ەسكە سالايىق, مەملەكەت باسشىسى سويلەگەن سوزىندە ۇكىمەتكە اعىمداعى جىلدىڭ ماۋسىم ايىنىڭ سوڭىنا دەيىن ءاربىر پەرسپەكتيۆالى ورتا كاسىپورىنمەن جۇمىس جوسپارىن ازىرلەپ, اياقتاۋدى تاپسىرعانى ءمالىم.
قوسمان زەكەش ۇلىنىڭ پىكىرىنشە قازاقستان ەكونوميكاسىنىڭ دامۋى ورتا كاسىپكەرلىك كولەمىنىڭ ارتۋىنا تىكەلەي بايلانىستى, ال, بۇگىندە بىزدە ورتا كاسىپكەرلىكتىڭ ىشكى ونىمدەگى ۇلەسى – 7%, ەكسپورتتا – 7%, جۇمىسپەن قامتۋدا – 4% قۇرايدى.
«سالىستىرۋ ءۇشىن ايتايىن «ەكونوميكالىق ىنتىماقتاستىق جانە دامۋ ۇيىمىنا» مۇشە ەلدەردە ورتا بيزنەستىڭ جالپى ىشكى ونىمدەگى ۇلەسى 20-30%-عا, ەكسپورتتاعى ۇلەسى 30%-عا, ال جۇمىسپەن قامتۋداعى ۇلەسى 15%-دان استام دەڭگەيگە جەتەدى», دەدى ق.قاجكەنوۆ.
ساراپشىنىڭ پىكىرىنشە شاعىن كاسىپورىندارمەن سالىستىرعاندا ورتا كاسىپورىنداردىڭ ەكونوميكالىق تيىمدىلىگى ايتارلىقتاي جوعارى.
«مىسالعا ايتار بولسام ورتا كاسىپورىنداردىڭ ونىمدىلىگى شاعىن كاسىپورىندارمەن سالىستىرعاندا 30 ەسە جوعارى, ورتاشا مولشەردە سالىنعان ءاربىر تەڭگە شاعىن كاسىپورىندارعا قاراعاندا 2 ەسە كوپ جالپى قوسىلعان قۇن قالىپتاستىرادى, ورتا بيزنەستەگى جالاقى شاعىن كاسىپكەرلىككە قاراعاندا 1,5 ەسە جوعارى, ال سالىق تۇسىمدەرىنە قوسقان ۇلەسى شاعىن بيزنەسكە قاراعاندا 3%-عا ارتىق. دەگەنمەن, ولاردىڭ سانى از», دەدى ول.
ونىڭ سوزىنشە قازاقستاندا ورتا كاسىپورىنداردى دامىتۋعا نەعۇرلىم ءمان بەرۋ كەرەك.
«پەرسپەكتيۆالى ورتا كاسىپورىنداردى دامىتۋ ماڭىزدى, ويتكەنى ولار يكەمدى, قارجىلىق اۋىتقۋلارعا ءتوزىمدى, ەكسپورتقا باعىتتالعان ءونىم وندىرۋگە قابىلەتتى, سونداي-اق ساپالى جۇمىس ورىندارىن قۇرۋعا مۇمكىندىك بەرەدى», دەپ تۇيىندەدى قوعامدىق ساياسات ينستيتۋتىنىڭ باس ساراپشىسى قوسمان قاجكەنوۆ.
