورت. ياعني مۇنداي قادام – حالىقتىڭ ءال-اۋقاتىن جاقسارتۋعا جانە الەۋمەتتىك تۇراقتىلىقتى قامتاماسىز ەتۋگە باعىتتالعان ساياسي ناۋقاننىڭ ءبىر بولىگى. ەكونوميكانى دامىتۋدىڭ ناقتى سەكتورىنا 8,5% عانا جۇمسالادى. ونىڭ ىشىندە كاسىپكەرلىكتى مەملەكەت تاراپىنان قولداۋ شارالارى, رەسپۋبليكالىق جولدار قۇرىلىسى, ەكولوگيا, سۋ رەسۋرستارى جانە جوعارى قوسىلعان قۇن, جۇمىس ورىندارى مەن بيۋدجەت كىرىستەرىن قامتاماسىز ەتەتىن جوبالار. ال دامىعان ەلدەردە ەكونوميكانىڭ ناقتى سەكتورىنا جۇمسالاتىن شىعىندار شامامەن 25%-دى قۇرايدى.
سونداي-اق مەملەكەت تاراپىنان تاعايىندالعان الەۋمەتتىك كومەكتىڭ مۇقتاج جاندارعا ەش قيىندىقسىز جەتكىزىلۋىن ءتيىستى قىزمەت ورىندارىنا تاپسىرۋ ارقىلى مەملەكەت باسشىسى جەمقورلىقتىڭ قاتاڭ باقىلاۋدا بولاتىندىعىن جەتكىزدى. حالىقتىڭ الەۋمەتتىك احۋالىن جاقسارتۋ ءۇشىن ەڭ الدىمەن ەكونوميكالىق ءوسىم دەڭگەيىن تومەندەتپەۋىمىز كەرەك. سول ماسەلەنىڭ اينالىسىندا قۇزىرلى ورگاندار, مەملەكەتتىك اكىمشىلىك قىزمەتكەرلەرى جانە باسقا دا سالا ماماندارى جۇمىلا ەڭبەك ەتۋگە ءتيىس.
بەكبول ورىنباساروۆ,
سەنات دەپۋتاتى
